aYo 21:15+; Mbaŋ 20:28; 1Tim 3:3; Tit 1:7
b2Kor 1:24; Pil 3:17; 1Tim 4:12; Tit 2:7
c1Kor 9:25; 2Tim 4:8; 1Pe 1:4
dMt 23:12; Yems 4:6
eLu 1:52, 14:11; Yems 4:10
fMbo 55:22; Mt 6:25+; Pil 4:6
gEp 4:27, 6:11+; 1Tes 5:6; Yems 4:7
h2Kor 4:17; 1Pe 1:6
jMbaŋ 13:5,13, Mbaŋ 15:37+; 2Tim 4:11
lRo 16:16

1 Peter 5

Ŋginiiŋa aat tiŋgin poghania Maaron tamtamon tooni

Aiyo, yau naghe napalot ŋginiiŋa tsiam pa saveeŋ siriv. Pasaa, yau paam ŋginiiŋ imin yam. Ve pataŋani tau Krisi ibaado na, taug naghit katini pa matag. Ve saawe tau Krisi imuul ilam ve itotoi tapiri ve eeza tiina ivot ighazooŋ, ene pale yau paam itiŋa taleep ila Krisi mbonari loolo. Tauvene yam ŋginiiŋa irau alooŋ aliŋag tane, ve ataghoni. Maaron ighur uraat ila nimamim wa ighe aŋgin sipsip tooni. Tauvene matamim pazi ve aŋgin zi poi. Uraat tsiam tana, isaav ighe tamtamon tizoornugh payam to aghamu, ene poia mako. Aghamu toman lolomim, o poia. Leso ataghon Maaron loolo. Ve agham ŋgar tiina pa lemim atuya sov. Pa ŋgar tauvene, taghita poia mako. a 

Yes tau Maaron ighur zi ila nimamim to aŋgin zi na, agham taumim amin tiina pazi ve atatan zi tizi sov. Yam taumim aat amin totoyaaŋ poia pa Maaron sipsip tooni. Leso tighit gham, ve titaghon gham pa ŋgar tsiam. b 

Ighe agham tauvene, saawe tau Ŋginiiŋ Tauu to sipsip imuul ilam, ve itotoi tapiri ve eeza tiina ivot ighazooŋ, Maaron pale igham gham aleep ila tauu mbonari loolo le alok imin lemim atuya. Atuya tauvene, irau isaghat, ma isov ne mako. c 

Tatatan tauun ezaan, ve taghur pataŋani toit ila Maaron niima

Ve yam geegeu aleep ila ŋginiiŋa tsiam sambazi, ve alooŋ saveeŋ toozi. Yam asov irau atatan taumim ezamim, ve abees poi pa taumim. Pa Maaron aliiŋa isaav tauvene:

“Yes tau tipait tauzi ezazi na, Maaron ighurghur koi pazi ve itatatan zi.
Ve yes tau titatan tauzi ezazi na, i ighurghur poia tooni izazaa toozi.” d 
Tauvene atatan taumim, ve aleep ila Maaron saksaki niima saamba. Ighe agham tauvene, i aat ipakur gham ila saawe tau i tauu ighuru na. e 

Pataŋani tsiam naol tau lolomim bubu pazi na, aghur zi tisov tila Maaron niima. I pale iuul gham. Pasaa, i ighamgham ŋgar tiina payam ve maata payam. f 

Agham ŋgar poi, ve matamim izaa. Pa koiamim Ŋeer Saghati, i ilaghlaagh imin laion tau iyuryuur ve iliil tamtamon pa ghaniiŋ. Tauvene akis ghuruuŋ ila tsiam tuŋia, ve aparav ariaaŋ, leso atatani. Pa yam awatagh: Toŋvetaz tsiam to Krisi tau tileep irau nugh nugh na, tibadbaad pataŋani raraate imin yam. g 

Saveeŋ palotiiŋ siriv

10 Maaron toit tau poia puughu na, i ipoi gham amin Krisi le, leso igham gham ala aleep tomania ila mbonari loolo le alok. Pataŋani tau aazne abadbaado na, malau mako pale isov. Ve murei, Maaron tauu pale igham gham aleep poia muul, ve ipalot gham, leso ayooz tuŋia, ve ataghon suvinia ŋgar tooni. h 

11 I saksaki, ve tapiri tomania pooz tooni ighengheen tauvene irau saawe. Onoon.

Paesiiŋ siriv

12 Silas iuul ghau pa bodeeŋ rau tuuku tane. Yau naghita naghe i toŋvetaz toit ee tau loolo isaghav Krisi ariaaŋ ve tiini ibees kat pa uraat tooni. Nabood rau tane ilat payam to napariaaŋ gham. Leso aghur ila aghe poia to Maaron tau nasavia ila rau tane, ene gabua tauu. Tauvene akisi tuŋia.

13 Zeetmimŋa tau Maaron isiigh zi imin yam ve tileep izi nugh tiina Babilon ne,
(5:13) Petrus isavia saveeŋ tane izaa to lupuuŋ ee to Krisi tau tileep izi nugh tiina Rom.


tigham aaz poia toozi ilat payam. Ve natug Markus paam, igham aaz poia tooni payam. j 

14 Yam asov lolomim poia pa taumim ve avataki nimamim
(5:14) Petrus ibood saveeŋ tauvene: ‘Avaghani avomim.’ Ene eez toozi tau titotoi tighe lolozi pa tauzi. Ve iit taghamgham tauvene mako. Tayaŋin pa tamtamon, ve tavataki nimaan.


itaghon ŋgar to loloon pa tauun.

Yam tau apaak Krisi ve aleep ila tooni na, Maaron igham gham asov aleep poia toman lolomim luuma. Onoon. l 

Copyright information for `TUCT