aMbo 106:45, 111:5
bGnp 15:18, 17:2+, 26:3; Lu 1:54+; Hib 6:14+
cGnp 28:13+, 35:12
dGnp 12:17, 20:3+
eGnp 37:27+, 45:5
fGnp 39:20
gGnp 41:40
hGnp 46:1+
iIgham 1:7
jIgham 3:10, 4:16
kIgham 7:9+
lIgham 10:22
mIgham 7:19+
nIgham 8:2
oIgham 8:17
pIgham 9:23+
qIgham 10:12+
rIgham 12:29
sIgham 12:35
tIgham 13:21
uIgham 16:13+
vIgham 17:6; 1Kor 10:4

Psalms 105

Maaron maata iŋgalŋgal tamtamon tooni Israela

Apait Yoova pa poia tooni, ve avotia eeza tiina.
Asavia ŋgar tau i ighamghamu na irau nugh nugh, leso tiwataghi.

Ambou pani. Ambou ve apakuru.
Avotia uraat tooni ŋgeretazi ta naol ne. Uraat tana, maata ite kat.

Yoova, i eeza patabuyaaŋ. Apaiti toman lolomim poia.
Yes tau tizuari zi pani, ene pale lolozi poia kat ve tintinizi.

Suŋuuŋ tsiam iŋarui Yoova. Leso ipalot gham pa tapiri.
Azuari gham to ala aleep ila naagho irau saawe.

Yam tau avot ila to Maaron besooŋa tooni Abaram,
yam siŋ to Yakop tau Maaron isiigh gham amin i le na,
matamim iŋgal gabua ŋgeretazi ve uraat tintiina tau Yoova ighamgham zi na. Uraat tooni tawe maata ite kat.
Ve matamim iŋgal saawe naol tau i igabiiz tamtamon ve ighur atuya pazi na.
Yoova, i mon ta Maaron toit.
Uraat to gabizooŋ tamtamon ve ghuruuŋ atuya pazi, ene i itotoia irau taan isov.

I monmon maata iŋgalŋgal saveeŋ mbuaaŋ tooni, ve itataghoni.
Tutuuŋ tau Maaron isavia na, pale iyaryaaŋ tauvene, ve anooŋa ivotvot taghon taghon gha ila. a 
Muuŋ, i imbu saveeŋ tomania Abaram ighe yesuru tivalupu zi timin eemon.
Ra ipariaaŋ saveeŋ mbuaaŋ tawe ila to Isak le iyaryaaŋ kat. b 

10 Murei, ra ipariaaŋ saveeŋ tana muul ila to Yakop,
ighe saveeŋ tane aat iyaryaaŋ taghon taghon gha ila.
Ve isaav pa Yakop ighe: “Yau pale nagham taan Kanaan imin lem.
Taan tana pale imin yo yamŋa paaghu tsio lemim motot.” c 
12 Saawe tana, yes eval mako.
Ŋgiira mon. Ve tileep timin loom pa taan tane.

13 Laghooŋ toozi, titaghon ŋgar tauvene: Tileep rig izi nugh ee, mako tiburig muul ve tila tileep izi nugh ite.
Tila tivot nugh to kinik ee ve tileep tomani zi. Le isov, o tipul zi, ve tila tivot to kinik ite, ve tileep tomani zi.

14 Laghooŋ toozi, ene Maaron tauu iŋginŋgini.
I ipul tamtamon to nugh eta titatan zi ve tigham saghatin zi ne mako.
I maata iŋgalŋgal zi, tauta iyaon kinik siriv ighe:
“Yes tau nasiigh zi ve naghur zi timin uraata tsiau na, abugil zi sov!
Pasaa, yes tana, yau naghur zi timin propet tsiau. Tauvene avaghamun zi sov.” d 
16 Murei, ra Yoova igham pitool tiina ivot izi taan Kanaan.
Saawe tana, Yakop tomania natŋa lezi aniiŋ mako kat.

17 Eemon Yoova imbaaŋ toozi ee imuuŋ pazi ila Isip.
Ene Yosep tau tigholia ila gha imin mbesooŋa sorok. e 

18 Yes Isipa tizeeva iloŋ ila ruum to yavyavuuŋ,
ve tikau aaghe pa sen, ve tighur ain liliita ila luua. f 

19 Yoova itovtoov Yosep tauvene, le irau Yosep ivotia gabua siriv pa yes Isipa, le saveeŋ tooni anooŋa ivot.
Tauvene saveeŋ tau Yoova isavia pani, ene ipaghazoŋai Yosep ighe i igham sosor mako, ve ŋgar tooni iduduuŋ.

