aMbaŋ 4:25+
bMbaŋ 13:33; Hib 1:5, 5:5
cSyg 2:27, 12:5, 19:15
dPil 2:9+
eMbo 34:8, 84:12

Psalms 2

Maaron i isiigh tamtamon tooni imin kinik

Puughu mindai ta nugh nugh timbu saveeŋ tighe tipaburigin malmal?
Tamtamon tiliil eez to tigham taliiŋzizi pasaa? Ŋgar toozi tawe, tighamu sorok. Irau ighur mako. a 

Yes kinik to taan tigham aghezi tighe tigham malmal.
Ve yes pooza tilup zi, ve tiil eez to tizoor Yoova ŋgar tooni ve titatan ŋeer tau i ighuru imin kinik.

Yes tighe: “Aiyo! Takuup ravraav tomania sen toozi tau tikau ghiit pani ne, ve tasik zi tila.
Leso tiŋgin ghiit muul sov.”
Eemon Yoova, i ileep ila niia to ghamuuŋ pooz izi nugh sambam, ve iŋiŋ pazi.
Ve maata veleghin ŋgar toozi.

Ra isaav ariaaŋ pazi toman aate yavyav,
ve iparoi zi toman naagho isaghat.

Ighe: “Yau naghur tamtamon tsiau ee igham naghog ve imin kinik.
I ileep izi loloz tsiau patabuyaaŋ Zion, ve ighamgham pooz.”
Kinik to iit Israela isaav tauvene: “Yau aat navotia saveeŋ tau Yoova imbua tomani ghau. I isaav payau ighe:
‘Yau natug yo. Yo tamam ta yau. Aazne, yau naghur ghom pa uraat. b 

Ughason ghau, o yau nagham nughmariŋ timin lem.
Tamtamon tau tileep irau taan ziige ta naol ne pale timin lem, ve uŋgin zi.

Pooz tsio pale ariaaŋa kat, imin titi to kinik tau tigharaata pa ain na.
Yo aat urav matin kinik tisov tapirizi, imin uur tau tiravu le imbiriis ŋanŋania.’” c 
10 Tauvene, yam kinik asov agham ŋgar poi.
Ve yam pooza to taan, alooŋ saveeŋ ve ayamaan gham.

11 Aroi pa Yoova ve abees pani.
Atandagh pani ve apaiti toman tintinmim.

12 Aput aghemim pa Naatu, ve aleep ila i saamba. d 
Mako pale Maaron aate yavyav payam, ve iburig ireu gham gha asov alalemim.
Pasaa, i aate tuuku.
Eemon yes tau tiyooŋ ila tooni na, poia tooni pale izaa toozi, ve tileep toman tintinizi. e 
Copyright information for `TUCT