Joh 12
a[Mt 26:6-13; Mk 14:3-9]
 
bYo 11:1+
dYo 11:45
Joh 12
e[Mt 21:1-11; Mk 11:1-11; Lu 19:28-40]
 
gMbo 118:25+
iIs 62:11; Sek 9:9
kYo 1:14, 13:31+, 17:1
m1Kor 15:36
nMt 10:39, 16:25
oYo 14:3, 17:24; 1Tes 4:17
pMt 26:39+
qMt 3:17
rYo 11:42
sYo 16:11; Kol 2:15; Syg 12:9, 20:2+
tYo 3:14, 8:28; Ro 5:18
uMbo 89:36+, 110:4; Is 9:6+; Dan 7:14
vYo 8:12, 11:9+; Ep 5:8; 1Yo 1:7
wYo 1:11
xIs 53:1; Ro 10:16
yIs 6:9+; Mt 13:15
zIs 6:9+, 52:13-53:12
aaYo 5:44; Ga 1:10
abMt 10:40
acYo 1:4, 8:12
adYo 3:17, 4:42; 1Yo 4:14
aeLo 18:19; Yo 3:18

John 12

Maria iliŋ ŋgoreeŋ vaazi poia izala Yesu aaghe a 

Mboŋ liim ve ee ighengheen soone, mako uraat to Pasova ivot. Saawe tana, Yesu ila ivot Lazarus nugh tooni Betania. Lasarus, i ŋeer tau imaat ve Yesu ipaburigini pa mateegh na. b 

Yesu tomania mbiwa tooni tileep izi ta sewe, ve zeetŋa siriv to nugh tawe tigham ghanghaniiŋ pani. Marta igham uraat pa gharatooŋ lezi aniiŋ, ve Lasarus ileep tomani zi pa ghanghaniiŋ tana paam. Tauvene yes tighanghan, ve Maria igham ŋgoreeŋ tau vaazi poia ve atuya tiina kat ilam, ve iliŋi izala Yesu aaghe. Ra imusu pa daaba raua. Ŋgoreeŋ tawe vaazi ivot le ikau ruum loolo.
(12:3) Maria iliŋ ŋgoreeŋ tiina irau kilo sirivu. Tigharaat ŋgoreeŋ tawe pa gabua ee tau atuya tiina kat, eeza nard.


Yudas Iskariot, i mbiwa to Yesu tau murei ighuru ila koiŋa nimazi. I ighita gabua tana, ve iburig gha isaav ighe: “Wai, livaa ne, ivaghamunia ŋgoreeŋ tane sorok pasaa! Imin ta tagholia, kanaŋ tagham maet tiina pani, irau 300 denari ma vene. Leso tagham pa yes mbolaaŋa.” Saveeŋ tane, i maata iŋgal yes mbolaaŋa, ve isavia mako. Isaav sorok. Pasaa, i ŋeer to umbuuŋ. I iŋgin lugluug toozi, ve saawe siriv niima kaukauia pa maet toozi siriv.

Yudas isaav tauvene, ve Yesu isaav pani ighe: “Uyau avom pani pasaa? Upuli. I ikis ŋgoreeŋ tane to igharaat ghau pa saawe to namaat ve titavi ghau. Yes mbolaaŋa pale yamŋa alepleep irau saawe. Ve yau irau itiŋa talepleep irau saawe mako.”

Yes daaba to watooŋrau timbu saveeŋ tighe tirav Lasarus imaat paam

Eval tiina tilooŋ tighe Yesu ilepleep izi nugh Betania, ve timeke tila tighe tighita. Ve tighe tighita Lasarus paam. Pasaa, tilooŋ vaaru tighe i imaat ve Yesu ipaburigini pa mateegh. 10 Tauvene yes daaba to watooŋrau tilup zi, ve timbu saveeŋ tighe tirav Lasarus imaat paam. 11 Pasaa, Yuda katini tau tilooŋ Lasarus vaaru na, timoghaagh pa daaba toozi tawe, ve tighur ila to Yesu. d 