20 Ra kinik to yes Isipa tau iŋgin nugh naol na, imbaaŋ ila ighe tipul Yosep ivot pa ruum to yavyavuuŋ.

21 Ve ighur Yosep imin daaba to Isip, ve ipuliir ruum tooni tomania gabua tooni naol isov ila i niima, leso iŋgin zi. g 

22 Tauta Yosep imin daaba pa yes tau tighamgham uraat pa kinik na.
I ipaduduuŋ yes tau tiuluul kinik pa ŋgar na, ve ipaghazoŋai zi pa ŋgar poia.

23 Eez tane ta yes Israela tau siŋ to Yakop na tila tivot izi Isip,
ve tileep timin loom ila taan to Ham. h 
24 Yoova ipapalot zi, tauta tivot timin eval, le tapirizi iliiv koiazŋa. i 

25 Ra i itoor ŋgar to yes Isipa, ve tighur koi pa tamtamon tooni.
Tauvene tiil eez to titombaan besooŋa tooni ve tigham saghatin zi.
26 Tauta Yoova imbaaŋ besooŋa tooni ru, Mose gha Aron, leso tiuul yes Israela.
Aron tane, Yoova tauu ighuru to igham uraat tooni. j 

27 Maaron ighe itotoi tapiri pa yes Isipa. Tauta ipalot Mose gha Aron, ve tigham gabua ŋgeretazi naol ve uraat tintiina ila yes Isipa sosozi. Uraat tau ivot izi taan to Ham, ene maata ite kat. k 
28 Yoova igham ndoroom tiina ikau taan to yes Isipa.
Pasaa, yes tizoor aliiŋa, ve tiŋguruut tamtamon tooni. l 

29 Ve i itoor yaa toozi isov imin siŋ,
le iigh tisov timatmaat. m 

30 Ra igham gob ndiŋndiŋ ndiŋndiŋ tivot le taan toozi ivon pazi.
Ruum loolo to kinik tauu, ene ivon pa gob paam. n 

31 Ve Yoova isaav, ve lasom tomania suum katini tivot, le tirau taan to yes Isipa. o 

32 Ve saawe tau uman ighe izi, ene uman izi mako. Yoova igham ais paatu paatu izi le ivaghamunia nugh.
Ve igham nugh ighani milia, ve lalaav iŋgalŋgal gabua irau taan toozi isov. p 

33 Tauta ivaghamunia ai vaen tomania ai fik toozi,
ve iŋgal ai siriv tipolpol paam.

34 Ra isaav, ve siis tivot le katini kat.
Tanin zi, aat tarao mako. q 

35 Ve tighan aniiŋ tau yes Isipa tivazogh zi na raua tomania gabua siriv tau titum ila taan toozi na le isov kat.

36 Murei ra, Yoova iravuur natuzŋa aidabazŋa timataar irau taan toozi isov.
Natuzŋa tau tipoop zi imin maata, tauta tisov. r 
37 Ra Yoova igham yes Israela tipul Isip, ve tivot tila.
Saawe tau tiburig, tighamuur gol to yes Isipa tomania silva toozi, ve tila tomania.
Ve laghooŋ toozi, tilaagh toman tapirizi. Toozi eta tapiri isov ve itap mako. s 

38 Saawe tau yes Israela tipul Isip ve tila, yes Isipa lolozi poia kat.
Pasaa, yes Israela tau timin puughu pa pataŋani tau ivotvot pazi ne. Tauta roiŋ tiina igham zi.
39 Mataaz, Yoova igham taitai ivot gha ipoon aaz maata pa yes Israela.
Ve mboŋ, i igham yav tiina ighan le isul nugh. t 

40 Saawe tau tighasoni pa lezi aniiŋ, i igham man kayau katini tivot, ve igham aniiŋ katini sambam ve izilam pazi.
Tauvene tighamu gha tighan le apozi isuŋ. u 

41 Yoova igham maet ivavaal le aavo ikaak, ve yaa prisia toman tapiri ivot.
Yaa tawe ireer tiina izi nugh ŋginaaŋa tau le yaa mako na. v 

42 Yoova igham gabua naol tana pasaa, maata iŋgalŋgal saveeŋ tooni patabuyaaŋ tau imbua tomania besooŋa tooni Abaram.
43 Tauvene Yoova igherev tamtamon tooni Israel tau i tauu isiigh zi na, gha tipul Isip.
Timboumbou ve tilolool toman lolozi poia ve tila.

44 Murei, ra i igham taan to nugh siriv pazi.
Tauvene nugh tawe uraat toozi anooŋa, imin ruum, uum, ai, ve gabua toozi siriv paam, tauta isov imin yes Israela lezi.
45 Yoova igham tauvene pazi, leso tikis saveeŋ tooni tuŋia,
ve matazi kisin tutuuŋ tooni ve titaghoni.
Aleluia! Tapait Yoova!
Copyright information for `TUCT