aMbo 42:2, 84:2
bMbo 23:5+; Mt 5:6

Psalms 63

Suŋuuŋ to ŋeer tau ipasawal ighe ileep igharau Maaron

Mbouŋ to David

Mbouŋ tane iŋarui saawe tau David ileep izi nugh ŋginaaŋa to Yudea

O Maaron, yo Maaron tsiau.
Mboŋoozo geeg, suŋuuŋ tsiau iŋarui ghom naghe ulam uleep zigege.
Yau napasawal naghe le nalat nagharau ghom, o poi.
Pasaa, aazne naleep soghan payo.
Yau lolog payo kat, imin ŋeer tau ilaghlaagh ila nugh tau le yaa mako na, ve murun matini.
a 

Pasaa, matag iŋgal imuul ila pa saawe tau naghit ghom ila rumei tsio patabuyaaŋ loolo,
ve naghit katin tapirim tomania mbonarim.

Lepoghag to taan, ene poia. Eemon naghita naghe ŋgar to lolom isaghav tamtamon tsio ve uluul zi, ene gabua tau poia le poia kat.
Tauvene yau aat nayoor ezam ve napait ghom.

Pale napait ezam pa poia tsio ila ila le lepoogh tsiau to taan isov.
Pale nait nimag izaa, ve nasuŋ payo.
Pasaa, yo ugham lolog poia kat, imin naleep ila ghanghaniiŋ, ve naghan aniiŋ tau poia ve ŋgoreeŋa kat le isooŋ ghau kat.
Tauta lolog poia kat, ve nambou mbouŋ to napait ghom. b 

Saawe tau nazi nagheen, matag iŋgalŋgal ghom.
Naghamgham ŋgar payo mboŋ ila le nughizau.

Pasaa, yo ta Uleeŋa tsiau.
Yau naleep poi ila nimam saamba imin tatareek natŋa tiyooŋ ila baage saamba.
Tauta namboumbou toman tintinig.

Yau lolog isaghav ghom kat,
ve nimam tapir ipapalot ghau.
Yes tau tizuari zi pa ravuuŋ ghau namaat na,
tauzi pale timaat ve tizila nugh to mateegha.

10 Pale mbuzaagh ighan zi gha timatmaat,
ve ŋgavuun sagsagŋa tighan patazi.
11 Eemon kinik tsiei, Maaron pale iuule ve ighamu loolo poia kat.
Ve tamtamon tisov tau tiwaat Maaron eeza to tipariaaŋ saveeŋ mbuaaŋ toozi ve titaghoni na, yes paam pale tipait Maaron eeza pa tapiri ve poia tooni.
Eemon yes tau avozi karom na, Maaron pale ipoon avozi.
Copyright information for `TUCT