aMbaŋ 7:46
c1Sam 7:1-2
eMbaŋ 2:30
fMbo 148:14; Lu 1:69

Psalms 132

Yes Israela matazi iŋgal saawe tau Maaron isiigh David to imin kinik pazi, ve igham loloz Zion imin niia to lepoogh

Mbouŋ to yes tau tizala Yerusalem pa suŋuuŋ

O Yoova, matam iŋgal David pa pataŋani naol tau i ibadbaad zi na.
Muuŋ, David imbu saveeŋ ariaaŋa tomania Yoova tau Maaron saksaki to Yakop na.
Ve ipariaaŋ saveeŋ tawe le iyaryaaŋ kat.

Ighe: “Yau irau naloŋ nala ruum tsiau,
ve nala niag to ghenooŋ soone.

Irau namariau, ve nagheen lolog iveegh soone.

Le irau nandeeŋ nugh eta pa Yoova.
Ŋgar tsiau iyaryaaŋ kat naghe nail nugh eta, leso imin Maaron saksaki to Yakop niia to lepoogh, o ateg izi!” a 
Saawe tau yei nileep izi taan sirivu to Eprata
(132:6) Eprata, ene nugh Betelem eeza ite.

yei nilooŋ Bokis to Saveeŋ Mbuaaŋ vaaru.

Tauvene nila le nighita igheen igharau nugh Yar. c 

Murei ra, tisakia ila Yerusalem. Tauvene nisaav nighe: “Taburig tala pa Maaron niia to lepoogh ta Yerusalem we.
Tala tagharau niia to ghamuuŋ pooz, ve taput agheen pani, ve tapakuru.”
O Yoova, uburig toman Bokis to Saveeŋ Mbuaaŋ, ve ula pa niam to mariaoŋ.
Bokis tawe ta imin ilaal pa tapirim.
(132:8) Yes Israela tighita Bokis to Saveeŋ Mbuaaŋ tighe ene Maaron niia to ghamuuŋ pooz. Saawe tau David imin kinik, igham bokis tawe, ve ighuru igheen izi Yerusalem (2Sam 6). Solomon irau Rumei Tiina le isov, ra pai siriv tau yes Yuda tilup zi pa suŋuuŋ, tigham Bokis tawe ivot pa Rumei Tiina, ve tilaagh tomania itaghon nugh Yerusalem loolo, ve timbou mbouŋ tane. Le isov, mako tighuru imuul iloŋ ila rumei loolo.

Yei nighe ŋgar duduuŋa igheen ariaaŋ ila to zeran tsio to watooŋrau, imin nonoghiiŋa tau monmon tinonogh zi pani.
Ve yes tau lolozi isaghav ghom ariaaŋ ve titaghon eez tsio na, nighe tiyoor ezam toman lolozi poia.
10 O Yoova, matam iŋgal besooŋa tsio David.
I ndaamo payei, tauta nighe ulooŋ suŋuuŋ tsiei tane. Paaghu tooni tau yo ughuru imin kinik payei na, ughur murim pani sov.
11 Muuŋ, Yoova imbu saveeŋ ariaaŋa tomania David, ve ipariaaŋa le iyaryaaŋ kat.
Tauvene irau ireua mako. Isaav ighe:
“Yau aat naghur paaghu tsio eta imin kinik, leso igham niam, ve ileep ila niam to ghamuuŋ pooz. e 

12 Ve isaav ighe paaghu tsio matazi kisin saveeŋ mbuaaŋ tsiau ve titaghon tutuuŋ tsiau,
ene pale naghur paaghu toozi paam timin kinik, ve tileep ila niam to ghamuuŋ pooz ta aazne, ve taghon taghon gha ila.
Tutuuŋ tana, yau taug pale napaghazoŋai ŋgara pazi.”
13 Yoova isiigh nugh Zion, ve ighamu imin le wa.
Nugh tane, ta i loolo pani ighe ileep ila.

14 Tauta i isaav ighe: “Nugh tane pale imin niag to lepoogh irau saawe.
Niag to ghamuuŋ pooz aat igheen ta sene. Pasaa, lolog pa nugh tane kat.”

15 Yau aat nagham poghania yes to Zion, ve poia tsiau tiina izaa toozi. Leso tirau kat pa gabua naol.
Ve nagham aniiŋ pa yes mbolaaŋa toozi, ve tighan le apozi isuŋ.

16 Ve yes to watooŋrau tau tileep izi Zion na, yau aat napalot zi pa uraat toozi. Leso timin eez pa uleeŋ tsiau ila pa tamtamon.
Tauvene tamtamon to Zion tau lolozi isaghav ghau ariaaŋ ve titaghon eez tsiau na, pale lolozi poia ve tiyoor ezag toman aliŋazi tiina.
17 Paaghu to David tau naghuru imin kinik ve ileep izi nugh tane na, yau aat nagham eeza ve tapiri ivot imin tiina.
Kinik tau yau taug nasiigho ve naghuru pa uraat na, yau aat napalot paaghu tooni,
ve tigham pooz taghon taghon gha ila, imin lam tau iyaryaar irau saawe. f 

18 Yau pale natatan kinik koiŋa, ve monmon tilepleep toman mayazi.
Eemon yes tau tilepleep ila i saamba na, yau aat napalot zi, ve nagham zi tileep poia kat. Leso lepoogh toozi poia tawe imin pabodeeŋ kinik.
Copyright information for `TUCT