aMbo 113:7+; Lu 1:52, 14:11
bPil 1:6

Psalms 138

Suŋuuŋ to ŋeer tau loolo poia pa uleeŋ to Maaron

Mbouŋ to David

O Yoova, yau lolog poia payo, ve napait ghom toman lolog.
Isaav ighe nambou mbouŋ to napakur ghom, ve zimaronŋa siriv tighit ghau, ene poia!

Naghog iŋarui rumei tsio patabuyaaŋ, ve naput agheg payo.
Yau napait ezam pa poia tsio toman lolog poia.
Pasaa, yo lolom isaghav tamtamon tsio, ve uluul zi, ve utataghon saveeŋ mbuaaŋ tsio irau saawe.
Yo upait ezam tomania saveeŋ tsio iliiv gabua naol isov.

Saawe tau nataŋ rarai ghom pa uleeŋ, yo ulooŋ suŋuuŋ tsiau,
ve ugham tapirig ivot muul ve nayooz ariaaŋ.
O Yoova, saveeŋ tau ivot ila avom na, kinik to taan tilooŋa wa.
Tauvene pale tisov lolozi poia payo, ve tipait ghom.

Pale timbou ve tipait ghom pa ŋgar tau yo ughamghamu na,
ve tighe: “Yoova eeza tiina kat pa tapiri ve poia tooni.”

Ene onoon. Yoova eeza tiina, ve ileep saaŋa kat. Eemon yes tau lezi ezazi mako na, i maata pazi ve iuluul zi.
Ve yes tau tiveleghi ve tipapait tauzi ezazi na, irau tiyooŋ pani mako. I iwataghiir zi wa. Pasaa, i maata malaua. a 
Isaav ighe pataŋani naol ilivut ghau, yo aat uul ghau naleep poi.
Isaav ighe koiagŋa atezi yavyav payau kat, ve tighe tivaghamun ghau,
ene nimam tapir pale irav zi, ve ugham mulin ghau ila nimazi.

O Yoova, saa ŋgar tau lolom ughe ivot payau, ene aat ivot itaghon ŋgar tsio.
Pasaa, yo lolom isaghav tamtamon tsio, ve uluul zi irau saawe.
Tauvene ughur murim payau sov. Pasaa yau ene, yo nimam muuri. b 
Copyright information for `TUCT