Exodus 25

Paesiiŋ tuuku pa balbaal patabuyaaŋ to Maaron

Mose ileep izi loloz Sinai daaba, ve Yoova isaav pani pa balbaal patabuyaaŋ tau i ighe yes Israela tigharaata na. Tirau balbaal tawe, leso imin Maaron niia to lepoogh, ve itotoi yes Israela ighe Maaron ileep tomani zi.

Yoova isaav pa yes Israela to tigham malimooŋ pa balbaal tawe ighe tigoog gabua tauvene: maet milmilia imin silva ma gol, uuli tau tigharaata pa sipsip ooro, uuli tau tigharaat zi pa gabua maata maata ulizi, ai ariaŋazi maata maata, ŋgoreeŋ ve naunauŋ tau vazizi popoia, ve maet maata maata tau ŋgeretazi popoia. Leso tigharaat balbaal tana, ve tipaboode. Yoova tauu isavia balbaal tana anunu pa Mose, leso aana isavia ila pa yes Israela, ve tigham uratoini. (Ughita Hib 8:5).

Tovaaŋ to balbaal tana, ene vene: Malaua tooni irau roov liim ve tol (15 mita). Ve tuuku tooni irau roov tol (5 mita). Ve siiŋa ve izala, ene irau roov tol (5 mita).

Titav balbaal patabuyaaŋ pa uuli tintiina paaŋ. Uuli tau izila siiŋa na, ŋgereeta poia kat. Tigharaata pa teret tau ŋgeretazi maata maata imin aindan, siŋsiŋai, ve mazavaniiŋa. Ve tipaboode pa aŋela anunuzi. Uuli ite imin ru pani, ene tigharaata pa mekmek ooro. Ve imin tol pani, ene tigharaata pa mekmek ulizi tau tigharaat zi le siŋsiŋaaŋ, ve tisai zi timin eemon. Ve uuli imin paaŋ pani, ene tigharaata pa lamboi ulizi tau tisai zi timin eemon.

Balbaal loolo

Yoova isaav pa yes Israela ighe tidaad uuli tau ŋgeretazi popoia kat imin ŋgatiiŋ balbaal loolo. Balbaal loolo ru. Ee tiina, ve ee marani.

Loolo marani

Loolo marani, ene patabuyaaŋ le patabuyaaŋ kat. (Ughita Mt 27:51, Mk 15:38, Hib 9:3). Bokis ee igheen iloŋ ila. Bokis tawe, tigharaata pa ai, ve tipaak gol ila loolo ve muuri to tipaboode. Ra tighur maet babaŋazi ru tau Yoova iŋgeret tutuuŋ tooni ila na iloŋ ila. Ve tisap aŋela ru anunuzi, ve tipayooz zi izala bokis tana paavo. Tiwaat bokis tana tighe ‘Bokis to Saveeŋ Mbuaaŋ.’ Yes Israela tighita bokis tana tighe ene Yoova niia to ghamuuŋ pooz. Tauta bokis tana imin ilaal pazi ighe Yoova tauu ileep tomani zi (Ughita Syg 11:19).

Saawe eemon geeg ila ndaman eŋaeŋa, daaba to watooŋrau zigani mon iloŋ ila balbaal loolo tau marani na, ve itir siŋ izala bokis to saveeŋ mbuaaŋ paavo. Leso Yoova ireu eval tiina to Israel sosor toozi, ve yesŋa Yoova tivalupu zi muul (Ughita Hib 9:7, 24-26, 10:1-4). Tauta tiwaat bokis tawe aavo tighe ‘Nugh To Rewaaŋ Sosor.’ Uraata siriv to watooŋrau, ma tamtamon sorok eta irau iloŋ ila balbaal loolo marani tau patabuyaaŋ kat na mako. Mako le mako kat. (Ughita Hib 10:19-21).

Balbaal loolo tiina

Balbaal loolo tiina, ene patabuyaaŋ paam. Eemon patabuyaaŋ kat imin loolo marani mako. Tauvene zeran to watooŋrau tisov irau tiloŋ tila loolo tiina, ve tigham uraat toozi.