Yesu izala pa Yerusalem e 

12 Mboŋ le nughizau, ra eval tiina tau tila tileep izi Yerusalem pa lupuuŋ tiina to Pasova na, tilooŋ Yesu vaaru tighe i ighe izala pa Yerusalem. 13 Tauvene tigham gabua imin tuum raua, ve tivot tila tighe tighita. Saawe tau tighita, tipaburigin bobaaŋ ve tiyoor eeza tighe:

“Hosana!
(12:13) ‘Hosana’, ene saveeŋ ziiri ee to yes Israela. Puughu tauvene: ‘ugham mulin’ o ‘uul.’ Isaav ighe tiyoor ŋeer eta tau eeza tiina, ene tibobai saveeŋ tane to tipakuru.

Tapakur Maaron toit!

Poia to Maaron aat izaa to ŋeer tane. Pasaa, i ilam pa Ŋeer Tiina eeza, ve i kinik to iit Israela!” g 
14 Yesu igham doŋki paaghu ee ve mboole izala, ve ilam itaghon Maaron aliiŋa ziiri ee tau tiboode na. Isaav tauvene:

15 “Yam tamtamon to nugh Zion,
(12:15) Zion (o Sion, o Zaion), ene Yerusalem eeza ite. Zion, ene nugh mbua ee to Yerusalem tau tirau Rumei Tiina to Maaron izala.

aroi sov.
Aghita kinik tsiam tau ilat na!
I mboole izala doŋki paaghu ee, ve ilat.” i 
16 Saawe tau gabua tana ivot, mbiwa to Yesu tighilaal puughu mako. Eemon murei, saawe tau i imaat gha iburig muul, ve eeza tiina ivot ighazooŋ, ra matazi iŋgal gabua tana, ve tighilaal tighe Maaron aliiŋa tana, tiboode izaa to Yesu.

17 Puughu tau eval tiina timeke tila tighita Yesu, ene vene: Saawe tau i ipoi Lasarus gha iburig ve ilaagh ivot pa naal, eval tiina tileep ve tighita gabua ŋgereeta tana. Tauvene murei, tila ve tipaesia gabua tana vaaru pa tamtamon, ve tipariaaŋ Yesu saveeŋ tooni tighe gabua tana itotoia ighe Maaron ileep tomania pa uraat tooni. 19 Zeran tutuuŋa siriv tighita eval tiina tawe yesŋa Yesu tilaghlaagh ve tiyoryoor eeza, tauta tivasavo zi tighe: “Oyai, aghita! Iit tarao mako. Tamtamon to taan tisov tila titaghoni wa!”

Grika siriv tighe tighita Yesu

20 Yes tau tizala Yerusalem to tisuŋ pa Maaron ila lupuuŋ tiina to Pasova na, Grika siriv tileep ila lolozi paam.
(12:20) Grika tau saveeŋ ziiri tane isavi zi na, yes aat tighur ila to Maaron, ve titaghon tutuuŋ siriv to yes Yuda ve tiluplup tomani zi pa suŋuuŋ. Eemon tirav warozi mako. Tauvene yes timin Yuda duduuŋ mako.


21 Yes tila to Pilip, (i ŋeer to nugh Betsaida tau igheen Galilaia na), ve tisaav pani tighe: “Olman, yei nighe le nighita Yesu.” 22 Tauvene Pilip ila ipaesia aliŋazi pa Andreas, mako yesuru tila tipaes pa Yesu.

23 Yesu isaav pazi ighe: “Saawe to Tamtamon Naatu itotoi eeza tiina tomania tapiri ve poia tooni ivot ighazooŋ, tauta ivot wa. k 

