aMbo 112:5,9; Mt 5:7; Yems 2:13+
bMbo 55:12+; Lu 22:21; Yo 13:18

Psalms 41

Suŋuuŋ to ŋeer tau imorooŋ

Mbouŋ to David

Isaav ighe tamtamon eta maata iŋgalŋgal yes mbolaaŋa ve iuluul zi, ene pale poia to Yoova izazaa tooni ve tintini.
Ve isaav ighe pataŋani eta ivot pani, ene pale Yoova iuule. a 

Yoova tauu pale imin sigheu pani ve iŋgini. Leso imaat sov, ve ileep poia.
I pale ileep izi taan tau Yoova igham pa tamtamon tooni na, ve poia to Yoova izazaa tooni.
Yoova irau ipuli ila koiŋa nimazi mako.

Ve isaav ighe i imorooŋ ve ighengheen, ene pale Yoova tauu iŋgini, ve ipasov moroghooŋ tooni.
Yau nasaav naghe: “Yoova, yau nagham sosor payo wa.
Lolom isaghatin ghau ve upasov moroghooŋ tsiau. Pa yau besooŋa tsio.”
Koiagŋa tisasavia saveeŋ sasaghati iŋarui ghau tighe:
“Ŋeer tawe, ŋeez o imaat leso eeza ilale ve loloon iveegh pani?”

Ve saawe tau tamtamon tilam tigig ghau, tisavia saveeŋ toman lolozi mako.
Yes tilam to tigig ghau pa moroghooŋ tsiau mon.
Ve saawe tau timuul tila, tisasavia varug sorok irau nugh tighe: “Paita imaat.”

Yes tau tighur koi payau ne, tisov tighe le nasaghat kat.
Tauvene tikakamuun payau tighe:

“Aa, ŋeer tawe, moroghooŋ saghati kat ighamu.
Irau maata pakia ve iburig muul ne mako. Paita imaat.”

Ve etag ite tau nanumeera kat naghe yeiru lupuuŋ tsiei eemon, ve niluplup ghei pa ghanghaniiŋ na,
i paam ighur muuri payau, ve imin koiag. b 
10 Yoova, lolom isaghatin ghau ve uul ghau. Pa yau besooŋa tsio.
Upasov moroghooŋ tsiau ve ugham tinig poia muul.
Leso nayat ŋgar saghati tau koiagŋa tigham payau ne.
11 Yoova, aazne yau nawatagh naghe yo lolom poia payau. Pasaa, koiagŋa titatan ghau mako. Tauvene irau aliŋazi izaa sorok tighe yes tiliiv ghau ne mako.

12 Yau nataghon ŋgar duduuŋa mon. Tauta yo upalot ghau ve nayooz ariaaŋ.
Ve yo pale ugham ghau naleep tomani ghom taghon taghon gha ila.
13 Tapait Yoova pa poia tooni! I Maaron to iit Israela.
Tapait eeza ta aazne, ve taghon taghon gha ila.
Onoon le onoon kat.
Copyright information for `TUCT