aMbaŋ 10:42; 1Pe 4:5
b1Tim 4:13; 2Tim 2:25; Tit 2:15
c1Tim 4:1
d2Tim 1:8, 2:3; 1Pe 1:13
ePil 2:17
f1Kor 9:24+; 1Tim 6:12; Hib 12:1
gYems 1:12; 1Pe 5:4; Syg 2:10
hKol 4:14; 1Yo 2:15
iMbaŋ 15:37+; Kol 4:10,14
j1Tim 1:20
kMbo 121:7
lMbaŋ 18:2+; 2Tim 1:16+
mMbaŋ 19:22, 20:4, 21:29

2 Timothy 4

Paulus aavo iyaryaaŋ pa Timoti

Tiina toit Yesu Krisi, pale imuul ilam, ve itotoi pooz tooni ivot ighazooŋ, ve igabiiz tamtamon tisov ve ighur atuya pazi. Yes tau tileep matazi yaryaare, ve yes mateegha paam. Yau avog iyaryaaŋ payo ila yesuru Taama Maaron matazi naghe: a 

Uvotia Maaron aliiŋa pa tamtamon irau saawe. Isaav ighe uleep ila saawe poia ve tamtamon lolozi pa loŋaaŋ ghom, ma uleep ila saawe saghati ve timbuzir pa saveeŋ tsio, na yo aat uyooz ariaaŋ pa badooŋ pataŋani, ve upaduduuŋ zi poi. Uvotia saveeŋ karom ve ŋgar saghati to tamtamon ivot ighazooŋ, ve avom iyaryaaŋ pazi leso tipuli. Ve upalot zi to titaghon Maaron ŋgar tooni. b 

Pa murei, saawe eta pale ivot, mako tamtamon lolozi pa loŋaaŋ saveeŋ duduuŋa tau itaghon Maaron ŋgar tooni ne mako. Taliŋazi pale imonmoon pa loŋaaŋ saveeŋ soroksorok. Tauvene yes pale tiyau zeran karomŋa katini tilam ve tighur zi timin paduduŋaaŋ pazi. Pasaa, yes tiwatagh: Zeran tawe pale tipul zi titaghon tauzi lolozi ve ŋgar toozi. c 

Saawe tana ighe ivot, tamtamon pale tipoon taliŋazi pa saveeŋ onoon to Maaron ve tighur murizi pani, ve tighur taliŋazi pa sisiiŋ soroksorok.

Eemon yo aat atem imaat ve ugham ŋgar poi irau saawe, uyooz ariaaŋ pa badooŋ pataŋani, ve uvotia vaaru poia pa yes tau tighur ila soone na. Tinim ibees pa uraat tau Maaron ighuru ila nimam na, ve ugham uratoini le anooŋa ivot. d 

Paulus saawe tooni to ipul taan ilam igharau wa

Pasaa, saawe tsiau to napul taan, ene ilam igharau wa. Malau mako pale siŋig imaliŋ imin vaen tau tiliŋi izala watooŋrau paavo. e 

Yau naparav ariaaŋ pa vaaru poia gha naliiv wa. Yau napariaaŋ ghau le rigmon mako napasov parlosaaŋ tsiau tane. Ve ghuruuŋ ila tsiau, ene nakiskisi soone. f 

Tauvene atuya poia to yes tau tiparav ariaaŋ gha tiliiv na, tauta isasaŋan ghau. Atuya tawe, ene vene: Saawe to Mboŋ Murei, Tiina toit tau gabizooŋ tooni duduuŋa na, pale ighit ghau ighe yau ŋeer duduŋag. Ve yau mon mako. Tamtamon tisov tau lolozi pani, ve tighe le tighita muleeŋ tooni, ene i pale igham ŋgar raraate mon pazi. g 

Paulus ipasul Timoti ighe ila ighita rekia

O Timoti, utoova to ulam rekia. 10 Pasaa, gabua to taan tane irav Demas maata gha ipul ghau, ve ighau ila pa nugh Tesalonika wa. Ve Kresenes, i ila pa taan sirivu to Galesia, ve Titus paam ila pa taan sirivu to Dalmatia wa. h 

11 Ve Lukas zigani tauta yeiru nilepleep. Tauvene naghe ugham Markus, ve yamru alam. Pasaa, i irau iuul ghau kat pa uraat to Maaron. i 

12 Tikikus, yau nambaaŋo ilat pa nugh Epesus wa.

13 Nonoghiiŋa tsiau to ŋgoaaŋ, napuli igheen ila Karpus ruum tooni izi nugh Troas. Saawe tau ughe ulam, mako matam iŋgali ve ughamu ilam. Ve ugham rau tsiau tilam paam. Ve rau tau tigharaat zi pa ŋgai uuli na, matam iŋgal zi kat ve ugham zi tilam. Lolom iveegh pazi sov.

14 Aleksander tau ŋeer to gharatooŋ gabua pa mbaras ve ain na, i igham ŋgar saghati tau ivaghamun ghau kat. Ŋgar tau ighamu na, murei Maaron tauu aat iyatu. 15 Tauvene matam imomoos poi pani. Pasaa, i izoor saveeŋ tsiei kat. j 

16 Saawe imin maata tau tipayooz ghau to napaghazoŋai taug pa uraat tsiau, tamtamon eta iyooz murig ve ipariaaŋ saveeŋ tsiau mako. Mako kat. Tisov timoghaagh payau. Eemon yau nasuŋ Maaron naghe maata kisin sosor toozi ve iyatu sov. 17 Onoon, yau zigau. Eemon Maaron ileep tomani ghau ve ipalot ghau. Tauta navotia katin vaaru poia pa yes tau Yuda mako na, gha tisov tilooŋa. Saawe tana, naghe pale namaat. Eemon mako. Maaron iuul ghau, ve ipas ghau navot ila laion aavo. 18 Ve yau naghur ila ariaaŋ naghe i aat igham mulin ghau pa ŋgar sasaghati naol isov tau tamtamon tighe tigham payau na, ve maata payau poi lee igham ghau nala naleep tomania izi nugh tooni sambam. k 

I eeza tiina kat pa tapiri ve poia tooni. Tauvene pakuruuŋ toit aat iŋaruini irau saawe. Ta aazne ve taghon taghon gha ila. Onoon.

Paesiiŋ siriv to Paulus

19 Ugham aaz poia tsiau pa Prisila yesuru Akwila, ve Onesiporus tomania yes tau tileep tomania ila ruum tooni na paam. l 

20 Erastus, yau napuli ileep izi nugh Korin. Ve Tropimus, i imorooŋ gha napuli ileep izi Miletus. m 

21 Timoti, utoova to ulam rekia. Pasaa, malau mako pale nugh isaghat ve yauŋa tiina ivot.

Eubulus, Pudes, Linus, ve Klaudia, tomania toŋvetaz to Krisi tisov tau yeŋa nilepleep ne, yes tigham aaz poia toozi payo.

22 Timoti, Tiina toit pale ileep tomani ghom, ve poia tooni izaa to yam asov. Onoon.

Copyright information for `TUCT