aLu 12:16+; 1Tim 6:6+, 17
bMt 16:27; Ro 2:6; 1Kor 3:8; 2Kor 5:10; Syg 22:12

Psalms 62

Suŋuuŋ to ŋeer tau ighur ila to Maaron ariaaŋ

Mbouŋ to David

Timbou mbouŋ tane itaghon ŋgar to Yedutun, i ŋeer tau imuŋmuuŋ pa mbouŋ

Yau lolog bubu mako. Ateg izi, ve nasaŋan Maaron to iuul ghau.
Pasaa, yau nawatagh: I mon ta irau igham mulin ghau pa pataŋani tsiau.

Onoon kat, i mon ta Uleeŋa tsiau ariaaŋa.
I iponpoon ghau imin maetaaz tau izala kat,
ve imin ruum ariaaŋa to nayooŋ ila loolo.
Tauvene gabua eta irau ivaghamun ghau mako.
Yam tau aghe avaghamun ghau ne, ŋeez o apul ŋgar tsiam saghati tana?
Yam asov azuari gham pa ravuuŋ ghau pasaa?
Aghita. Tapirig isov wa. Yau namin olol muŋgaana tau puughu imbuuz ve ighe imatit.

Yau leg ezag. Tauta ireu lolomim ve azuari gham aghe atatan ghau nazi.
Yam zeran to karom kat! Agham karom, o lolomim poia.
Yam asavsaav ila avomim uuli aghe Maaron ighur poia tooni izaa tsiau.
Ve lolomim, aghe Maaron ivaghamun ghau.
Eemon yau lolog bubu mako. Ateg izi ve nasaŋan Maaron to iuul ghau.
Yau naghurghur matag pani mon.

Onoon kat, i mon ta Uleeŋa tsiau.
I iponpoon ghau pa koiagŋa imin maetaaz tau izala kat,
ve imin ruum ariaaŋa to nayooŋ ila loolo.
Tauvene gabua eta irau igham ghau narur ne mako.

Yau nanumeer Maaron naghe i pale igham mulin ghau pa pataŋani tsiau,
ve igham ezag ivot imin tiina.
Irau naroi mako. Pasaa, i ta imin niag to yoŋgaaŋ,
ve iponpoon ghau imin maetaaz ariaaŋa.
Yam tamtamon to Maaron, anumeera irau saawe.
Avotia lolomim pani, ve asavia pataŋani tsiam isov ila tooni.
Pa i ta imin niaan to yoŋgaaŋ.
Tamtamon tisov timin kaut sorok.
Yes tau lezi ezazi mako, ve yes tau ezazi tintiina na paam. Tileep rigmon ve tisov, imin avuvuun tau ivotvot ila avoon ne.
Irau tanumeer zi mako.
Isaav ighe tagabiiz zi poi, ene tirau gabua eta mako.
Pasaa, tomania uraat ve gabua toozi rekia mon tilalez imin avuvuun tau ivotvot ila avoon ne.

10 Tauvene ŋgar to ghamuuŋ malmal leso tayau leen gabua to tamtamon, anumeera sov.
Ve ŋgar to umbuuŋ paam, aghur matamim pani to igham gham aleep poia na sov.
Ve isaav ighe maet ma kuaz tsiam ivot imin naol, na aghur lolomim pani sov. a 
11 Saawe naol, yau nalooŋ Maaron isaav ighe i mon ta le tapiri tiina.

12 Tiina tsiei, yo lolom isaghav tamtamon tsio ve uluul zi irau saawe.
Ve yo ughurghur atuya pa tamtamon tisov itaghon ŋgar toz toz. b 
Copyright information for `TUCT