Psalms 122

Suŋuuŋ to yes tau tighita Yerusalem ve lolozi poia

Mbouŋ to yes tau tizala Yerusalem pa suŋuuŋ

Mbouŋ to David

Saawe tau tisaav payau tighe: “Uburig ve itiŋa tazala pa Yoova rumei tooni!”
Saveeŋ toozi tawe igham ghau lolog poia kat.
Ve aazne, nilam niloŋ nila Yerusalem loolo, ve niyooz nigharau didiiŋ ariaaŋa tau ilivut Yerusalem na atamana.
Yerusalem, ene nugh paghuuna.
Tigharaata le ivot kat. Gabua naol isov tigheen duduuŋ mon.

Iit tamtamon to Yoova monmon tazazalam sene pa suŋuuŋ.
Rumei rumei to Israela tisov tizazala pa Yerusalem to tipait Yoova eeza pa poia tooni, itaghon tutuuŋ tau i tauu ighuru pazi na.

Pasaa, kinik tsiei tau tivot ila to David na, niazi to ghamuuŋ pooz igheen nugh tane.
Ve tighagharaat pataŋani to tamtamon paam izi ta sene.
Suŋuuŋ tsiam iŋarui Yoova, ve aghasoni to igham tamtamon to Yerusalem tileep poia toman lolozi luuma!
Asuŋ pani aghe: “Yes tau lolozi pa Yerusalem na, upaghau pataŋani pazi. Leso tiroi sov, ve tileep poia mon.

Ve yes tau tileep iloŋ ila didiiŋ ariaaŋa to Yerusalem loolo na, ugham zi tileep poia toman lolozi luuma.
Ve kinik tomania yes uraata tau tileep ila ruum tooni na paam. Upoon zi pa pataŋani naol isov. Leso tiroi sov, ve tileep poia mon.”
Yau matag iŋgal toŋvetaz tsiau ve zetagŋa.
Tauta nasaav pa nugh tiina Yerusalem naghe: “Maaron pale igham ghom uleep poia toman lolom luuma.”

Ve nagham ŋgar pa Maaron toit Yoova rumei tooni paam.
Tauta suŋuuŋ tsiau iŋaruini naghe i tauu aat igham gabua naol isov ivot poia mon payo.
Copyright information for `TUCT