aMbaŋ 19:26; Syg 9:20
bMbo 135:15+; 1Kor 12:2
cMbo 37:3, 62:8

Psalms 115

Yoova, i Maaron tauu

O Yoova, yei lolomai pa tamtamon tipait ezamai mako.
Tipait yo ezam pa tapirim ve poia tsio, o poi.
Pasaa, lolom isaghav tamtamon tsio ve uluul zi, ve utaghon saveeŋ mbuaaŋ tsio irau saawe.
Tauvene utotoi tapirim ve uul ghei.

Mako pale nugh nugh tivelegh ghom, ve tisaav payei tighe:
“Aa, Maaron tsiam ileep sindei?”

Eemon yei niwatagh: Maaron tsiei, i ileep izi sambam.
Ve saa ŋgar tau i ighe ighamu, ene ighamu mon.
Nugh nugh tighagharaat maaron toozi pa silva ma gol.
Maaron karomŋa tawe, tamtamon tigharaat zi pa nimazi. a 

Yes lezi avozi. Eemon tisavsaav mako.
Ve lezi matazi. Eemon tighita nugh mako.

Yes lezi taliŋazi. Eemon tilooŋ saveeŋ mako.
Ve lezi uzuzi. Eemon tinuŋuz gabua eta vaazi mako.

Yes lezi aghezi. Eemon irau tilaagh mako.
Ve lezi nimazi. Eemon irau tikis gabua eta ve tiyamaana mako.
Onoon kat, saveeŋ ma taŋiiz eta ivot pa avozi mako. b 

Tamtamon tau tighagharaat maaron karomŋa tauvene ve tinumeer zi,
ene tisov timin maaron toozi tawe. Tirau gabua eta mako.
Yam eval tiina to Israel, anumeer Yoova.
Pasaa, i ta Uleeŋa tsiam, ve imin sigheu payam. c 

10 Ve yam to watooŋrau tau avot ila to Aron na paam, anumeer Yoova!
Pasaa, i ta Uleeŋa tsiam, ve imin sigheu payam.

11 Tauvene yam tau aroi pa Yoova ve ataghon ŋgar tooni na, yam asov anumeera.
Pasaa, i ta Uleeŋa tsiam, ve imin sigheu payam.
12 Yoova maata iŋgalŋgal ghei. Ve i pale ighur poia tooni izaa tsiei.
Pale ighur poia tooni izaa to yes to watooŋrau tau tivot ila to Aron na,
ve ighur poia tooni izaa to eval tiina to Israel paam.

13 Tauvene yes tau tiroi pani ve titaghon ŋgar tooni na, i pale ighur poia tooni izaa toozi tisov.
Yes tau lezi ezazi mako, ve yes tau ezazi tintiina na paam.
14 Yoova pale igham gham tomania paaghu tsiam amasa amin naol.

15 Yoova ta ighur sambam ve taan.
I pale ighur poia tooni izaa tsiam.
16 Sambam, ene Yoova nugh tooni.
Ve taan, ene i igham pa iit tamtamon to taleep ila.

17 Yes tau timaat gha tizila mateegha niazi na, eta aavo luutu mako. Tineneeŋ mon.
Irau tipait Yoova muul mako.

18 Eemon iit tau taleep mataan yaryaare, o loloon poia pa Yoova, ve tapaiti pa poia tooni.
Ta aazne, ve taghon taghon gha ila.
Aleluia, tapait Yoova!
Copyright information for `TUCT