aIgham 9:14
bMt 26:60
cMbaŋ 7:54
dYo 15:25

Psalms 35

Ŋeer ee isuŋ pa Maaron ighe igham mulini ila koiŋa nimazi

Mbouŋ to David

O Yoova, uul ghau ve utatan koiagŋa tau aazne yeŋa nivazorai ghei ve tiŋoŋooŋ payau ne.
Yes tau tighe tigham malmal payau ne, uvool tsiau ve uparav tomani zi.

Unonogh ghom pa gabua tsio to malmal, ve ukis sigheu tsio,
ve uburig ulam uul ghau.

Upas iiz ve zaab tsio, ve upoon ghau pa yes tau tigham lilin ghau ne.
Yau naghe nalooŋ ghom usaav payau ughe: “Yau Uleeŋa tsio. Yau aat nauul ghom.”
Yoova, yes tau tighe tirav ghau namaat ne, utatan tapirizi, ve ugham zi mayazi ve tighau tila.
Yes tau tiil eez to tivaghamun ghau ne, ugham ŋgar toozi ivaghamgham, ve timuul tila toman mayazi.

Yoova, naghe aŋela tsio inaan zi gha tighawaar,
imin yaghur ivuvuur ŋgaupup.

Aŋela tsio tawe igham taghon zi, ve tilaan ila ndoroom loolo taghon eez tau pusukpusukia na, o poi!
Pasaa, yau nagham sosor eta pazi mako.
Eemon yes tiraar puugh tighe tisaghav ghau.
Ve titai puura tau izila kat, leso natap nazila.

Yoova, upateeŋ zi pa saghatiiŋ tiina eta.
Ugham zi tighoon ila tauzi puugh toozi.
Ve ugham zi titaptap tizila puura tau titaii payau na. Leso saghatiiŋ igham zi le tisaghat kat!
Yoova, ighe ugham tauvene, ene pale lolog poia kat payo,
ve tintinig pa uleeŋ tau ugham payau.

10 Yau aat napait ezam toman lolog, ve naghe: “Yoova, sei ta imin yo? Eta mako!
Pasaa, yes tau tapirizi imbool na, yo ugham mulin zi ila yes tau tapirizi tiina na nimazi.
Yes mbolaaŋa ve yes tau tileep ila pataŋani loolo na, yo aat uvool toozi, ve ugham mulin zi ila umbuuŋa nimazi.” a 
11 Tamtamon naol tiburig ve tiŋgal saveeŋ karom payau tighe tivaghamun ghau.
Eemon saveeŋ ŋgaliiŋ tau tinoknok ghasoniiŋ ghau pani ne, ene yau nakankaan pani. b 

12 Yau nagham ŋgar poia pazi. Eemon yes tipamuul ŋgar saghati payau.
Tauta lolog ipataŋan kat.
13 Eemon saawe tau yes timorooŋ le tisaghat, lolog ipataŋan pazi, ve nagharaat taug mako.
Ve naŋgun taug pa ghaniiŋ aniiŋ, ve naghur zi ila suŋuuŋ tsiau.
Eemon suŋuuŋ tsiau tane, yo ugham anooŋa ivot mako.
Tauta lolog ipataŋan kat, ve nataŋ pazi imin zetagŋa, ma toŋvetaz tsiau duduuŋ.
Ve nalaagh matag izaa mako. Natudtud ve nataŋtaŋ, imin ŋeer tau loolo ipataŋan pa tiina imaat.
15 Eemon saawe tau pataŋani igham ghau gha naleep saghat, yes lolozi poia, ve tilup zi to tivaghamun ghau.
Yes tau tighe tigham malmal payau ne, yau nawatagh zi mako. Nakankaan pa ŋgar toozi.
Yes tinoknok ŋgaliiŋ saveeŋ payau.

16 Ve tisiksik saveeŋ veleghiiŋ naol payau.
Atezi yavyav payau kat, ve tiŋaaŋ maripazi tighe le tikari ghau. c 
17 Yoova, puughu mindai ta umamarar zi ve tighamgham ŋgar tauvene payau? Pale ŋeez o uul ghau?
Yes timin laion tau tisasaŋan pa raŋgatiiŋ ghau.
Tauvene ugham mulin ghau ila nimazi, leso naleep poi.

18 Ve ighe uul ghau, mako saawe tau tamtamon tsio tilup zi pa suŋuuŋ, yau aat nala tomani zi, ve napait ghom toman lolog poia.
Pale napait varum ila eval tiina tawe naghozi.
19 Koiagŋa, muuŋ yeŋa lupuuŋ tsiei eemon. Eemon aazne, tighur koi payau sorok.
Tauvene uul ghau lak! Mako pale tiliiv ghau ve tipakur zi.
Ve tighan matazi payau, ve tighe: “Aa, ŋeer ta ivaghamgham wa!”
O Yoova, ŋgar tauvene ivot sov! d 

20 Yes tisavia saveeŋ luuma eta to tilup tamtamon ve tileep poi ne mako.
Tiŋgalŋgal saveeŋ naol pa tamtamon marowa to taan tane.

21 Ve aliŋazi izazaa sorok, ve tisavsaav ila matag tighe:

“Aa, ŋgarig gha nighit ghom!”
22 Yoova, ŋgar toozi sasaghati ta naol ne, yo ughit zi wa.
Uneneeŋ pazi sov! Tiina tsiau, uleep soghan payau sov.

23 Maaron, yo Tiina tsiau. Uburig ve uvool tsiau.
Uyooz payau, ve utatan zi.

24 Yoova, Maaron tsiau, ŋgar tsio iduduuŋ mon.
Tauvene uyooz payau, ve upaghazoŋai ghau ila tamtamon matazi ughe yau leg sosor eta mako.
Uul ghau. Mako pale koiagŋa tipakur zi pa pataŋani tau igham ghau ne.

25 Mako lolozi poia ve tisaav tighe:
“Aa, isov! Ŋgar tau taghe tagham pani, tauta ivot pani gha isaghat wa!”
26 Yoova, yes tau tipakur zi pa pataŋani tau igham ghau ne,
ugham zi tivaghamgham, ve tighau tila toman mayazi.
Yes tau tivelegh ghau ve tipapait tauzi na,
upamayaŋin zi le mayazi kat.
27 Eemon yes tau tighe yo uul ghau ve upaghazoŋai ghau ila tamtamon matazi ughe yau leg sosor eta mako na,
yes pale lolozi poia ve tintinizi, ve tiyoor ezam toman aliŋazi tiina.
Ve tisavsaav tighe: “Yoova eeza tiina kat! Isaav ighe besooŋa tooni ileep poi, ene pale i paam loolo poia.”
28 Tauvene mboŋoozo ila le ravrav izi, avog pale ivotia ŋgar duduuŋa tau yo ughamghamu na, ve napapait ghom.
Copyright information for `TUCT