a1Sam 2:8; Lu 1:52

Psalms 113

Maaron, i eeza tiina ve poia puughu

Aleluia, tapait Yoova!
Yam besooŋa to Yoova, apakuru, ve apait eeza.

Apait Yoova pa poia tooni
ta aazne, ve taghon taghon gha ila!

Yam tau aleep ila pa aaz izaa, ve ila pa yam tau aleep ila pa aaz izila, apait Yoova eeza!
Yoova ileep saaŋa kat, ve nughmariŋ tileep ila i saamba.
Eeza ve tapiri iliiv gabua naol isov to sambam.

Sei ta irao Maaron tsiei Yoova? Eta imin i mako.
I ilepleep ila niia to ghamuuŋ pooz tau igheen saaŋa kat.

Tauvene i aat maata izila le izila kat ta siiŋa geeg we, o ighita gabua to sambam saamba ve taan.
Eemon yes tau lezi ezazi mako, ve yes mbolaaŋa tau monmon tilala nugh to sikiiŋ pen ve tiliil lezi aniiŋ na,
i loolo iveghai zi mako.

I ipapakur zi ve iuluul zi, leso tileep poi toman tintinizi.
Tauvene yes irau tileep tomania yes daaba tau tighamgham pooz pa tamtamon. a 

Ve yes zilivaa tau upazi na, i ighamgham lezi niazi popoia to lepoogh,
ve ighamgham lezi natuzŋa.
Tauvene tileep tomania natuzŋa tawe, ve lolozi poia kat.
Aleluia, tapait Yoova!
Copyright information for `TUCT