aMt 4:21, 20:22+
bRo 15:30+; Ep 6:18
cMbo 34:7; Mbaŋ 5:19, 16:25+
fMbaŋ 6:7, 19:20; Kol 1:6
gMbaŋ 11:29+, 12:12

Acts 12

Kinik Erod irav Yakobus imaat, ve ighur Petrus iloŋ ila ruum to yavyavuuŋ

Saawe tana, kinik Erod iburig, ve ikis tamtamon siriv tau tileep iloŋ ila lupuuŋ to Krisi na. Leso ighur yavyavuuŋ pazi. Ve isaav gha tigham Yakobus tau Yoan toogha na, ve tirav motin luua pa mbuzaagh gha imaat. a 

I ighita ŋgar tau ighamu na, ene igham yes Yuda lolozi poia. Tauvene ikis Petrus paam. Gabua tana ivot indeeŋ saawe to lupuuŋ tiina to ghaniiŋ mberet tau le yis mako na. Tauvene Erod ikis Petrus, ve ighuru iloŋ ila ruum to yavyavuuŋ. Ve ighuru ila zaaba saŋavul liim ve ee (16) nimazi to tiŋgini. Zaaba tawe tivalagh zi timin ŋgun paaŋ, ve ŋgun paaŋ tana tivayoli zi pa uraat to ŋginiiŋ Petrus. Tamtamon paaŋ tileep ila ŋgun eŋaeŋa. Erod maata iŋgal ighe saawe tau lupuuŋ tiina to Pasova isov, mako igham Petrus, ve ipayooze pa savsaveeŋ ila eval tiina matazi. Tauvene tikis Petrus ileep ila ruum to yavyavuuŋ loolo. Eemon lupuuŋ to Krisi tisuŋsuŋ ariaaŋ tighe Maaron iuule. b 

Aŋela ipas Petrus ivot pa ruum to yavyavuuŋ

Tilepleep le mboŋ ee, Petrus ighengheen ila zaaba ru sosozi. I, tikauu pa sen ru. Ve zaaba siriv tiyozyooz ila ataman aavo, ve tiŋginŋgin ruum to yavyavuuŋ. Erod maata iŋgal ighe mboŋ tane le nughizau, mako igham Petrus ivot pa ruum to yavyavuuŋ, ve ipayooze pa savsaveeŋ.

Malau mako ve aŋela to Maaron ivot le mbonari isul iloŋ ila ruum to yavyavuuŋ loolo. Aŋela ivaaŋ Petrus, ve isaav pani ighe: “Ai, uburig rekia!” I isavsaav, ve sen tau tikau Petrus niima pani na, timazugh tizi.

Aŋela isaav pani muul ighe: “Ugharaat ghom pa laghooŋ, ve ughur zuzuuŋa to aghem.” Petrus igharaat ghi le isov, ra aŋela isaav pani muul ighe: “Utav ghom pa nonoghiiŋa tsio to ŋgoaaŋ, ve utaghon ghau.” Tauvene Petrus itaghoni gha yesuru tila. Eemon igham ŋgar ighe ŋgar tau aŋela igham pani na, ene ivot pani onoon mako. Ighe pa ighita tandaghiiŋ mon. 10 Yesuru tila tisaliv zaaba ŋgun ee, ve tila tisaliv ŋgun ite, ra tila tivot ataman ariaaŋa tau igheen ila pa muuri. Tilaagh ŋaruini tila, ve ataman tauu ikaak sorok, ve yesuru malmalizi tivot tila. Tipul ruum to yavyavuuŋ, ve titaghon eez tila rig, ra aŋela ipuli ve ila. c 

11 Ra Petrus ŋgar tooni ivot, ve isaav pa tauu ighe: “Onoon kat, ŋgarig gha naghilaal: Maaron imbaaŋ aŋela tooni ilam to ipas ghau ila Erod niima, ve ŋgar sasaghati naol tau yes Yuda tighe tigham payau.”

12 Saawe tau Petrus ighilaal gabua tana, malmali ila pa ruum to Maria, tau Yoan Markus tiina na. Ruum tana, yes eval tila tilup zi ila loolo, ve tisuŋsuŋ. 13 Petrus ila iseŋ ataman, ve besooŋa livaa ee, eeza Roda, ila ighe ikaak ataman. 14 Eemon saawe tau ighilaal Petrus aliiŋa, i loolo poia le poia kat. Tauta loolo iveegh pa kakooŋ ataman, ve ilaan muul iloŋ ila, ve ipaes pa eval tiina ighe: “Alei, Petrus tauu ta iyozyooz ila ataman aavo we!”

