aGnp 35:22
bGnp 34:25
cSyg 5:5
dMbo 2:9, 110:2; Mt 2:6
eMbo 1:3
fGnp 23:16-19

Genesis 49

Yakop ivotia gabua tau murei pale ivot pa natŋa

Yakop isavsaav tomania Yosep le isov, ra ipoi natŋa siriv tilam, ve isaav pazi ighe: “Alam agharau ghau. Leso navotia gabua tau murei pale ivot payam.

Yam Yakop natŋa, tamamim Israel ta yau.
Alam alup gham izi naghog, ve alooŋ saveeŋ tsiau.
Ruben, yo natug aidaaba.
Saawe tau paghug ve tapirig ighengheen, yau napoop ghom imin maata.
Tauta tapirig izaa tsio, ve ezam ve tapirim iliiv tazimŋa.
Eemon yo irau uŋgin taum mako. Yo umin yaa tau ivot toman tapiri tiina.
Yo uroron pa tamam mako, ve upamayaŋin ghau.
Pasaa, uzala niag to ghenooŋ, ve umogheer pa azuwag.
Tauvene ezam irau imuuŋ pa tazimŋa muul mako. a 
Simeon yesuru taazi Levi, ŋgar toozi raraate.
Yesuru zeran to ravuuŋ tamtamon sorok pa mbuzaagh toozi. b 

Tauvene lolog pa ŋgar toozi mako,
ve lolog pa lupuuŋ tomani zi mako.
Pasaa, yesuru atezi tuuku, ve tiravrav sorokin tamtamon timatmaat.
Ve ŋgai paam, tivaghamun zi sorok.

Maaron tauu pale ighur pataŋani iŋarui zi.
Pasaa, aatyavyav toozi, ene tiina kat.
Irau lolozi isaghatin tamtamon rigta mako.
Tauvene yau aat nareu zi tomania paaghu toozi le timbiriis tila tileep ila toŋvetaz toozi sosozi.
Yuda, toghamŋa ve tazimŋa pale tipait ezam.
Pasaa, yo aat ukis koiamŋa luazi.
Tauvene toghamŋa ve tazimŋa pale tiput aghezi payo, ve tipakur ghom.

Yuda, yo umin laion paaghu tau tapiri tiina ve tamtamon tiroiroi pani.
Yo umin laion tau ighan ŋgai sagsag siriv le isov, ve izi igheen.
Sei irau iroi mako ve imogheer pani? Mako. c 

10 Yuda tomania paaghu tooni pale tikis titi to kinik,
ve tighamgham pooz ila le irau titi tawe tamtamona duduuŋ ilam ivot.
Mako i tauu ikisi, ve nugh nugh tileep ila i saamba. d 

11 Yuda paaghu tooni pale tileep poia izi taan toozi, ve tirau kat pa lezi aniiŋ ve vaen, ve titum toman naghozi popoia. Irau timbool pa gabua eta mako.
13 Zebulun paaghu tooni pale tileep tigharau te,
ve lezi aavo poia to waaŋ tilooŋ tila.
Taan toozi pale ila imuul izi nugh Sidon.
14 Isakar paaghu tooni pale timin doŋki tau bide tapiri.
Eemon i igheen sorok ila bodbodaaŋ to nakaral tau aniiŋ igheen ila.
Pale tighita tighe taan toozi, ene poia to tileep pani ve tigham uraat.
Tauvene yes pale tigham uraat tiina.
Ve tamtamon toozi siriv pale timin besooŋa sorok, ve tigham uraat pataŋani.
16 Dan paaghu tooni pale timin rumei marani ee to yes Israela,
ve tigham uraat pa gharatooŋ pataŋani to tamtamon.
Yes eval mako. Eemon pale tivaghamunia koiazŋa imin moot saghati tau ileep eez ziige ve isasaŋan.
Ighe tamtamon eta ilaan tomania hos tooni ilam,
ene rekia mon iŋaaŋ hos aaghe, ve ŋeer tau ileep izala paavo na, itap izi taan.
18 O Yoova, yau nasaŋan ghom to ugham mulin ghau.
19 Gat paaghu tooni koiazŋa pale tilam tighe tireu zi.
Eemon yes pale tiparav ariaaŋ, ve tinaan zi tighau tila.
20 Taan to Aser pale ŋgoreeŋa tiina,
ve aniiŋ popoia maata maata tau kinik lolozi pani na, titum ila.
21 Naptali, paaghu tsio pale timin mekmek sagsag
tau tilaghlaagh sorok titaghon tauzi lolozi,
ve tipopoop natuzŋa tau paghunazi kat.
22 Yosep paaghu tooni pale timin ai vaen tau iyooz igharau yaa,
ve booga titum tila soghan le tiliiv sirsiir,
ve ighur anooŋa popoia katini. e 

