aMbo 36:8; Ezek 47:1-9; Yo 7:37-39; Syg 22:1
bMbo 97:5; 2Pe 3:10+
cRo 8:31

Psalms 46

Maaron imin niaan ariaaŋa to yoŋgaaŋ

Mbouŋ to yes Kora

Maaron imin niaan ariaaŋa to yoŋgaaŋ, ve ipapalot ghiit.
Isaav ighe pataŋani eta ivot pait, i pale ileep zigeen ve iuul ghiit.

Tauvene irau taroi mako.
Isaav ighe yogyoog itok taan,
ve loloz tipolpol tizila te loolo,

ve te isaghat gha dibom tipaparav,
ve tisasabur loloz puughu le loloz tirurur, ene poia.
Irau tasaŋeeŋ mako.
Maaron Tiina Tau Iliiv Zimaronŋa Tisov na, nugh tooni patabuyaaŋ, i le yaa tau monmon irereer.
Yaa tawe igham tamtamon to nugh tooni tileep poia toman tintinizi. a 

Maaron ilepleep ila nugh tawe ve iŋginŋgini.
Tauvene gabua eta irau itok nugh tawe mako.
Isaav ighe pataŋani eta ivot pazi, Maaron irau isaŋan le mboŋoozo mako. Pale iuul zi rekia mon.

Nugh nugh, roiŋ tiina igham zi ve tisaŋeeŋ.
Kinik to taan tapirizi isov, le nugh toozi tivaghamgham.
Ve Maaron isaav aliiŋa tiina imin lalaav luutu, le taan ituntun ve ireer imin yaa. b 
Yoova, i Maaron saksaki ve iŋgin gabua naol isov. I ileep tomani ghiit irau saawe.
Maaron to Yakop imin niaan ariaaŋa to yoŋgaaŋ. c 
Alam aghita uraat tintiina tau Yoova igham zi na.
Uraat tooni igham tamtamon tiroi ve avozi ikaak.

I ipapasov malmal irau taan ziige ta naol ne.
Ve iŋgoor polpolin paneegh ve iiz, ve isan sigheu to malmal, ve isuruuv zi tizala yav.

10 I isaav pa tamtamon ighe: “Aparav irao!
Atemim izi, ve aghilaal ghau. Yau mon ta Maaron.
Nughmariŋ pale tipait ghau,
ve ezag imin tiina irau taan isov.”
11 Yoova, i Maaron saksaki ve iŋgin gabua naol isov. I ileep tomani ghiit irau saawe.
Maaron to Yakop imin niaan ariaaŋa to yoŋgaaŋ.
Copyright information for `TUCT