bMt 4:17; Mbaŋ 2:38
cIs 40:3
e2King 1:8
fMbaŋ 22:16
iMt 12:34, 23:33
jMt 7:16; Mbaŋ 26:20
kYo 8:33, 39; Ro 2:28+; Ga 3:7
lMt 7:17+; Lu 13:6+; Yo 15:2, 6; Ro 11:17+
mYo 3:5+; Mbaŋ 1:5, 19:4
nMt 13:30
Mat 3
o[Mk 1:9-11; Lu 3:21-22]
 
pYo 1:32
qMbo 2:7; Is 42:1; Mt 12:18, 17:5

Matthew 3

Ŋeer rughuzaaŋa Yoan igharaat eez pa Yesu Krisi a 

Saawe tau ŋeer rughuzaaŋa Yoan ipaburigin uraat tooni, i ila ivot nugh ŋginaaŋa to Yudea, ve ivovotia Maaron aliiŋa pa tamtamon ighe: “Apul ŋgar tsiam sasaghati ileple, ve atoor ŋgar tsiam imuul ila pa Maaron! Pa malau mako pale pooz to nugh sambam ivot ighazooŋ.” b 

Yoan tawe ta muuŋ propet Isaia isavia saveeŋ siriv iŋaruini ighe:

“Ŋeer ee iboboob izi nugh ŋginaaŋa ighe:
‘Agharaat eez pa Ŋeer Tiina.
Apaduduŋai eez ta naol ne pani le tiduduuŋ.’” c 
Yoan inonogh ghi pa uuli tau tigharaata pa kamel ooro, ve ipuus ŋgaali pa puus tau tigharaata pa ŋgai uuli.
(3:4) Yoan inonogh ghi imin muuŋ propet Ilia inonogh ghi. Gabua tana imin ilaal pani ighe i pale igham uraat siriv imin Ilia.


Ve ighanghan siis, ve ighunghun tok suuru. e 

Eval tiina to Yerusalem, yesŋa nugh naol to Yudea tomania taan sirivu tau igharau yaa Yordan na, tilala tooni izi yaa Yordan. Yes tivovotia sosor toozi ila tooni, ve i irurughuuz zi ta sewe. f 

Zeran tutuuŋa
(3:7) Zeran tutuuŋa, ene Yuda siriv tau tizuari zi kat pa taghoniiŋ tutuuŋ naol isov to Maaron ve tutuuŋ to timbuzŋa paam. Tighe le Yuda tisov tiduduuŋ kat ila Maaron maata. Leso imbaaŋ Mesia ilam, ve igham mulin zi pa pataŋani toozi.


ve Sadusi
(3:7) Sadusi, ene lupuuŋ ee to yes Yuda. Yes tighur ila saveeŋ muŋgaana isov mako. Tighur ila buk liim mon tau Mose ibood zi na. Yes tighe mateegha irau tiburig muul mako. Ve tighe aŋela eta ileep mako, ve avuvu ite paam ileep mako. Sadusi katini timin daaba to yes Israela, ve siriv tigham uraat to watooŋrau paam. Ve tamtamon toozi naol timin kuaz tauŋa.


katini tila tooni paam tighe i irughuuz zi. Eemon Yoan ighit zi, ve isaav pazi ighe: “Yam moot sasaghati natŋa! Sei imbaaŋ payam ighe alam ta sene? Mindai, yam aghe aŋguaaz taumim pa aatyavyav to Maaron tau ighe ivot ne? i 

Isaav ighe onoon yam apul ŋgar tsiam sasaghati ileple ve atoor ŋgar tsiam ila pa Maaron, na atotoi anooŋa tooni popoia siriv ivot gha taghita. j 

Yam aghe Abaram paaghu tooni yam. Eemon anumeer tana sov. Pa yau nasaav payam: Maaron, i irau isaav pa maet tane, ve tiburig timin Abaram paaghu tooni. k 

10 Alooŋ. Nakavasi to Maaron igheen ila ai pughuzi ve isaŋan wa. Ai tisov tau anoŋazi popoia mako, ene aat nakavasi ighan zi tizi, ve tisik zi tizala yav ighan zi. l 

11 Yau narughuuz gham pa yaa imin ilaal payam ighe yam atoor ŋgar tsiam ila pa Maaron wa. Eemon ŋeer ee aat ilam murei payau. I tapiri tiina. Iliiv ghau kat. Uraat sorok imin badooŋ zuzuuŋa to aaghe, ene paam, yau poiag irau to nagham pani mako. I pale igham Avuvu Patabuyaaŋ payam tomania yav. m 

12 Gabua to tiriiŋ wit, ta i ikisi ila niima ve isasaŋan. Pasaa, i pale igabiiz tamtamon, ve ivureer zi imin ŋeer tau ilos wit tooni ve itiri izaa. Leso yaghur ivuvuur wit uuli ilale, ve wit anooŋa timburur tizi. Wit anooŋa tawe, i pale ighur poghania ila ruum to aniiŋ. Eemon wit uuli, i pale ikori ila yav ighani. Yav tawe, irau tirav matini mako. Ighanghan irau saawe.” n 

Yesu igham yaa o 

13 Saawe tana, Yesu ipul taan sirivu to Galilaia, ve ilaagh ila ivot yaa Yordan, leso Yoan irughuuza. 14 Eemon Yoan iyok pani rekia mako. Isaav pani ighe: “Yo ulam tsiau pasaa? Yo urughuuz ghau, o iduduuŋ.”

15 Yesu iyol aliiŋa ighe: “Mako. Aazne, yo aat utaghon imin tau nasaav ne. Pa iit aat tataghon suvinia ŋgar duduuŋa, ve tagham anooŋa tooni ivot, o poia.” Tauvene Yoan ilooŋ Yesu aliiŋa, ve irughuuza. 16 Yesu ipul yaa ve izaa, ve saawe duduuŋ tana, sambam ikaak, ve i ighita Maaron Avuvu izilam imin mbuun, ve izala paavo. p 

17 Ra saveeŋ sambam izilam ighe: “Ŋeer tana, ene yau taug Natug eemon. Yau lolog igheen tooni, ve igham ghau lolog poia kat.” q 

Copyright information for `TUCT