aMt 24:43+, 25:13; 2Pe 3:10; Syg 3:3
bEp 5:8+; 1Yo 1:7
cMt 25:1-13; Ro 13:11+; Ep 5:14
dEp 6:13+
eRo 5:9; 1Tes 1:10; 2Tes 2:13+
fRo 14:8+; 2Kor 5:15; 1Tes 4:14
gHib 10:24+
h1Tim 5:17; Hib 13:17
iGa 6:2+; Kol 3:12; 2Tes 3:11+
jMt 5:39+; Ro 12:17; 1Pe 3:9
kPil 4:4
lLu 18:1; Ro 12:12; Ep 6:18; Kol 4:2
mEp 5:20; Kol 3:17
oEp 4:30
p1Kor 14:29; 1Yo 4:1
qRo 15:33; 1Kor 1:8+; 1Tes 3:13; 2Tes 3:16
rPil 1:6; 2Tes 3:3
sRo 15:30; Kol 4:3; 2Tes 3:1
tRo 16:16

1 Thessalonians 5

Tagharaat tauun ve tasaŋan muleeŋ to Tiina toit

Yam toŋvetaz, saawe duduuŋ to Tiina toit imuul ilam, ene irau nibood saveeŋa eta payam mako. Pasaa, taumim awatagh wa. Saawe to Tiina toit imuul ilam, ene pale ipateeŋ ghiit imin umbuuŋa tau ilam pa mboŋ. a 

Tamtamon pale tisaav tighe: “Aa, aazne taleep poia kat. Gabua eta irau ivaghamun ghiit mako.” Pale tisavsaav tauvene, ve rekia mon pataŋani tiina ivot pazi le ivaghamun zi kat. Pale ipateeŋ zi imin yavyavuuŋ tau ighamgham zilivaa pa popaaŋ. Ve irau tighau pani mako.

Eemon yam toŋvetaz, aazne aleep ila ndoroom loolo mako. Tauvene saawe tana irau ipateeŋ gham imin umbuuŋa ne mako. Pasaa, yam asov tamtamon to mataaz ve alaagh ila ghazooŋa to Maaron loolo. Iit tamin yes to mboŋ tau tileep ila ndoroom loolo ne mako. b 

Tauvene iit tagheen le loloon iveegh imin tamtamon siriv sov. Tamamaat ve taŋgin tauun poi. c 

Iit tawatagh: Yes tau tigheen na, tigheen pa mboŋ. Ve yes tau tighun le tisaghat na, tighun pa mboŋ. Eemon iit, tamtamon to mataaz. Tauvene iit aat taŋgin tauun poi. Ve taghur ila ariaaŋ, ve loloon pa Maaron ve tamtamon paam. Pa ŋgar tauvene, ene imin gabua ariaaŋa to ipoon gargariin pa zaab. Ve taghur mataan pa saawe to Maaron igham mulin ghiit ve taleep poi. Pa ŋgar tauvene, ene imin hat ariaaŋa to ipoon dabaan pa zaab. d 

Aghita. Maaron ighur ghiit to aatyavyav tooni izaa toit mako. I ighur ghiit pataghaaŋ ighe igham mulin ghiit ila uraat to Yesu Krisi, leso taleep poi. e 

10 Krisi igham niaan ve imaat pait, leso igham ghiit tala taleep tomania. Tauvene saawe to muleeŋ tooni, isaav ighe tamaat, ma taleep mataan yaryaare, ene i aat igham ghiit tala itiŋa taleep. f 

11 Tauvene yam asov avapaloti gham ve apariaaŋ zeetmimŋa pa ŋgar to Krisi, imin tau aazne yam aghamghamu ne. g 

Tutuuŋ siriv

12 Yam toŋvetaz, ŋginiiŋa tsiam tighamgham uraat tiina ila yam sosomim, ve tipapaduduuŋ gham leso ataghon duduŋai Tiina toit ŋgar tooni. Tauvene yei nighason gham to atandagh pazi, ve aleep ila sambazi. 13 Apakur zi, ve lolomim pazi kat. Pa yes tighamgham uraat tiina payam. Ve yam asov alup lolomim imin eemon, ve aleep toman ŋgar luuma. h 

14 Yam toŋvetaz, yei nighe nipalot gham pa ŋgar siriv. Yes tapirgomŋa tau tilepleep sorok na, yam asaav ariaaŋ pazi to tigham uraat. Ve yes tau matazi roiroi, ma lolozi ipataŋan, na apalot zi. Ve yes tau tapirizi imbool ve tirau uraat mako, na auul zi. Ve atotoi ŋgar marowa pa tamtamon tisov. Isaav ighe tamtamon eta igham saghatin gham, na ayai gham ve abaado mon. i 

15 Tauvene isaav ighe tamtamon eta igham ŋgar saghati payam, na ayatu sov. Saawe isov, atoova to atotoi ŋgar poia pa taumim ve tamtamon tisov. j 

16 Lolomim poia irau saawe. k 

17 Ve asuŋ irau saawe. Apuli sov. l 

18 Saa gabua tau ighe ivot payam, na lolomim poia mon pa Maaron ve apaiti. Pa i ighe yam tau apaak Krisi ve aleep ila tooni na, agham tauvene. m 

19 Arav matin yav to Avuvu Patabuyaaŋ sov.
(5:19) Ziiri tane, ŋgara tauvene: Isaav ighe Avuvu Patabuyaaŋ ipaburigin ghiit pa ghamuuŋ ŋgar eta, na taghamu mon. Tazoor ŋgar tooni sov. Ve isaav ighe i igham uraat tiina ila zetaanŋa siriv lolozi, ene paam, tayau avoon pazi sov.
,
o 

20 Ve Maaron aliiŋa tau propet tooni tisavia payam na, aveleghi, ma aghita imin saveeŋ sorok sov. 21 Eemon yam aat agabiiz poghania saveeŋ ve ŋgar ta naol ne. Ighe popoia, na akis zi ve ataghon zi. p 

22 Ve ŋgar sasaghati ta naol ne, aleep soghan pazi.

Paulus ipasov saveeŋ tooni

23 Maaron toit, i ŋgar luuma puughu, ve iŋgin ghiit taleep poia irau saawe. I tauu aat igham gham ataghon ŋgar patabuyaaŋ mon. Ve iŋgin anunumim, lolomim ve ŋgar tsiam, tomania anoŋamim, ve igham gham ataghon ŋgar poia mon le irau muleeŋ to Tiina toit Yesu Krisi. Leso lemim sosor eta ila i maata sov. q 

24 Maaron tau ipoi gham amin le na, i aat igham tauvene. Pasaa, i aavo onoon, ve itataghon saveeŋ mbuaaŋ tooni. r 

25 Yam toŋvetaz, matamim iŋgal ghei, ve aghur ghei ila suŋuuŋ tsiam. s 

26 Atak toŋvetaz to Krisi tisov nimazi, ve agham zi toman lolomim poia. t 

27 Yau nasaav ariaaŋ payam ila Tiina toit eeza: Awaat rau tane pa toŋvetaz toit tisov tau tighur ila to Krisi na.

28 Poia to Tiina toit Yesu Krisi izaa tsiam. Onoon.

Copyright information for `TUCT