aSyg 15:3
bMt 6:31+

Psalms 111

Tapait Maaron pa uraat tooni, ve tataghon tutuuŋ tooni

Aleluia, tapait Yoova!
Isaav ighe zeran duduŋazi tilup zi pa suŋuuŋ,
yau aat nala tomani zi, ve napakur Yoova toman lolog isov.

Pasaa, Yoova ighamgham uraat tintiina.
Tauvene yes tau lolozi pa uraat tooni kat na, tighamgham ŋgar pa uraat tooni irau saawe tighe le tiwatagh katini.

Uraat tooni itotoi ighe i tapiri tiina ve poia kat. Tauta tamtamon titandagh pani.
Ŋgar tooni duduuŋa pale ighengheen tauvene taghon taghon gha ila. a 

I ipaburigin ŋgar toit, leso mataan kisin uraat tooni ŋgeretazi.
I loolo isasaghatin tamtamon tooni, ve ighamgham poghani zi.

Yes tau tiroi pani ve titaghon ŋgar tooni na, i ighamgham lezi aniiŋ.
Ve saveeŋ tau yesŋa tamtamon tooni timbua to tivalupu zi timin eemon na, i maata iŋgalŋgali ve itataghoni irau saawe. b 

Muuŋ, i igham uraat tintiina ila tamtamon tooni matazi, leso itotoi tapiri pazi.
Saawe tana, i igham taan to nugh nugh imin lezi to tileep ila.

Uraat naol tau i igham zi na, ene itotoia ighe i itataghon saveeŋ mbuaaŋ tooni, ve ŋgar tooni iduduuŋ mon.
Tauvene tutuuŋ isov tau i ighur zi na, iit aat taghur ila ve tataghon duduŋai zi.

Tutuuŋ naol tawe pale iyaryaaŋ tauvene taghon taghon gha ila.
Yoova ighur tutuuŋ tawe itaghon saveeŋ mbuaaŋ tooni ve ŋgar duduuŋa.
Muuŋ, i ipas tamtamon tooni tivot pa pataŋani toozi.
Ve saawe tau yesŋa timbu saveeŋ to tivalupu zi timin eemon, aavo iyaryaaŋ pazi ighe titaghon saveeŋ mbuaaŋ toozi tawe ŋgara irau saawe.
I tapiri tiina ve eeza patabuyaaŋ kat. Tauta taroi pani, ve tataghon ŋgar tooni.

10 Ŋgar to taroi pa Yoova ve tataghon ŋgar tooni, ene imin puughu pa ŋgar poia.
Yes tau titaghon saveeŋ tooni na, tiwatagh eez to tigham lepoogh poia.
Tauvene iit aat tapakuru irau saawe!
Copyright information for `TUCT