aRo 13:4

Psalms 101

Kinik imbu saveeŋ tomania Maaron

Mbouŋ to David

O Yoova, yau nambou mbouŋ tane to napait ghom.
Pasaa, yo utaghon ŋgar duduuŋa mon.
Ve lolom isaghav tamtamon tsio, ve uluul zi itaghon saveeŋ mbuaaŋ tsio.

Yau naghe le ŋgar tsiau isov iduduuŋ mon ila yo matam.
Tauvene yau aat nataghon ŋgar duduuŋa mon ila ruum tsiau,
ve nagham pooz pa tamtamon tsiau itaghon ŋgar duduuŋa tsio.
Ve ŋeez o ulam uul ghau?

Yau irau nayok pa gabua saghati eta igheen ila naghog mako.
Ve yes tau tisosor pa eez tsio na, yau naghurghur koi pazi ve nazirziir zi tighaughau. Irau tipaak ghau mako.

Yau aat naleep soghan pa ŋgar karom. Ŋgar tauvene, eta irau igheen tsiau mako.
Ve ŋgar saghati tauvene paam, irau matag ila pani mako.

Yes tau tiŋgalŋgal saveeŋ pa zetazŋa imin ŋgozaaŋ na, yau aat navaghamun zi, leso napoon avozi.
Ve yes tau tipakur tauzi tighe ezazi tintiina, ve tivelegh zetazŋa ve titatan zi, ene irau napul zi tileep mako.
Eemon taan tane tamtamona tau avozi onoon ve titaghon eez tsio na, yau nailiil zi naghe tilam tileep tomani ghau.
Ve yes tau laghooŋ toozi iduduuŋ mon, ene pale nagham zi timin besooŋa tsiau, ve tiuul ghau pa uraat.
Eemon zeran karomŋa irau tileep tomani ghau ila ruum tsiau ne mako.
Isaav ighe ŋeer eta aavo karom, ene irau iyooz ila yau naghog mako.

Mboŋoozo ta naol ne, yau aat navaghamunia tamtamon sasaghatizi tisov tau tileep izi taan tane.
Yes tau tighamgham ŋgar saghati, ene aat naziir zi tighau pa Yoova nugh tooni. a 
Copyright information for `TUCT