Boor to mberet patabuyaaŋ

Ruum loolo tiina, gabua tol tigheen ila. Ee, ene boor tau tigharaata pa ai ve tipaak gol izala paavo. Boor tawe, tighurghur mberet patabuyaaŋ tomania ai suuru tau vaazi poia na izala paavo. Wik eŋaeŋa, tindav ai suuru tawe, ve tigham mberet muŋgaana izi, ve zeran to watooŋrau tighani. Mako tighur paaghu izala. Mberet tawe itotoi zi ighe Maaron ileep tomani zi. Eval tiina irau tighani mako. Yes to watooŋrau mon ta tighani. (Ughita Mk 2:26).

Lam tomania aia

Ve gabua ite tau iyooz iloŋ ila balbaal loolo tiina, ene lam aia tau tigharaata pa gol. Gabua tawe puughu eemon, ve booga liim ve ru. Booga eŋaeŋa lezi lam igheen ila. Ravrav ta naol ne, zeran to watooŋrau tila titun lam, leso ighan pa mboŋ le nughizau.

Artaal marani to tunuuŋ gabua tau vazizi popoia

Ve gabua tau imin tol pani, ene artaal marani tau tigharaata pa gol. Saawe isov, yes to watooŋrau tituntun gabua tau vazizi popoia na izala artaal marani tawe pa mboŋoozo ve ravrav. (Ughita Lu 1:8-10).

Gabua tol tana, ta tigheen iloŋ ila balbaal loolo tiina. (Ughita Hib 9:2-5). Ve tipaghazoŋai ghiit pa Maaron tighe i patabuyaaŋ ve paghuuna kat. Ve i ileep tomani ghiit irau saawe, ve imin aniiŋ maata yaryaare pait, ve iŋginŋgin ghiit pa leen aniiŋ ma gabua. Ve i imin ghazooŋa pait.

Oon to ririwaaŋ

Oon tiina ee tau tigharaata pa baras iyooz soghan rig pa balbaal naagho. Oon tawe, yaa igheen ila loolo. Isaav ighe yes to watooŋrau tighe tigham uratoi watooŋrau to tamtamon, ma tiloŋ tila balbaal patabuyaaŋ loolo pa ghamuuŋ uraat, yes aat timin nimazi ve aghezi imin maata. Le isov, o tigham uraat toozi.

Artaal tiina

Artaal tiina igheen igharau ataman aavo. Ene timozmoz watooŋrau to yes Israela izala. Artaal tiina ve oon tana ŋgara tauvene: Iit irau tala tavot Maaron naagho sorok mako. I aat ireu sosor toit, ve igham ghiit taŋgalaaŋ kat, o iit irau tala tavot ila naagho.

Tidaad uuli ariaŋazi irau saŋavul ilivutin balbaal tana tomania artaal tiina ve oon to ririwaaŋ imin didiiŋ. Nugh tau tidaad uuli ilivutini na, malaua tooni irau 44 mita, ve tuuku tooni, ene 22 mita. Ve tigharaat ataman eemon to tiloŋ tila. Artaal tiina igheen igharau ataman tana.

Zeran to watooŋrau

Yoova isavia uraat toozi ŋgara, ve nonoghiiŋa toozi paam ila to Mose. Yes mon ta lezi ezazi to tiloŋ tila balbaal patabuyaaŋ to Maaron. Ve eval tiina, ene mako.

Tutuuŋ siriv

Yoova isavia balbaal patabuyaaŋ ŋgereeta ila to Mose le isov, ra ighur saveeŋ pani ighe yes zitamoot tisov tau ndaman toozi irau tamoot ee ve izaa na, yes aat tighol mulin tauzi pa maet sekel sirivu. Maet tawe, tighuru ila pa yes to watooŋrau, leso tikisi pa uraat siriv.

Tauvene Mose ileep tomania Yoova izi loloz Sinai daaba, ve Yoova isavia ŋgar isov tana pani. Ra igham maet babaaŋa ru ta i tauu iŋgeret tutuuŋ saŋavul ila na, ve ighuru ila Mose niima.

...
Copyright information for `TUCT