a1Pe 2:11
bMbo 66:18; 1Yo 3:22
cMt 6:24; Ro 8:7+; 1Yo 2:15
eIgham 34:14
fMbo 138:6; Lp 3:34; Lu 14:11; 1Pe 5:5+
gEp 4:27, 6:11+; 1Pe 5:8+
hYems 1:8,27; 1Yo 3:3
iMt 5:4
jMt 23:12
kMbo 15:3; Mt 7:1+; Lu 6:37; Ro 2:1
lMt 10:28; Ro 14:4
mLu 12:16+
nMbo 39:4+, 144:4
oMbaŋ 18:21
pLu 12:47

James 4

Taghur loloon pa gabua to taan sov

Puughu mindai ta kokaaŋ ve malmal ivotvot ila sosomim? Lolomim ighaar pa ŋgar sasaghati naol. Tauta ŋgar naol tana ipaparav ila lolomim, ve ipapazaagh gham pa ghamuuŋ ŋgar saghati tauvene. a 

Yam lolomim ighaar aghe agham lemim gabua naol to taan. Eemon irau agham zi mako. Tauta lolomim irav gham pa zeetmimŋa gabua toozi, ve yamŋa avakokai gham, ve avaravu gham gha amatmaat. Yau nasaav payam. Gabua tau lolomim itaŋ pani na, yam irau aghamu mako. Pasaa, aghason Maaron pani mako. Ve isaav ighe aghason Maaron pa gabua eta, i irau igham payam mako. Pasaa, ŋgar tsiam iduduuŋ mako, ve aghasoni pa gabua soroksorok to ipabees tinimim mon. b 

Yam aghur murimim pa Maaron imin livaa tau ipul azaawa ve igham tamoot paaghu. Yam awatagh mako? Ŋgar to ghuruuŋ loloon pa gabua to taan, ene igham ghiit tamin Maaron koiŋa. Tauvene sei tau ighe ighur loolo pa gabua to taan, ene imin Maaron koia. c 

Saveeŋa tiboode pataghaaŋ tauvene:

“Avuvu tau Maaron ighuru ila loloon ne, ŋgar tooni iyaryaaŋ ighe taghur loloon ve ŋgar toit isov iŋarui i mon.”
(4:5) Ziiri tane, le eez naol to tatoora. Eez ite, ene vene: “Maaron tau ighur Avuvu ila loloon ne, ŋgar tooni iyaryaaŋ ighe taghur loloon ve ŋgar toit isov iŋarui i mon.” Ve eez imin tol pani, ene vene: “Ŋgar tau igheen ila loloon ne, ighamgham pa gabua naol. Ve eez imin paaŋ pani, ene vene: “Maaron ighur Avuvu ileep ila loloon, ve ŋgar tooni iyaryaaŋ kat ighe Avuvu tane iŋarui i tauu mon.”

Mindai, saveeŋ tane, yam aghita aghe saveeŋ sorok? e 

Eemon poia to Maaron tau izazaa toit, ene tiina le tiina kat. Tauta saveeŋ ziiri ite isaav ighe:

“Yes tau tipapait tauzi ezazi na, Maaron ighurghur koi pazi ve itatatan zi.
Ve yes tau titatan tauzi ezazi na, i ighurghur poia tooni izazaa toozi.” f 
Tauvene atatan taumim ve aleep ila Maaron saamba, ve aparav ariaaŋ tomania Ŋeer Saghati. Leso ighau payam. g 

Yam aat ala agharau Maaron, o i ilat igharau gham. Yam zeran sasaghatmim tau ayooz ila eez ru na, apul ŋgar to taan ileple, ve ataghon ŋgar to Maaron mon! Agharaat taumim, leso lolomim tomania ŋgar tsiam iŋgalaaŋ mon ila i maata. h 

Aŋiŋ ve tintinmim muul sov. Aghilaal sosor tsiam, lolomim ipataŋan pani, ve ataŋ tiina pa taumim. i 

10 Atatan taumim ila Maaron maata. Leso i tauu ipakur gham. j 

Tasavia saveeŋ saghati pa zetaanŋa sov

11 Yam toŋvetaz, asavia saveeŋ saghati pa zeetmimŋa sov. Pa tamtamon tau ighe ivelegh iitete, ve ighita ighe i ŋeer saghati, ene i ivelegh tutuuŋ to Maaron paam, ve ighita tutuuŋ tawe imin gabua sorok. Yo sei tau ugham tauvene, na yo uleep ila tutuuŋ to Maaron saamba mako, ve utaghoni mako. Ena upakur taum sorok. Pasaa, yo ughe taum ugabiiz tutuuŋ ve ughita sindei ta poia to utaghoni, ve sindei ta irau upuli. k 

12 Alooŋ. Maaron tauu ighur tutuuŋ, ve uraat to gabizooŋ tamtamon, ene igheen ila i tauu niima. I irau igham mulin tamtamon, ve irau ivaghamun zi. Tauvene yo sei, ta ughe umin tiina ve ugabiiz etam ite? l 

Tanumeer tauun sorok sov

13 Alooŋ! Yam tau asavsaav aghe: “Aazne, ma bogzo, mako niraav nila nugh eta, ve nileep ta sewe irau ndaman ee ve niraukol pa lemai gabua. Leso niyau lemai gabua katini. Le isov, o nimuul nilam.” m 

14 Yam lemim ŋgar mako! Gabua tau bogzo pale ivot payam na, yam awataghi? Mako. Lepoghamim to taan, ene imin yav mbuasa tau imbuŋ izaa, ve malau mako imbiriis gha ilale. n 

15 Yam aat asaav tauvene: “Ighe Tiina toit loolo tauvene, ene aat taleep ve tagham uraat tane. Ighe mako, ene aat mako.” o 

16 Eemon yam asavsaav tauvene mako. Yam apapait taumim ve apapakur gham sorok pa uraat tau aghe aghamu na. Ŋgar pakuruuŋ isov tauvene, ene saghati kat. 17 Tauvene matamim iŋgal poi. Pa ighe tamtamon eta ighilaal ŋgar poia tau i aat itaghoni, eemon ighamu mako, ene i igham sosor. p 

Copyright information for `TUCT