Psalms 59

Ŋeer ee ighason Maaron to ipoona pa koiŋa

Mbouŋ to David

Mbouŋ tane iŋarui saawe tau kinik Saul imbaaŋ uraata tooni siriv tila ruum to David, to tipadeu pani ve tiravu imaat. Paesiiŋ ila pa ŋeer tau imuŋmuuŋ pa mbouŋ na tauvene: Mbouŋ tane aliiŋa, ene: ‘Ureua sov.’

Maaron tsiau, uul ghau ve upas ghau ila koiagŋa nimazi.
Ughur ghau nazaa saaŋa, ve matam payau. Leso koiagŋa tivaghamun ghau sov.

Ugham mulin ghau, ve upas ghau ila zeran sasaghati tane nimazi.
Pa yes zeran to liŋiiŋ siŋ.

Maaron, ughita! Yes tau tapirizi tiina na, tilup zi ve tigham lilin ghau tighe tirav ghau namaat.
Yes lolozi isaghatin tamtamon mako.
Ve yau leg sosor eta mako.
Nazoor saveeŋ eta mako, ve nagham ŋgar saghati eta mako.
Eemon aazne, tigharaat tauzi tighe tigham malmal payau.
Maaron, uburig uvool tsiau, ve ughit zi!

Yoova, yo Maaron saksakim ve uŋgin gabua naol isov. Yo mon ta Maaron to Israel.
Yes nugh nugh tau aazne tighur koi payau ne, muuŋ lupuuŋ tsiei eemon. Ve aazne tighur koi payau.
Uburig ve ughur atuya pazi.
Ughurghur zi sov! Pa yes zeran sasaghatizi, ve avozi karom.
Ravrav ta naol ne, koiagŋa tilamlam, ve tilaghlaagh ila nugh loolo.
Tiŋaaŋ maripazi ve lolozi ŋurŋuria imin ŋgavuun tau ighe ighan tamtamon.

Ughita. Saveeŋ sasaghati mon ta ivotvot ila avozi.
Yamazi, ene imin mbuzaagh maata.
Ve tisavsaav tighe: “Sei pale ilooŋ ghei?”
Eemon Yoova, yo ughit zi, ve uŋiŋ pazi.
Yes nugh nugh tau tiwatagh ghom mako na, yo uvelegh zi ve ughe tirau saa?
Maaron, yau naghamgham tapirig ilat tsio.
Tauvene naghurghur matag payo, ve nasasaŋan mon.
Koiagŋa irau tigham gabua eta payau mako. Pasaa, yo uponpoon ghau pazi imin maetaaz tau izala kat.

10 Maaron tsiau, yo lolom isaghav tamtamon tsio ve uluul zi.
Yo aat ulam tomani ghau, ve utatan koiagŋa, ve naghita pa taug matag.

11 Eemon urav zi timaat rekia sov.
Upul zi tileep toman pataŋani. Leso tamtamon tsiau matazi kisin ŋgar tsio tau ughurghur atuya pa zeran sasaghatizi.
Maaron, yo umin sigheu payei.
Utatan zi pa tapirim le tivaghamgham, ve ureu zi le timbiriis tilalez lez.
12 Pa saveeŋ tau ivotvot ila avozi na, poia mako. Monmon avozi isosor.
Yes tighamgham karom pa tamtamon, ve tisiksik saveeŋ sasaghati naol pazi.
Eemon ŋgar toozi tau tipapait tauzi ve tivelegh ghom, ene pale imin liis pazi.

13 Tauvene utotoi aatyavyav tsio pazi, ve uvaghamun zi.
Maaron, upasov zi le tisov kat.
Leso tamtamon irau taan ziige ta naol ne, tighilaal ghom tighe yo ughamgham pooz pa yei tau Yakop paaghu tooni ne.
14 Ravrav ta naol ne, koiagŋa tilamlam, ve tilaghlaagh ila nugh loolo.
Tiŋaaŋ maripazi, ve lolozi ŋurŋuria imin ŋgavuun tau ighe ighan tamtamon.

15 Yes timin ŋgavuun tau tilaghlaagh ve tiliil aniiŋ.
Ve isaav ighe tighan irao mako, ene aat tinoknok taŋiiz.
16 Eemon yau aat nambou, ve napait ezam pa tapirim tiina.
Mboŋoozo ta naol ne, yau aat nambou ve napait ghom pa ŋgar tsio tau lolom isaghav tamtamon tsio ve uluul zi.
Pasaa, yo uponpoon ghau imin maetaaz tau izala kat.
Isaav ighe pataŋani ivot payau, yo pale umin didiiŋ ariaaŋa payau, leso nayooŋ ila.
17 Maaron, yau naghamgham tapirig ilat tsio. Tauvene nambou ve napait ezam.
Maaron tsiau, yo uponpoon ghau imin maetaaz tau izala kat.
Ve yo lolom isaghav ghau, ve uluul ghau irau saawe.
Copyright information for `TUCT