aIgham 19:16, 18
bIgham 24:7
cMbo 19:1+; Ro 1:20
dMbo 40:6
eMbo 104:24
fMt 6:26
gIgham 19:5; Mbo 24:1; 1Kor 10:26
hMbo 66:13+; Hib 13:15
iMt 7:7; Yems 5:13
jRo 1:32
kMbo 91:16; Lu 2:30

Psalms 50

Ŋgar tau tapait Maaron pa poia tooni ve tataghon tutuuŋ tooni, ene watooŋrau tauu

Mbouŋ to Asap

Yoova, i Maaron saksaki.
Aliiŋa ilat pa yam tamtamon to taan.
I ipoi gham ighe yam asov alam alup gham ila naagho.
Yam tau aleep ila pa aaz izaa, ve yam tau aleep ila pa aaz izila na paam.
Nugh Zion, ene paghuuna le paghuuna kat.
Maaron ileep ta sewe, ve mbonari isul ivot.

Maaron toit ighe ilam tane. Irau ineneeŋ muul mako.
Yav ighan imuuŋ pani, ve yaghur tiina toman uman ilivuti. a 

I ipoi sambam ve taan ighe tilam, leso tighita igabiiz tamtamon tooni ve ighur atuya pazi.

Ve isaav ighe: “Tamtamon tsiau tau lolozi isaghav ghau ve titaghon ŋgar tsiau na, ayau zi tisov tilam tilup zi ila naghog. Ene yes tau tigham watooŋrau payo, ve timbu saveeŋ tomani ghau tighe yeŋa nivalupu ghei nimin eemon.” b 
Maaron igagabiiz tamtamon ve ighurghur atuya pazi.
Ve gabua to sambam saamba tipaghazoŋaini tighe gabizooŋ tooni, ene iduduuŋ mon.
c 
“Yam tamtamon tsiau Israel, alooŋ saveeŋ tau naghe nasavia payam.
Pasaa, yau ta Maaron tsiam.
Aazne, yau aat nasaav ila matamim, ve navotia sosor tsiam.

Watooŋrau tau aghamgham zi payau ne, yau nayaon gham pani mako.
Monmon naghit gham aghurghur watooŋrau izala artaal, leso yav ighan dodolin zi. Ene poia. d 

Eemon yau irau nagham makau, ma mekmek tau tileep ila olol tsiam loolo ne mako.

10 Pasaa, yau nambool pa gabua eta mako.
Gabua naol isov tau tilaghlaagh ila su loolo,
ve makau tau tileep irau loloz ta naol ne, ene tsiau mon. e 

11 Ve man tau tirovroov ila taitai saamba na, yau nawatagh zi tisov ve naŋgin zi.
Ve gabua naol isov tau tilaghlaagh ila regh loolo na paam, ene yau tsiau. f 
12 Isaav ighe pitool ghau, ene irau nasaav payam mako.
Pasaa, taan tomania gabua naol isov tau tileep ve tigheen ila na, ene yau tsiau mon. g 

13 Mindai, yam aghe yau naghanghan makau miiza,
ma naghunghun mekmek siiŋi? Mako.

14 Watooŋrau tau yau lolog pani, ene tauvene: Lolomim poia payau, ve apait ghau pa poia tsiau.
Ve saveeŋ tau ambua tomania Maaron tsiam tau ileep saaŋa le saaŋa kat na, agham uratoini le anooŋa ivot. h 

15 Ve isaav ighe pataŋani igham gham, na ataŋ rarai ghau pa uleeŋ.
Leso nagham mulin gham, ve apait ezag pa tapirig ve poia tsiau.” i 
16 Eemon yes zeran sasaghati, Maaron isaav pazi ighe:
“Tutuuŋ tsiau tau naghur zi pataghaaŋ na, yam awatwaat zi sorok pasaa?
Ve puughu mindai ta asasavia saveeŋ tau nambua tomania tamtamon tsiau ne?”

17 Pa saawe tau yau napaduduuŋ gham, yam ambuzir pa aliŋag.
Ve azorzoor saveeŋ tsiau ve aveleghi imin kaut sorok.

18 Isaav ighe aghita umbuuŋa eta, na yam lolomim poia pani, ve aghamu imin etamim.
Ve yes tau tighurghur boog na, yam apaak zi ve yamŋa alaghlaagh. j 

19 Saveeŋ sasaghati ve karom naol, ta ivotvot ila avomim.

20 Yam aŋgalŋgal saveeŋ pa ziiri waaro tsiam,
ve avavaghamunia toŋvetaz tsiam ezazi.

21 Mindai, yam aghamgham tauvene ve aghita naneneeŋ, tauta aghe yau nayok pa ŋgar tsiam tana?
Yam aghe itiŋa rarateen? Mako!
Tauta aazne, yau nayaon gham, ve nasaav ila matamim, ve navotia sosor tsiam ivot ighazooŋ.
22 Tauvene yam tau lolomim iveghveegh payau na, ayamaan gham!
Mako pale naburig, ve navaghamun gham kat. Ve eta irau ipas gham ila nimag mako.

23 Tauvene lolomim poia payau, ve apait ghau pa poia tsiau.
Pa watooŋrau tauvene, tauta igham ezag imin tiina.
Tamtamon tau maata iŋgal tauu pa laghooŋ tooni, ene pale natotoi uleeŋ tsiau pani, ve nagham mulini. k 
Copyright information for `TUCT