aEp 6:17; Hib 4:12; Syg 1:16

Psalms 149

Tamtamon to Maaron tipait eeza

Aleluia, tapait Yoova!
Ambou mbouŋ paaghu pa Yoova.
Yam tau lolomim isaghavu ariaaŋ ve ataghon eez tooni na, alup gham pa suŋuuŋ, ve apaiti!

Yam Israela, lolomim poia pani. Pa i ta ighur gham.
Yam tamtamon to Zion, tintinmim pa kinik tsiam.

Ator ve apait Yoova eeza.
Atok kakaap, ve arav gita to apakuru.
Pa Yoova tintini kat pa tamtamon tooni.
Yes tau titatan tauzi ve tinumeera na, i ipapakur zi, ve ighamgham mulin zi pa pataŋani toozi.

I igham zi tiliiv koiazŋa. Tauvene yes tau lolozi isaghav Yoova ve titaghon ŋgar tooni na, lolozi poia ve tintinizi.
Saawe tau tigheen ila niazi to ghenooŋ, timboumbou ve tipapaiti.

Yes tipapait Maaron eeza izala kat. Paitooŋ toozi ighengheen ila avozi irau saawe.
Ve tikis mbuzaagh maata ru ila nimazi. a 

Leso tighur atuya pa nugh nugh tau tighamgham sosor ila Maaron maata na, ve tiyat ŋgar toozi saghati.

Pale tikis kinik to nugh nugh tomania pooza toozi,
ve tikau zi pa sen ariaŋazi.

Leso tighur atuya pazi itaghon saveeŋ tau tiboode pataghaaŋ na.
Ene eez tau Yoova ipakur yes tau lolozi isaghavu ve titaghon ŋgar tooni.
Aleluia, tapait Yoova!
Copyright information for `TUCT