24 Onoon kat, yau nasaav payam: Isaav ighe wit uuve izila taan loolo mako, ene irau paaghu eta izaa pani mako. Ene pale uuv tana mon igheen. Eemon isaav ighe uuv tana izila taan loolo ve uuli imbuuz gha ilale, ene aat paaghu tooni izaa, ve ighur anooŋa katini.
(12:24) Yoan ibood saveeŋ tauvene: “Wit uuve aat itap ve izila taan loolo gha imaat, o paaghu tooni ivot, ve ighur anooŋa katini. Ighe mako, ene pale uuv tana mon ighengheen.” Eemon iit tawatagh: Saawe tau tavazogh wit uuve izila taan loolo, uuve dodoli imaat mako. Uuli mon ta imbuuz gha ilale. Ve anooŋa, tauta wit paaghu ivot pani. Yesu ighita ighe mateegh tooni, ene imin wit uuli tau imbuuz gha ilale, ve wit paaghu ivot. Pasaa, i pale imaat gha tighuru ila taan loolo. Eemon mateegh tooni pale imin eez to Maaron igham gabua paaghu ivot. Ve iit Kristen tauvene paam. Iit aat tarei tauun pa Krisi ve uraat tooni, o ghuruuŋ ila toit ighur anooŋa popoia tivot.
,
m 

25 Isaav ighe tamtamon eta loolo pa ghamuuŋ lepoogh poia to taan mon, ene pale tauu ilale. Ve isaav ighe tamtamon eta ighur muuri pa taan lepoogha, i aat igham lepoogh poia ila to Maaron taghon taghon gha ila. n 

26 Isaav ighe tamtamon eta ibees payau, i aat itaghon ghau. Tamtamon tauvene, pale ileep tomani ghau izi nugh tau yau pale nala naleep pani. Ve tamtamon tau ighe ibesbees payau, ene aat Tamaŋ ipakuru.” o 

Yesu isavia mateegh tooni

27 Yesu isaav muul ighe: “Aazne, lolog ipataŋan kat ve nagham ŋgar naol. Pasaa, saawe tsiau to mateegh, ene ilam igharau wa. Pale nasaav mindai? Pale naghe: ‘Tamaŋ, upasali ghau pa pataŋani tiina tau ighe ivot payau ne?’ Mako, irau nasaav tauvene mako. Pa puughu tane ta yau nazilam taan. p 

28 O Tamaŋ, gabua tau pale ivot payau ne, yau naghe imin eez to utotoi tapirim ve poia tsio ivot ighazooŋ pa tamtamon. Leso tipait ezam.”

Yesu isavia saveeŋ tane, ra saveeŋ sambam ve izilam ighe: “Yau natotoi tapirig tomania poia tsiau pa tamtamon wa. Ve yau pale natotoia pazi muul. Leso tighilaal ghau tighe yau ezag tiina.” q 

29 Eval tiina tau yesŋa Yesu tilepleep na, tilooŋ saveeŋ tane, ve siriv tighe pa lalaav luutu. Ve siriv tighe: “Mako. Aŋela eta aat isavsaav pani.”

30 Eemon Yesu isaav pazi ighe: “Saveeŋ tau luutu izilam ne, ene to iuul ghau mako. Ene to iuul gham. r 

31 Aazne, tazaa pa saawe to Maaron ipaghazoŋai ŋgar saghati to tamtamon to taan ivot ighazooŋ, ve ighur atuya pazi, ve iziir daaba tau iŋginŋgin taan ne ighau. s 

32 Aazne, yau naleep izi taan. Eemon murei, saawe tau tiit ghau nazaa, ene pale nagherev tamtamon tisov tilam tsiau.” t 

33 Yesu isavia saveeŋ tane to ivotia eez tau pale imaat pani.

34 Eval tiina tilooŋ saveeŋ tooni tana, ve tiyol aliiŋa tighe: “Maaron aliiŋa tau tiboode na, saveeŋ ziiri ee isaav tauvene: Mesia pale ileep maata yaryaare le alok. Ighe tauvene, puughu mindai ta yo ughe Tamtamon Naatu aat tiiti izaa? Tamtamon Naatu tau yo usavia na, ene sei?” u 

35 Yesu isaav pazi muul ighe: “Aazne, ghazooŋa to Maaron ileep tomani gham. Eemon malau mako pale ipul gham. Tauvene saawe tau ghazooŋa tooni ilepleep tomani gham, alaghlaagh ila ghazooŋa tawe loolo. Leso ndoroom ikau gham sov. Tamtamon tau ighe ilaghlaagh ila ndoroom loolo, ene aat ikankaan pa nugh sindei tau pale ila pani. v 

36 Tauvene saawe tau ghazooŋa to Maaron ilepleep tomani gham soone, aghur ila tooni pataghaaŋ. Leso amin tamtamon to ghazooŋa.”