23 Yosep koiŋa tipaburigin malmal pani, ve tinaano tighe tivaneghi gha imaat.
Eemon tirao mako.

24 Pasaa, Maaron saksaki to Yakop, i ŋginiiŋ to yes Israela,
ve imin niazi ariaaŋa to yoŋgaaŋ.
Tauta Yosep niima tuŋia pa paneegh tooni, ve ivanegh rekrekia.

25 Yosep, Maaron to tamam aat iuul ghom.
Maaron Saksaki Tau Iliiv Zimaronŋa Tisov na, pale ighur poia tooni izaa tsio tomania paaghu tsio,
ve igham uman to sambam izi payam,
ve igham yaa to taan loolo izaa payam paam.
Ve ighur poia tooni izaa to zilivaa tsiam, leso tipoop natmimŋa katini.

26 Yo tamam yau. Poia tau Maaron ighuru izaa tsiau, ene tiina kat.
Itav loloz tintiina tau tiyozyooz irau saawe.
Iliiv poia tooni tau muuŋ izaa to tibugŋa.
Poia tauvene pale izaa to Yosep tomania paaghu tooni, ve ipabood zi imin moghar ndamoonda izala dabazi.
Pasaa, i imin daaba pa tooghŋa.
27 Benyamin, i imin ŋgavuun sagsag tau pitoola ve ilaghlaagh.
Mboŋoozo ta naol ne, i ighanghan gabua tau i iravrav zi na.
Ve ravrav isov, ivavalagh gabua tau i igham zi na, ve ireireii pa zeetŋa.”

28 Ene yes Israela rumei toozi saŋavul ve ru. Saawe tau tamazi Yakop ighe imaat, i ighur poia to Maaron izaa toozi. Ve saveeŋ tau i isavia pa natŋa, ene: iduduuŋ pa yes eŋaeŋa.

Olman Yakop imaat

29 Yakop ighur poia to Maaron izaa to natŋa le isov, ra aavo iyaryaaŋ pazi ighe: “Yau naghe napul gham tane, ve nala naleep tomania ziiri waaro tsiau tau timaat wa. Saawe tau ighe namaat, yam agham ghau nala, ve aghur ghau naloŋ nala maet puura tau igheen izi taan Makpela. Leso nagheen tomania tamaŋ ve tibug. Maet puura tawe, muuŋ tibug Abaram igholi ila to Epron, i ŋeer to yes Hita. Igheen igharau nugh Mamre ta Kanaan we. f 

31 Pasaa, maet puura tawe, ta tighur Abaram yesuru azaawa Sara, ve Isak yesuru azaawa Rebeka tiloŋ tila. Ve yau naghur azuwag Lea aana iloŋ ila paam. 32 Tauvene maet puura tau Abaram igholi ila to yes Hita na, yau naghe aghur ghau naloŋ nala nagheen ta sewe paam.”

33 Olman Yakop ighur saveeŋ izi to natŋa le isov, ra iyoot aaghe izala niia to ghenooŋ, iyavaghan, ve imaat.

Copyright information for `TUCT