aMt 18:10; Mbaŋ 12:11
bHib 6:5; 1Pe 2:3
cMbo 23:1; 2Kor 9:8; Pil 4:19
eMbo 141:3; 1Pe 3:10; Yems 1:26, 3:2+
fMt 5:9; Ro 12:18, 14:19; Hib 12:14; Yems 3:17+
gMt 5:3+; Lu 18:13+; 2Kor 1:3+
hRo 8:28, 35-39; 2Tim 3:11
iYo 19:36
jRo 8:1

Psalms 34

Mbouŋ to tapait Maaron tomania tutuuŋ siriv

Mbouŋ to David

Muuŋ, David ileep tomania Abimelek ve igham karom imin ŋgar tooni ivaghamgham. Tauvene Abimelek iziire ila. Mbouŋ tane iŋarui saawe tana

Yau aat napait Yoova pa poia tooni irau saawe.
Irau naneneeŋ mako. Monmon avog pale ipapaiti.

Yau lolog poia pa Yoova, ve napakuru pa ŋgar popoia tau i igham payau na.
Yes tau tinumeer Yoova ve tibadbaad pataŋani na, irau tilooŋ aliŋag tane, leso lolozi poia paam.

Yam alam itiŋa talup ghiit, ve tapakur Yoova.
Itiŋa tapait eeza. Pasaa, i eeza tiina le tiina kat.
Suŋuuŋ tsiau iŋarui Yoova, ve i ilooŋ ghau.
Tauta igham mulin ghau pa gabua naol isov tau naroiroi pazi na.

Yes tau tighur matazi pani to iuul zi, ene pale lolozi poia ve tintinizi.
I aat iuul zi. Irau tighur matazi pani sorok ve mayazi ne mako.

Muuŋ, pataŋani tiina igham ghau. Tauvene nataŋ rarai Yoova to iuul ghau.
Ve i ilooŋ suŋuuŋ tsiau, ve igham mulin ghau pa pataŋani tsiau naol isov.

Yes tau tiroi pa Yoova ve titaghon ŋgar tooni na, aŋela tooni ilepleep tomani zi, ve iŋginŋgin zi.
I ighamgham mulin zi pa pataŋani toozi. a 
Yoova, i poia kat. Taumim atoova ve aghita.
Yes tau tinumeera ve tiyoŋyooŋ ila tooni na, poia tooni izazaa toozi, le lolozi poia kat. b 
Yam tamtamon patabuyaaŋa to Yoova, aroi pani ve ataghon ŋgar tooni.
Pa yes tau tighamgham tauvene, irau timbool pa gabua eta mako. c 

10 Laion paghpaaghu, tapirizi tiina. Eemon saawe siriv, lezi aniiŋ mako ve pitool zi.
Ve yes tau tizuari zi pa Yoova, ene irau timbool pa gabua poia eta mako.

11 Natugŋa,
(34:11) Yes ŋgara to Israel tiwatwaat yes tau tipaduduuŋ zi na tighe ‘natuzŋa’.

alam alooŋ saveeŋ tsiau tane.

Yau naghe napaghazoŋai gham pa eez to aroi pa Yoova ve ataghon ŋgar tooni.

12 Mindai, yo ughe uleep poia,
ve uleep malau izi taan toman lolom poia?

13 Ighe tauvene, o uŋgin poghania avom.
Saveeŋ saghati, ma karom eta ivot ila avom sov. e 

14 Ve ughur murim pa ŋgar saghati, ve ugham ŋgar poia mon.
Uzuari ghom pa taghoniiŋ ŋgar luuma,
ve uil eez to yamŋa tamtamon avalupu gham ve aleep poia. f 
15 Tamtamon duduŋazi, Yoova maata pazi,
ve ighurghur taliiŋa pa taŋiiz toozi.

16 Eemon zeran sasaghati, i ighurghur koi pazi.
I pale ipasov zi pa taan le tisov kat. Murei pale tamtamon matazi iŋgal zi muul mako.
17 Saawe tau tamtamon duduŋazi titaŋ rarai Yoova pa uleeŋ,
i iloŋlooŋ zi ve ighamgham mulin zi pa pataŋani toozi naol isov.

18 Yes tau pataŋani igham zi le lolozi isaghat kat na, Yoova ileep igharau zi.
Tamtamon tau ighe pataŋani itatani le tapiri isov, ene pale Yoova iuule. g 
19 Onoon, tamtamon duduŋazi, pataŋani naol ivotvot pazi.
Eemon Yoova pale igham mulin zi pa pataŋani toozi ta naol ne. h 

20 I pale iŋgin poghani zi kat.
Irau tuazi eta ipol mako. i 
21 Eemon yes tau tizorzoor Yoova aliiŋa na, ŋgar toozi sasaghati pale imuul pa tauzi, ve irav zi timaat.
Yes tau tighurghur koi pa tamtamon duduŋazi, ene pale Yoova ighur atuya pazi, leso iyat ŋgar toozi tawe.

22 Yoova ighamgham mulin besooŋa tooni pa pataŋani toozi, leso tileep poia.
Yes tau tinumeera ve tiyoŋyooŋ ila tooni na, i irau ighur atuya pazi mako. j 
Copyright information for `TUCT