aMbo 34:13; Yems 1:26,3:2
bMbo 90:12; Yems 4:14
cMbo 90:4, 144:4
dLu 12:20; Yems 4:14
eHib 12:5+
fGnp 23:4, 47:9; Hib 11:13; 1Pe 2:11

Psalms 39

Lepoogh toit to taan, ene tuuku kat

Mbouŋ to David

David itoor mbouŋ tane pa Yedutun, i ŋeer tau imuŋmuuŋ pa mbouŋ

Yau nasaav pa taug naghe: “Yau aat naŋgin taug poi. Leso avog isosor sov.
Isaav ighe naleep tomania zeran sasaghati, yau aat naŋgin avog poi.” a 

Tauvene napoon avog, ve nasavia saveeŋ eta mako.
Nayai ghau, ve naneneeŋ mon.
Eemon nagham ŋgar naol ila ila le lolog ipazaagh ghau naghe nasaav.

Pasaa, nagham ŋgar naol kat, le ateg basbasuuŋ.
Tauta irau naneneeŋ muul mako, ve naghason Maaron naghe:
“Yoova, upaghazoŋai ghau. Ndaman tsiau piiz ta ighengheen soone?
Pale ŋeez o namaat ve nasov pa taan?
Uul ghau leso naghilaal naghe: Malau mako pale lepoogh tsiau to taan isov. b 

Yo ughur leg saawe tuuku mon to naleep izi taan.
Saawe to lepoogh tsiau izi taan, ene imin gabua sorok ila yo matam.
Onoon kat, tamtamon tisov to taan lepoogh toozi, ene imin avuvuun tau ivot ila avoon. Tileep rig ve tisov. Irau taghit zi muul mako. c 
Tamtamon tilaghlaagh pa uraat naol.
Eemon lepoogh toozi, ene tuuku imin ai yavyaava tau ighe aaz izila, ene taghita muul mako.
Matazi imin naol, ve tilala tilamlam pa uraat tighe tindou lezi gabua katini.
Eemon tirav tauzi sorok. Pasaa, tikankaan pa sei ta pale ighamuur gabua toozi tawe. d 
Yoova, saa gabua ta pale naghur matag pani to iuul ghau?
Gabua eta mako. Yau naghur matag payo mon.
Yau nazoor aliŋam ve nagham sosor.
Upul sosor tsiau isov, ve ugham mulin ghau pa pataŋani to sosor tsiau.
Mako pale yes kankanooŋa tau tiwatagh ghom mako na tisik saveeŋ veleghiiŋ payau.

Aazne, yau naneneeŋ mon. Irau saveeŋ eta ivot ila avog mako.
Pasaa, yo taum ta ugham pataŋani tane ivot payau.

10 Maaron, uŋgal matag irao!
Nimam ighanghan ghau le tapirig isov wa.

11 Isaav ighe tamtamon tigham ŋgar saghati, na yo uyaon zi ve uloslos zi to upaduduuŋ zi.
Ve gabua toozi popoia tau lolozi pani kat na, yo uvavaghamunia imin up ivaghamunia uuli.
Ene imin tau yau nasavia ila wa. Yei tamtamon to taan nimin kaut sorok. Nileep rigmon ve nisov, imin avuvumai tau ivotvot ila avomai ne. e 
12 Yoova, upoon taliŋam pa taŋiiz tsiau sov.
Ughur taliŋam payau, ulooŋ suŋuuŋ tsiau tane, ve uul ghau.
Pa saawe tsiau to naleep izi taan, ene malau mako.
Saawe tuuku tau naleep izi taan tane, yau naleep namin loom payo, raraate imin tibugŋa tisov. f 

13 Lolom isaghatin ghau ve upul ghau. Uŋgal matag irao.
Leso saawe tuuku tau naleep izi taan ne, naleep toman lolog poia, mako namaat ve nasov pa taan.”
Copyright information for `TUCT