aMbo 10:1; Mk 15:34
bIs 53:3
cMt 27:39; Mk 15:29
dMt 27:43
eMbo 71:6; Ga 1:15
fLu 23:33; Yo 19:18
gMt 27:35; Yo 19:24
hHib 2:12
iMbo 2:8; Syg 5:9-13, 7:9

Psalms 22

Suŋuuŋ to ŋeer ee tau ileep ila pataŋani tiina loolo ve igham ŋgar ighe Maaron ighur muuri pani

Mbouŋ to David

Maaron tsiau, Maaron tsiau, puughu mindai ta ughur murim payau?
Pataŋani tsiau igham ghau nataŋ tiina. Puughu mindai ta yo uul ghau mako, ve uleep soghan payau? a 

Maaron tsiau, mataaz ta naol ne, nataŋ rarai ghom. Eemon yo usavia leg saveeŋ eta mako.
Ve mboŋ tauvene paam. Namariau mako. Nanoknok taŋiiz.
Eemon Maaron, yau nawatagh: Yo patabuyaaŋ.
Yo uleep ila niam to ghamuuŋ pooz, ve yes Israela tipapait ghom.

Muuŋ ve ilam, timbumaiŋa tinumeer ghom.
Yes tighur ilat tsio, ve yo upas zi tivot pa pataŋani toozi.
Saawe tau titaŋ rarai ghom, yo ugham mulin zi pa pataŋani toozi.
Yes tinumeer ghom, ve yo uul zi. Tauvene tighur matazi payo sorok mako.
Eemon yau, tamtamon tighit ghau tighe yau tamtamon mako.
Matazi tatanin ghau, ve tivelegh ghau tighe yau kaut sorok imin motmoot to taan lolo. b 

Tamtamon tisov tau tighit ghau ne, titurun luazi payau ve tighe: ‘Aa, ughita wa?”
Ve tiŋiŋ payau, ve tisik saveeŋ veleghiiŋ naol payau. c 

Tisavsaav payau tighe: “Yo ughe unumeer Yoova?
Poia. Ighe tauvene, o taleep ve taghita. Isaav ighe i loolo payo kat, i aat iuul ghom, ve igham mulin ghom pa pataŋani tsio.” d 
Eemon Yoova, yo ta ughur ghau navot poi ila tinaŋ aapo.
Ve saawe tau naghunghun tuz, yo urarar payau poi. e 

10 Saawe tau tinaŋ ipoop ghau, tighur ghau nalat namin yo lem, leso uŋgin ghau.
Tauta saawe tawe ve ilam, yau nanumeer ghom naghe yo Maaron tsiau.
11 Tauvene uleep soghan payau sov.
Pa aazne, pataŋani tiina ighe ivot payau.
Ve leg tamtamon eta to iuul ghau mako.
12 Ughita. Koiagŋa katini tilam tilivutin ghau.
Tapirizi tiina imin makau zitamoot to Basan tau bide tapirizi na.

13 Yes timin laion tau tikakaak avozi ve livozi imasis ilam payau.
Ve lolozi ŋuria tighe tiraŋgat ghau ve tighan ghau.

14 Tauvene tapirig isov kat, imin yaa tau igheen ila uur loolo ve tiliŋi ilale.
Tuag tisov goloŋia. Tauvene nayamaan taug naghe irau nagham gabua eta mako.
Ve roiŋ tiina igham ghau ve lolog imin waar mbuaaŋ. Naghe paita namaat tane.

15 Ŋgarsuag igorgor kat.
Yo upul ghau ve nagheen ila ŋgaupup loolo ve naghe paita namaat tane.
16 Koiagŋa katini tilam tilivutin ghau imin ŋgavuun umbaal
ve tivaraŋgatin agheg ma nimag. f 

17 Ve tuag isov peria.
Tauvene koiagŋa tiyooz ve timarar ghau, ve lolozi poia kat.
Pasaa, nasaghat wa.

18 Yes tighe pa namaat wa. Tauta tighe tivalagh nonoghiiŋa tsiau tomania gabua tsiau siriv irau zi.
Tauvene tipayooz mbuur, leso tighita sei ta pale igham saa gabua. g 
19 Yoova, uleep soghan payau sov.
Uleeŋa tsiau, ulam rekia ve uul ghau!

20 Upoon ghau pa mbuzaagh to mateegh.
Upaghau ghau pa ŋgavuun sasaghati tane. Mako pale tivaghamun ghau.

21 Ugham mulin ghau pa laion tane aavo,
ve upasali ghau pa makau sagsagŋa tane zoŋazi.
Aa, ŋgarig gha naghita naghe yo ulooŋ ghau!

22 Tauvene yau aat navotia gabua tau yo ugham payau ne pa zetagŋa.
Saawe tau tamtamon tsio tilup zi pa suŋuuŋ, yau aat nala tomani zi ve nayoor ezam. h 
23 Yam tau aroi pa Yoova ve ataghon ŋgar tooni na, apakuru.
Yam siŋ to Yakop, apait Yoova eeza pa tapiri ve poia tooni.
Yam Israela asov, aroron ve aroi pani.

24 Pa yes tau tibadbaad pataŋani ve tighur matazi pa Yoova na, i irau ighita pataŋani toozi imin kaut sorok ne mako. Pale iuul zi.
Irau ivelegh zi, ma ighur muuri pazi ne mako.
Tauvene saawe tau titaŋ raraini pa lezi uleeŋ, i aat ilooŋ taŋiiz toozi ve iuul zi.
25 Yoova, isaav ighe tamtamon tsio tilup zi pa suŋuuŋ tiina, yau aat nayoor ezam ila naghozi, ve napait ghom pa ŋgar tau yo ugham payau na.
Yau pale nataghon saveeŋ mbuaaŋ tsiau, ve nagham watooŋrau payo ila yes tau tiroi payo ve titaghon ŋgar tsio na matazi.

26 Watooŋrau tau nagham pa paitooŋ Yoova na, yes mbolaaŋa pale tighan sirivu, le apozi isuŋ.
Ve yes tau tizuari zi pa Yoova na, pale tipaiti.
I tauu pale igham poghani zi ve tileep poia taghon taghon gha ila.
27 Tamtamon irau taan ziige ta naol ne pale matazi iŋgal Yoova, ve titoor ŋgar toozi imuul ila pani.
Nughmariŋ pale tisov tiput aghezi pani ve tipaiti. i 

28 Pasaa, Yoova, i kinik tiina.
I iŋgin tamtamon tisov to taan, ve ighamgham pooz pazi.
29 Tauvene kuaz puughu to taan tau tipapakur tauzi na, pale tisov tiput aghezi pani ve tipaiti.
Ve ila ila le yes tau tigharau tighe timaat ve timin ŋgaupup na, yes paam pale tiput aghezi pani ve tipaiti.

30 Paaghu toit pale tibees pa Yoova.
Yes tau tivot murei na, pale tilooŋ Yoova vaaru.

31 Yes tau tipoop zi murei na, ene pale tisavia ŋgar duduuŋa to Yoova pazi,
ve tipaes pazi pa eez tau i igham mulin tamtamon tooni.
Copyright information for `TUCT