15 Yes tiyol aliiŋa tighe: “Wai, ŋgar tsio ivaghamgham!”

Eemon i aavo iyaryaaŋ ighe: “Mako, i tauu ta iyozyooz muuri we.”

Tauvene yes tisaav pani tighe: “Ewe aat aŋela tooni taa?”

16 Petrus iyozyooz muuri, ve inoknok seŋiiŋ ataman. Tauvene tila tikaak ataman, ve tighita le tirur pani. 17 Eemon i itatan niima pazi leso tineneeŋ. Ra ipaes pazi pa eez tau Tiina toit Yesu ighamu ivot pa ruum to yavyavuuŋ. Ipaes pazi le isov, ve isaav pazi ighe tila tipaes pa Yakobus
(12:17) Yakobus tane, i Yesu taazi duduuŋ. I ta ibood Rau to Yakobus (o Jems) tau igheen Baibol loolo na.


ve toŋvetaz siriv to Krisi pa gabua tau ivot pani na. Ra ipul zi, ve ila pa nugh ite.

18 Mboŋ tana le nughizau, ve yes zaaba tirur ve tigham ŋgar naol pa ghaoŋ to Petrus. 19 Erod ilooŋ paesiiŋ tighe Petrus ileep ruum to yavyavuuŋ loolo muul mako. Tauvene isaav pa zaaba tooni ighe tila tiilo. Eemon tiilo le mako. Tauvene Erod ighason rarai yes tau tiŋgin Petrus na. Ighason zi le mako, ra isaav gha tigham zi tila, ve tirav zi timaat.

Murei ra, Erod iburig, ipul taan sirivu to Yudea, ve izila nugh Sisarea, ve ileep rig ta sewe.

Maaron irav Erod imaat

20 Saawe tana, Erod
(12:20) Saveeŋ to Maaron isavia tamtamon naol tau ezazi Erod. Saawe tau Maria ipoop Yesu, Erod tau imin maata na, ighamgham pooz pa yes Israela. Tiwaat eeza tighe ‘Erod Tau Eeza Tiina.’ I ta irav yes geegeu to Betelem timatmaat. Erod tane, ta naatu eeza Erod Antipas. I ta irav ŋeer rughuzaaŋa Yoan imaat, ve ilup tomania Kaiapas gha Pontius Piladus, ve tirav Yesu imaat. Ŋgat tane isavia Erod Antipas naatu Erod Agripa. I ta irav Yakobus imaat, ve murei motmoot tighani. Erod Agripa naatu, eeza Erod Agripa tau imin ru pani. I ta murei tipayooz Paulus pa savsaveeŋ ila naagho. Sinaiŋ tooni igheen ila Mbaŋooŋa 25:13 ila imuul 26:32.


aate yavyav kat pa nugh tintiina ru, Tiro ve Sidon. Nugh ru tawe, monmon tighamgham aniiŋ ila nugh to Erod. Tauvene tilup zi, ve timbaaŋ tamtamon toozi siriv tila pa Erod, leso tigharaat saveeŋ pani. Tila tivot, ve malmalizi tila to Blastus tau iŋgin kinik ruum tooni na, ve tigham loolo, leso iuul zi pa savsaveeŋ. Ra tila to Erod tauu, ve yesŋa tigharaat saveeŋ, leso tivalupu zi muul. Tisavsaav tomania le isov, ra i ighur saawe pazi to timuul tilam, ve isavia loolo pazi.

21 Tisaŋan le saawe tana ivot, ra timuul tilam to Erod. I inonogh ghi pa nonoghiiŋa tooni to kinik, ve mboole izala boor to gharatooŋ saveeŋ, ve ipaburigin saveeŋ tooni. 22 Yes tau tilooŋ saveeŋ tooni na, tiboboob tighe: “Tamtamon eta to taan aliiŋa tauvene mako. Ewe aat maaron taa!” 23 Tipapait Erod tauvene ila ila le aŋela to Maaron iravu gha itap izi. Pasaa, imin ta Erod isaav pazi gha tipait Maaron, kanaŋ poia. Eemon mako. I iyok pa paitooŋ toozi tawe. Tauta moroghooŋ tiina ighamu, ve motmoot tighan loolo gha imaat.

24 Saawe tana, Maaron saveeŋ tooni ilanlaan toman tapiri tiina irau nugh nugh. f 

25 Banabas yesuru Saul tighur yambaar to yes Antioka ila yes Yerusalema nimazi le isov, ra tigham Yoan Markus gha yesŋa timuul tila pa Antiok. g 

Copyright information for `TUCT