aMbo 46:10, 95:3
b1Pe 1:4
dMbo 68:18
eMbo 95:3; Kol 3:16
fSyg 4:9

Psalms 47

Maaron i kinik tau ighamgham pooz pa gabua naol isov

Mbouŋ to yes Kora

Yam nughmariŋ, tintinmim ve aposai nimamim!
Yam asov ayoor Maaron eeza, ve ambou mbouŋ to apakuru!
Pa Yoova, i Maaron Tiina Tau Iliiv Zimaronŋa Tisov. Aroi pani ve ataghon ŋgar tooni.
Onoon kat, i kinik tiina. Tamtamon tisov to taan tileep ila i saamba. a 

I itatan nugh nugh, ve ighur zi tileep ila sambamai.
Yes tau tiwataghi mako na, i irav zi tizi, ve nivaghaaz zi ila aghemai saamba.

Iit siŋ to Yakop, Yoova loolo igheen toit kat. Tauta irav motin taan sirivu, ve igham pait imin leen motot.
Iit tintiniin ve tapakur ghiit pa taan tau i igham pait. b 
Maaron izala niia to ghamuuŋ pooz ve ileep ta sewe.
(47:5) Saawe siriv yes Israela tisiŋ bokis to saveeŋ mbuaaŋ, ve tilaagh irau Yerusalem loolo to tipakur Maaron. Ra tighur bokis iloŋ ila Rumei Tiina loolo muul.

Tauvene tavuur itaŋtaŋ, ve tamtamon tisirsir toman lolozi poia. d 

Ambou, ambou! Ambou ve apakur Maaron!
Ambou ve apait kinik toit eeza!

Pa Maaron, i kinik tiina. Tamtamon tisov to taan tileep ila i saamba.
Tauvene ambou mbouŋ to apakuru! e 
Maaron ileep ila niia patabuyaaŋ to ghamuuŋ pooz, ve iŋginŋgin nughmariŋ.
Tamtamon tisov tileep ila i saamba. f 

Daaba to nugh nugh tilup tomania iit tau tabesbees pa Maaron to Abaram na, ve itiŋa tapait eeza.
Pasaa, pooza tisov to taan tileep ila i niima.
Tapait eeza izala le izala kat.
Copyright information for `TUCT