aMbo 139:1
bMbo 11:7; Yo 17:24; 1Kor 13:12; 1Yo 3:2

Psalms 17

Ŋeer duduuŋa ee itaŋ rarai Maaron ighe iuule

Mbouŋ to David

O Yoova, ulooŋ taŋiiz tsiau tane, ve uul ghau.
Upaghazoŋai ghau ila tamtamon matazi ughe yau ŋeer duduŋag. Leso tiwatagh tighe yau nagham sosor eta mako.
Yau nasuŋ ghom ila avog uuli mon mako. Nasuŋ ghom toman lolog. Tauvene ughur taliŋam pa suŋuuŋ tsiau tane, ve uul ghau.

Yo ughita gabua naol isov, ve yo uwatagh ughe yau nataghon ŋgar tau iduduuŋ ila yo matam.
Tauvene uvool tsiau ve upaghazoŋai ghau ila tamtamon matazi ughe yau nagham sosor eta mako.
Yo ugabiiz poghani ghau, ve utoov ghau. Ve ulam utiir ghau pa mboŋ paam. Tauta uwatagh katin lolog.
Yo ugabiiz katin ghau, ve ughita ŋgar saghati eta igheen ila lolog mako.
Pa ŋgar tsiau iyaryaaŋ naghe avog igham sosor eta sov. a 

Yau nataghon ŋgar tau zeran siriv tighamghamu ne mako. Pasaa, matag kisin saveeŋ tsio.
Tauvene zeran sasaghati tau tighamgham malmal na, yau napaghau taug pa eez toozi.

Saawe isov, nataghon eez tsio mon.
Agheg isapir pani rigta mako.
O Maaron, yau nawatagh: Saawe isov, yo uloŋlooŋ suŋuuŋ tsiau. Tauvene nataŋ rarai ghom naghe uul ghau.
Ughur taliŋam payau, ve ulooŋ aliŋag tane.

Yo lolom isaghav tamtamon tsio ariaaŋ ve uluul zi.
Tauvene ugham uraat ŋgeretazi tintiina to uul ghau.
Yes tau tiyooŋ ilat tsio na, nimam tapir aat igham mulin zi ila koiazŋa nimazi, ve tileep poi.
Uŋgin poghani ghau imin yo uŋgin taum matam.
Upoon ghau imin tatareek ipagud natŋa.

Pa zeran sasaghati tizuari zi tighe tivaghamun ghau.
Koiagŋa tilivutin ghau, ve tighe tirav ghau namaat.
10 Lolozi isaghatin tamtamon mako.
Ve tipapait tauzi ezazi toman aliŋazi tiina.

11 Yes titaghon ghau tilam gha tilivutin ghau wa.
Ve tidaad matazi payau tighe tisik ghau nazi taan.

12 Yes timin laion tau pitoola ve ighe iraŋgat gabua leso ighani.
Yes timin laion paaghu tau iyooŋ ila su loolo ve isasaŋan.
13 Yoova, uburig urav koiagŋa lak! Uyooz umin sigheu payau, upoon zi, ve utatan tapirizi.
Ukas zi pa mbuzaagh tsio, ve ugham mulin ghau pa zeran sasaghati tane. Leso naleep poi.

14 Zeran tawe tigham ŋgar tighe gabua to taan, ene gabua tauu.
Utotoi nimam pazi, ve ugham mulin ghau ila nimazi.
Atuya tau yo ughe ugham pazi na, upasovu pataghaaŋ. Leso tiyamaana kat!
Ve ugham tauvene pa natuzŋa ve iseeŋga ila izaa to timbuzŋa paam.
15 Eemon yau ŋeer duduŋag. Tauvene yau aat naghita naghom.
Saawe tau naburig, yau aat naleep ila yo naghom, ve nayamaan naghe: Aa, gabua ta nazuari ghau pani, tauta naghamu wa! b 
Copyright information for `TUCT