Jonah 2

Suŋuuŋ to Yona

Yona ilepleep ila iigh tiina aapo loolo, ve isuŋ pa Maaron tooni Yoova ighe:

“Saawe tau nalepleep ila pataŋani tiina loolo, yau nataŋ rarai Yoova.
Ve i ilooŋ aliŋag ve iuul ghau.
Yoova, yau nalepleep ila nugh to yes mateegha, ve taŋiiz tsiau iŋarui ghom naghe uul ghau.
Ve yo ulooŋ taŋiiz tsiau.

Yo upazalia ghau le nazila
mazavan ta siiŋa kat we.
Ve te itavtav ghau,
ve waŋaar igherev ghau nala nalam,
ve dibom tsio tintiina ipol izala pavog.

Yau nagham ŋgar naghe yo aat uziir ghau pa naghom wa.
Eemon yau naghur ila naghe yau aat naghita rumei tsio patabuyaaŋ muul.

Dibom ipol izala pavog ve itav ghau,
ve waŋaar to te loolo imbeluut ghau.
Ve pon aniiŋa ikaukau dabag.

Yau nazila loloz puughu ta siiŋa we.
Nugh saghati tawe ikis ghau le nagham ŋgar naghe irau nazaa muul mako.
Eemon Maaron tsiau Yoova, yo undai ghau nazaa. Tauta namaat gha nazila mateegha niazi mako,
ve aazne naleep matag iyaryaar.
“Yoova, saawe tau tapirig ighe isov, yau matag iŋgal ghom ve suŋuuŋ tsiau iŋarui ghom.
Ve yo ulepleep ila rumei tsio patabuyaaŋ loolo, ve ulooŋ ghau.
“Yes tau tibesbees pa maaron karomŋa na, tighur murizi pa Maaron poia tooni.
Tauta irau tighita anooŋa eta mako.
“Eemon yau lolog poia pa uleeŋ tsio. Tauvene nambou to napakur ghom, ve nagham watooŋrau payo.
Ve gabua naol isov tau nambu saveeŋ to naghamu, yau aat naghamu.
Yoova, yo mon ta Uleeŋa tsiau.”

10 Ra Yoova isaav pa iigh tiina tawe gha ila iluaar Yona izi nari.

Copyright information for `TUCT