aMbaŋ 15:20; Ro 14:3
b1Kor 3:18, 13:12; Ga 6:3
c1Kor 10:19+; Ga 4:8; Ep 4:5+
dYo 1:3+; Mbaŋ 17:28; Ro 11:36; Kol 1:16
fRo 14:23; 1Kor 10:28+
gMk 7:19; Ro 14:14
hRo 14:13+; Ga 5:13
iRo 14:19+

1 Corinthians 8

Paulus isavia watooŋrau tau tamtamon tigham zi pa maaron karomŋa

Aiyo, naghe nasaav rig pa gabua tau tigham zi timin watooŋrau pa maaron karomŋa na.

Yam siriv asavsaav aghe: “Yei nisov lemai ŋgar. Nikankaan pa gabua tawe ŋgara mako.” Ene poia. Eemon ayamaan gham. Pa ŋgar toit, ene igham ghiit tapakur tauun ve taghe taliiv zetaanŋa siriv. Eemon ŋgar to loloon pa tauun, ene igham ghiit tail eez to tauul zetaanŋa ve tapalot zi. a 

Isaav ighe tamtamon eta igham ŋgar ighe i irau kat pa ŋgar, ene itotoi ighe i igham ŋgar irao soone. b 

Eemon isaav ighe tamtamon eta loolo igheen to Maaron, ene Maaron iwataghi, ve ighamu imin le wa.

Aiyo, yam aghason ghau aghe irau taghan gabua tau tirav zi imin watooŋrau pa maaron karomŋa na, ma mako?

Iit tawatagh: Maaron karomŋa ta naol ne, ene Maaron tauu mako. Ene gabua anunuzi sorok. Pasaa, Maaron eemon ta ilepleep. Ite paam mako. c 

Onoon, tamtamon tighur ila to gabua maata maata to sambam saamba ve taan, ve tiwaat zi tighe ‘maaron toozi’ ve ‘tiina toozi.’ Eemon iit taghur ila to Maaron eemon. I Tamaan tau imin puughu pa gabua tisov, ve iit taleep to tabees pani. Ve taghur ila to Tiina toit eemon. Ene Yesu Krisi. I ta imin eez pa gabua tisov tivot, ve i ta imin puughu pa lepoogh toit. d 

Eemon tamtamon siriv tau ghuruuŋ ila toozi iyaryaaŋ soone na, tighilaal gabua tane mako. Pasaa, muuŋ ve ilam, tibesbees pa maaron karomŋa. Tauvene aazne, isaav ighe tighan gabua eta tau tighamu imin watooŋrau pa maaron karom eta, ene tiyamaan tauzi tighe tigham sosor ve tisaghat ila Maaron maata.
(8:7) Saawe tau yes matazi dodoli tigham watooŋrau, zeran to watooŋrau tirav gabua tawe, ve timoz miiza sirivu izala artaal iloŋ ila rumei to maaron karom tawe. Ve sirivu, ene yes tau tila pa suŋuuŋ na, tighamu tivot tila muuri, ve timozi gha yesŋa zetazŋa siriv tighani, ma tighamu ila nugh to gholgholiiŋ, leso tamtamon tigholi.
,
f 

Onoon, gabua ta naol ne, isaav ighe taghan zi, ma taghan zi mako, ene irau igham ghiit tagharau Maaron, ma ipoon ghiit pani ne mako. Pa gabua tauvene irau igham ghiit tamin popoiaan, ma tasaghat ila Maaron maata ne mako. g 

Eemon yam tau aghazooŋ pa gabua tane, ve awatagh aghe Maaron iŋgalsekin ghiit pa ghaniiŋ gabua eta mako na, ayamaan gham. Pa ighe aghan gabua tauvene, ene pale agherev yes tau ghuruuŋ ila toozi iyaryaaŋ soone na, gha titap pa ghuruuŋ ila toozi. h 

10 Yo tau ughazooŋ pa Maaron ŋgar tooni na, isaav ighe ughan iloŋ ila rumei to maaron karom eta, ene poia. Eemon ighe ŋeer eta tau ghuruuŋ ila tooni iyaryaaŋ soone ve iroiroi pa ghaniiŋ gabua tauvena, ighit ghom, ene aat ipazaagha to ighan gabua tawe paam. Tauvene murei, i pale iyamaan ighe i igham sosor ila Maaron maata. 11 Uyamaan ghom wa? Ŋeer tau ghuruuŋ ila tooni iyaryaaŋ soone ve iroiroi pa ghaniiŋ gabua tauvene, i toŋvetaz tsio tau Krisi imaat pani. Eemon ŋgar tau ughamu na, ene ivaghamunia. 12 Yam aat matamim iŋgal toŋvetaz tsiam siriv tau ghuruuŋ ila toozi iyaryaaŋ soone na. Isaav ighe agham zi tiyamaan tighe tigham sosor, ve lolozi ipataŋan, ene yam agham sosor pazi, ve agham sosor pa Krisi paam. 13 Tauvene isaav ighe gabua eta tau taghani irau igham toŋvetaz tsiau eta to Krisi itap pa ghuruuŋ ila tooni, ene irau naghan gabua tana muul mako. Pa aat nagham toŋvetaz tsiau tana itap ma vene. i 

Copyright information for `TUCT