aMbo 37:21,26; Lu 6:30+
bLu 19:8; Mbaŋ 9:36; 2Kor 9:9

Psalms 112

Poia to Maaron izazaa to yes tau titaghon eez tooni

Aleluia, tapait Yoova!
Ŋeer tau ighe iroi pa Yoova ve itaghon ŋgar tooni,
ve tutuuŋ to Yoova ighamu loolo poia,
ene aat tintini ve poia to Maaron izazaa tooni.

Ve paaghu tooni pale timin zeran tau ezazi tintiina.
Tauvene yes tau tiduduuŋ ila Maaron maata na, tamtamon to taan tane pale titandagh pa paaghu toozi ve poia to Maaron izazaa toozi.

Zeran duduŋazi, ruum toozi ivon kat pa kuaz ve gabua popoia katini.
Ve ŋgar toozi duduuŋa pale igheen ariaaŋ tauvene taghon taghon gha ila.

Isaav ighe ŋeer duduuŋa eta ileep ndoroom tiina loolo, ene pale ghazooŋa to Maaron isulu.
Tamtamon tauvene, loolo isasaghatin tamtamon, ve ighamgham poghani zi, ve itotoi ŋgar duduuŋa pazi.
Tamtamon tau ighe maata reiŋ gabua, ve iyokia gabua tooni pa uleeŋ tamtamon,
ve itaghon ŋgar duduuŋa mon pa uraat tooni, ene pale ileep poia. a 

Tamtamon duduuŋa tauvene, tovaaŋ eta irau ighamu itap ne mako.
Ve tamtamon pale matazi iŋgalŋgali pa ŋgar poia tooni tawe taghon taghon gha ila.

Isaav ighe ilooŋ gabua saghati eta vaaru, i irau iroi mako.
Pasaa, inumeer Yoova ve ghuruuŋ ila tooni iyaryaaŋ kat.

Tauvene roiŋ irau ighamu mako.
Iyozyooz ariaaŋ, le ighita Maaron itatan koiŋa.

I maata iŋgalŋgal yes mbolaaŋa, ve ireirei gabua pazi.
Ŋgar tooni duduuŋa pale igheen ariaaŋ tauvene taghon taghon gha ila.
Tauvene eeza pale imin tiina, ve tamtamon titandagh pani. b 
10 Zeran sasaghati tighita ŋgar tau ivotvot pani na, le atezi yavyav ve tiŋaaŋ maripazi pani.
Eemon irau tigham ŋgar eta pani mako.
Pale saghatiiŋ ivot pazi ve tilalez.
Tauvene gabua popoia tau tighurghur matazi pani na, ene irau ivot pazi mako.
Copyright information for `TUCT