Yesu isavia saveeŋ tane le isov, ra ipul zi, ve ila iyooŋ pazi.

Yuda katini tighur ila to Yesu mako

37 Onoon, Yesu igham gabua ŋgeretazi naol ila yes Yuda matazi, leso itotoi tauu pazi ve tighilaal tighe Maaron ileep tomania pa uraat tooni. Eemon tighur ila tooni mako. w 

38 Ŋgar tau tighamu na, ene itaghon saveeŋ tau muuŋ propet Isaia iboode na. Isaav tauvene:

“O Maaron, yei nivotia aliŋam pazi, ve sei ighur ila?
Ve saawe tau utotoi tapirim ivot ighazooŋ pazi, sei ighilaalo? Mako.” x 
39 Yes irau tighur ila to Yesu mako. Ve Isaia ipaghazoŋai ghiit pa puughu. Pasaa, saveeŋ ziiri ite tau i iboode na isaav ighe:

40 “Maaron tauu igham ŋgar toozi iyaryaaŋ kat ve ipoon matazi.
Tauta matazi irau tighita gabua tau Maaron ighamu ne mako, ve lezi ghilalooŋ ila lolozi mako. Ve lolozi imuul payau mako, ve tiyok payau to nagharaat mulin zi mako.” y 
41 Isaia isavia saveeŋ tane pasaa, muuŋ i ighita Yesu tapiri ve poia tooni tomania uraat tiina tau murei pale ighamu na ila tandaghiiŋ. Tauta ighilaal ighe Yesu eeza tiina. z 

42 Onoon, pooza katini to yes Yuda tighur ila to Yesu. Eemon tivotia ghuruuŋ ila toozi ivot ighazooŋ mako. Pasaa, tiroi tighe zeran tutuuŋa pale tiziir zi pa lupuuŋ toozi, ve irau yesŋa tilup zi pa suŋuuŋ muul mako. 43 Zeran tawe, lolozi pa pakuruuŋ to tamtamon iliiv pakuruuŋ tau ilam pa Maaron na. aa 

Yesu iparwai saveeŋ tooni pa eval tiina

44 Murei ra, Yesu iburig ve isaav aliiŋa tiina ighe: “Tamtamon tau ighe ighur ilam tsiau, ene ighur ilam tsiau mon mako. I ighur ila to Tamaŋ tau imbaaŋ ghau nalam ne paam. ab 

45 Tamtamon tau ighe ighit ghau, ene ighita Tamaŋ tau imbaaŋ ghau nalam ne paam. 46 Yau nazilam taan to namin ghazooŋa pa tamtamon. Leso tamtamon tisov tau tighur ilam tsiau ne, tileep ila ndoroom loolo muul sov. ac 

47 “Isaav ighe tamtamon eta ilooŋ saveeŋ tsiau, ve itaghoni mako, ene irau nagabiiza ve naghur atuya pani mako. Pasaa, yau nazilam taan to nagabiiz tamtamon to taan ve naghur atuya pazi ne mako. Nalam to nagham mulin zi. ad 

48 Ve alooŋ! Tamtamon tisov tau tizor ghau, ve lolozi pa ghamuuŋ saveeŋ tsiau mako na, saawe to Mboŋ Murei, Maaron pale igabiiz zi itaghon saveeŋ tau yau nasavia na, ve ighur atuya pazi. ae 

49 Pasaa, yau nasavia saveeŋ eta itaghon taug ŋgar tsiau mako. Yau nataghon Tamaŋ tau imbaaŋ ghau nalam ne ŋgar tooni. Saveeŋ tau i tauu ighuru payau to nasavia, tauta nasasavia payam. 50 Ve yau nawatagh: Tutuuŋ tooni tau i ighuru ilam tsiau to navotia, ene imin eez to tamtamon tigham lepoogh poia ila tooni taghon taghon gha ila. Tauvene saveeŋ tau yau nasasavia ne, ene nataghon duduŋai saveeŋ tau Tamaŋ isavia payau.”

Copyright information for `TUCT