aMbo 89:5+, 97:6; Ro 1:19+
bRo 10:18
cMbo 119:104; 2Tim 3:15
dMbo 119:105,130; 2Pe 1:19
eMbo 119:72, 103
fYo 14:21+; 1Tim 4:8

Psalms 19

Gabua tau Maaron ighur zi na titotoi ghiit tighe i eeza tiina

Mbouŋ to David

Gabua naol isov tau tighenaar ila sambam saamba na titotoi ghiit tighe Maaron eeza tiina.
Gabua ta saaŋa we, ene i niima muuri.
Tauta titotoi Maaron tapiri tomania ŋgar ve poia tooni pait. a 

Mataaz ta naol ne, tisavsaav pait.
Ve mboŋ ta naol ne, tipaghazoŋai ghiit pa ŋgar tooni.

Yes lezi avozi to tisavsaav mako.
Irau talooŋ avozi luutu mako.

Eemon aliŋazi ila irau taan isov.
Saveeŋ toozi ila irau taan ziige ta naol ne. b 
Maaron ighur aaz le niia ila sambam saamba to igheen pani.

Aaz pisikia izaa imin ŋeer tau ivai paaghu, ve ipul ruum tooni ve ivot toman tintini.
Ve imin tamtamon to landooŋ tau igharaat ghi to ilaan toman loolo poia.

Aaz izaa pa taan ziige ee,
ve imalaaŋ ila izi pa ziige ite.
Ve gabua eta irau iyooŋ pa maata ne mako.

Saveeŋ to Maaron ene poia kat ve ipaghazoŋai ghiit pa ŋgar tooni

Saveeŋ isov tau Yoova igham pait, ene poia kat ve iduduuŋ mon.
Ve ipariaaŋ ghiit ve igham tapiriin ivot muul.
Eez tau Yoova ighuru pa tamtamon tooni na, igheen tuŋia tauvene. Irau itoora muul mako.
Ve ipaghazoŋai yes tau lezi ŋgar tiina mako na, le ŋgar toozi ivot. c 

Tutuuŋ naol tau Yoova ighur zi pait, ene duduŋazi mon, ve tigham ghiit loloon poia kat.
Tutuuŋ to Yoova imin ghazooŋa pait, ve igham ghiit taghilaal. d 

Ŋgar to taroi pa Yoova ve tataghon ŋgar tooni, ene poia.
Ŋgar tauvene, ene iŋgalaaŋ ila i maata, ve igheen tauvene taghon taghon gha ila.
Ve gabizooŋ to Yoova, ene iduduuŋ ve onoon mon.

10 Tamtamon tighita maet gol tighe ene gabua tiina, ve lolozi pani.
Eemon Yoova saveeŋ tooni iliiv kat pa gol katini tau ŋgalaŋazi na.
Ve tok suuru tauvene paam, poia ve imonmoon ila avoon.
Eemon Yoova saveeŋ tooni, ene poia kat le iliiv tok suuru. e 
11 Yoova, yau besooŋa tsio. Saveeŋ tsio ipaghau ghau pa pataŋani naol.
Yes tau titaghon saveeŋ tsio, ene aat tigham lezi atuya tiina. f 

12 Sei irau ighilaal sosor tooni isov? Mako.
O Yoova, sosor naol tau naghilaal zi mako ve nagham zi na, lolom isaghatin ghau ve upul zi.

13 Yau besooŋa tsio. Sosor tau naghilaal zi na, upaghau ghau pazi.
Pa lolog pa ŋgar tauvene igham pooz payau mako.
Leso nagham sosor tiina eta sov, ve ŋgar tsiau iduduuŋ ila yo matam.
14 Tauvene yau naghe le saveeŋ tau ivot ila avog, ve ŋgar tau igheen ila lolog ne, isov iduduuŋ ila yo matam, ve igham ghom lolom poia.
O Yoova, yo Uleeŋa tsiau ve uponpoon ghau imin maet tiina.
Copyright information for `TUCT