aLu 2:13+

Psalms 148

Gabua naol isov aat tipait Maaron eeza

Aleluia, tapait Yoova!
Yam to sambam, apait Yoova!
Yam tau aleep saaŋa kat na, apaiti!

Yam aŋela tooni asov apaiti!
Ve yam zaaba to sambam paam, asov apaiti! a 

Aaz ve kaiyo, apaiti!
Ve yam pitum tau araŋ ila sambam saamba na paam, apaiti.

Sambam tau igheen saaŋa le saaŋa kat na, upaiti!
Ve yaa tau igheen izala saaŋa na paam, upaiti!

Gabua tawe tisov tipait Yoova eeza, o poia.
Pasaa i isaav, ve yes tivot itaghon i tauu aliiŋa.

I ighur zi tigheen ila niazi niazi, leso tigheen ta sewe taghon taghon gha ila.
Saveeŋ tau i isavia iŋarui zi na, ene igheen pataghaaŋ. Irau tizoora mako.
Yam gabua tau aleep izi taan na, apait Yoova!
Ve yam gabua to te loolo tau tapirimim tintiina ve aleep mazavan na paam, apaiti!

Lalaav waaro, tomania ais, naghavghavu, uwam,
ve yaghur tiini tau avotvot itaghon Yoova aliiŋa na, yam asov apaiti!

Yam loloz ve nugh mbua, ve yam wal tau anoŋamim popoia, ve ai to su paam, asov apaiti!

10 Ve yam ŋgai to nughei, ve gabua sagsagŋa to su,
gabua tau akakarau ila taan, ve man tau arovroov na, apaiti!
11 Yam kinik, pooza, ve daaba, tomania yam tamtamon to nughmariŋ, asov apait Yoova!

12 Yam zitamoot ve zilivaa paghpaaghu, tomania zikooŋa ve yam geegeu paam, apaiti!

13 Yam asov aat apait Yoova eeza.
Pa i mon ta eeza tiina le tiina kat iliiv gabua naol isov.
Pooz tooni tomania tapiri ve poia tooni iliiv gabua naol isov to sambam ve taan.
14 I ipalot tamtamon tooni, tauta aazne tiyooz ariaaŋ.
Tamtamon tooni tau lolozi isaghavu ariaaŋ ve titaghon eez tooni na, i ipakur zi ve igham varuzi imin tiina.
Pa i loolo igheen kat to yes Israela.
Aleluia, tapait Yoova!
Copyright information for `TUCT