aMbo 34:18; 2Kor 1:3+
bRo 11:33
cLu 1:52
dMt 6:26; Lu 12:24

Psalms 147

Tapait Maaron pa poia tooni

Aleluia, tapait Yoova!
Onoon kat. Isaav ighe tambou pa Maaron toit ve tapakuru, ene poia kat.
Pa ŋgar tauvene, ene iduduuŋ, ve igham ghiit loloon poia.
Yoova ighamgham uraat to igharaat mulin Yerusalem.
Ve yes Israela tau koiazŋa tigham zi tila tileep irau nugh nugh na, i iyauyau zi timuul tilam.

Tamtamon tau pataŋani ivot pazi le ireu lolozi kat, na i iravrav atezi,
ve igharaat pataŋani toozi leso lolozi poia. a 

Muuŋ geeg, loolo ighur pa pitum piiz tau pale ighur zi tivot.
Ve i tauu iwaat pitum eŋaeŋa ezazi le tisov.

Tiina toit, i saksaki ve eeza tiina.
Ve ŋgar tooni tauvene paam, ene tiina le tiina kat. Ighe tail puughu, ene aat tarao mako. b 

Yes tau titatan tauzi ve tibadbaad pataŋani na, Yoova iuluul zi leso tileep poia.
Eemon zeran sasaghati, i itatan zi ve ivaghaaz zi tizila taan. c 
Ambou toman tintinmim, ve apait Yoova pa poia tooni.
Arav gita, ve apakur Maaron toit.

I igham taitai itav sambam saamba,
ve igham uman izi to ipabees taan,
ve igham kikiliiŋ itum izala loloz.

I ipanpan gabua maata maata to su.
Isaav ighe man kool natŋa titaŋ pa aniiŋ, ene i ta igham aniiŋ pazi. d 
10 Tamtamon lolozi poia ve tinumeer hos tau bide tapirizi, ve yes zaaba tau tiyooz ariaaŋ pa malmal.
Eemon gabua tauvene irau igham Yoova loolo poia ve tintini ne mako.

11 Tamtamon tau tiroi pani ve titaghon ŋgar tooni, tauta tighamu loolo poia.
I tintini pa yes tau tinumeera tighe i loolo isaghav tamtamon tooni ve iuul zi.
12 Yam Yerusalema, apakur Yoova!
Yam tamtamon to Zion, apait Maaron tsiam.

13 Pasaa, ataman to didiiŋ tau ilivut nugh tsiam na, i ipariaaŋ zi le tuŋia.
Ve ighurghur poia tooni izazaa tsiam.

14 I iŋginŋgin nugh tsiam, tauta aleep poia.
Ve ighamgham lemim aniiŋ wit tau popoia kat. Tauta aghan le isooŋ gham.
15 Isaav ighe i loolo pa gabua eta ivot izi taan, ene aliiŋa izilam ve gabua tana ivot.
Saveeŋ tooni ilaan ve igham uraat rekia mon.

16 I igham naghavghavu izi ikau nugh le ipisosooŋ imin sipsip ooro.
Ve igham uwam izi le itav taan imin avav.

17 I igham ais paatu paatu titaptap tizi taan.
Isaav ighe i igham nugh iyauŋ kat, sei ta pale ileep muuri? Eta mako.

18 Ra isaav, ve ais tawe ireer muul itaghon i aliiŋa.
I igham yaghur tooni tuntunu ilaan, ve yaa tireer muul.
19 Muuŋ, i ivotia saveeŋ tooni ila to Yakop,
ve ipaghazoŋai yes Israela pa tutuuŋ tooni tomania eez tooni to gabizooŋ gabua.

20 I igham ŋgar tana pa nugh ite paam mako.
Tauta tikankaan pa tutuuŋ tooni ŋgara.
Aleluia, tapait Yoova!
Copyright information for `TUCT