aMbo 18:34
bMbo 8:4; Hib 2:6
cYems 4:14
dMbo 33:12

Psalms 144

Kinik to yes Israela ighason Maaron to iuule leso iliiv malmal

Mbouŋ to David

Yau napait Yoova pa poia tooni. I Uleeŋa tsiau ariaaŋa tau iponpoon ghau imin maet tiina.
I itotoi ghau pa eez to ghamuuŋ malmal, ve igham nimag mamaan pa paravuuz. a 

I loolo isaghav ghau ve iuluul ghau.
I imin ruum ariaaŋa to nayooŋ iloŋ ila loolo, ve iponpoon ghau imin maetaaz tau izala kat.
Ve ighamgham mulin ghau ila koiagŋa nimazi, ve imin sigheu payau, leso nayooŋ ila tooni.
I itatan tamtamon to nugh nugh, tauta tileep ila yau sambag.
Yei tamtamon to taan, nimin saa kaut poia, ta matam iŋgalŋgal ghei?
Ve mindai ta ughamgham ŋgar tiina payei? b 

Yei tamtamon, lepoogh tsiei to taan, ene imin yaghur. Nileep rig, ve nisov.
Lepoogh tsiei, ene tuuku imin ai yavyaava tau ighe aaz izila, ene irau tighita muul mako. c 

O Yoova, ukaak sambam saamba ve uzilam.
Utut loloz, ve ugham yav iburig tomania mbuasa.

Ugham lalaav iŋgal koiagŋa ve ireu zi.
Uvaneghia paneegh tsio natŋa iŋarui zi, leso tighau tila.

Pataŋani tau aazne igham ghau ne, ene imin yaa ivot toman tapiri ve ighe izugh ghau gha nalaleg.
Tauvene uzuzuun nimam izi, ve undai ghau nazaa.
Uul ghau, ve ugham mulin ghau ila nugh nugh tau tighur koi payau ne nimazi.

Zeran tawe, avozi karom.
Yes tiit nimazi tapir izaa, ve tipariaaŋ saveeŋ mbuaaŋ toozi tighe: “Onoon sambam.”
Eemon titaghon saveeŋ toozi mako.
O Maaron, yau aat nambou mbouŋ paaghu payo.
Pale narav gita, ve nambou to napait ghom.

10 Pasaa, yo uluul yes kinik to yei Israela. Tauta tiliiv pa malmal.
Muuŋ, yo ugham mulin besooŋa tsio David.

11 Upaghau mbuzaagh maata payau, ve ugham mulin ghau ila yes nugh nugh tau tighur koi payau ne nimazi.
Zeran tawe, avozi karom.
Yes tiit nimazi tapir izaa ve tipariaaŋ saveeŋ mbuaaŋ toozi tighe: “Onoon sambam.”
Eemon titaghon saveeŋ toozi mako.
12 Maaron, ughur poia tsio izaa tsiei. Leso natmaiŋa paghpaaghu titum poi imin ai tau itum poi izaa izaa le imin tiina kat.
Ve ugham natmailivaŋa paghunazi kat imin rir to kinik ruum tooni tau ŋgeretazi popoia na.

13 Ugham aniiŋ katini ivot ila uum tsiei, leso ruum tsiei to ghuruuŋ aniiŋ tivon pa aniiŋ maata maata.
Ve ugham sipsip ve mekmek tsiei timasa timin ndiŋndiŋ ndiŋndiŋ.

14 Ve makau tsiei paam. Moroghooŋ eta igham zi sov.
Ugham zi titum poi ve tipoop poia, leso timin naol.
Uŋgin nugh tsiei.
Leso tamtamon tireu sirsiir tsiei, ve tiŋguaaz tamtamon tsiei sov.
Ve nilooŋ taŋiiz eta izi maaran tsiei sov.

15 Tamtamon tau ighe ŋgar tauvene ivot pazi, ene pale lolozi poia kat.
Tauvene yes tau Maaron toozi Yoova na, pale lolozi poia. Pasaa, poia tooni tauvene pale izazaa toozi. d 
Copyright information for `TUCT