aRo 3:25, 5:8
bMbaŋ 14:17
cMbo 67:6

Psalms 65

Yes Israela tipait Maaron pa uman ve mariri poia

Mbouŋ to David

Maaron, yei pale nilat nugh Zion ve nipait ghom,
ve nigham uratoi saveeŋ tau nimbua tomani ghom. Ŋgar tauvene, ene iduduuŋ.

Pasaa, yo uloŋlooŋ suŋuuŋ to tamtamon ve uluul zi.
Tamtamon tisov to taan aat tilat tilup zi ila naghom, ve tipait ghom.

Ighe ŋgar to zoraaŋ saveeŋ ve ŋgar sasaghati ikau ghei ve itatan ghei kat,
yo ureu sosor tsiei. a 
Yes tau yo usiigh zi timin lem, ve ugham zi tilat tileep tigharau ghom ila sirsiir to rumei tsio loolo, ene pale lolozi poia kat ve poia tsio izazaa toozi.
Yei nighe le nileep ila sirsiir to rumei tsio patabuyaaŋ loolo.
Pasaa, rumei tsio, ene ivon pa gabua popoia naol.
Tauvene saawe tau nileep sewe, ene igham ghei lolomai poia le poia kat, ve niyamaan nighe nirao wa.
O Maaron, yo Uleeŋa tsiei.
Yo uloŋlooŋ suŋuuŋ tsiei, ve ughamgham uraat ŋgeretazi tintiina. Tamtamon tighit zi le tiroi.
Ugham mulin ghei itaghon ŋgar tsio duduuŋa.
Tamtamon tau tileep irau taan tiina ve yes tau tileep irau sisi paam, tisov tinumeer ghom ve tighurghur matazi payo pa uleeŋ.

Tapirim ilivut ghom imin nonoghiiŋa tsio.
Ila yo tapirim, ugham loloz tisov tivot, ve tiyooz tuŋia ila niazi niazi.

Isaav ighe te isaghat, ve dibom ipolpol toman luutu tiina, yo irau ughamu aate izi.
Ve tamtamon tauvene paam. Isaav ighe tipaburigin malmal toman oroor tiina, yo irau upasov malmal toozi, ve ugham zi atezi izi.

Tamtamon tau tileep irau taan ziige ta naol ne, tighita gabua ŋgeretazi tintiina tau yo ughamgham zi na, le roiŋ tiina igham zi.
Yes tau tileep ila pa aaz izaa, ve yes tau tileep ila pa aaz izila na paam, yo ugham zi lolozi poia kat. Tauvene tiyoor ezam toman aliŋazi tiina.
Yo ta uŋgin taan, ve ugham uman izizi, leso taan ibees.
Ve yo ta ugham taan ŋgoreeŋa tiina ivotvot.
Yaa to Maaron, ene ivon ve irereer tauvene. Irau imaak mako.
Yo ugharaat taan itaghon taum ŋgar tsio. Leso aniiŋ katini ivot pa tamtamon.

10 Yo ugham uman izizi, leso ser ibees, ve aniiŋ anooŋa katini ivotvot.
Yo ututur taan le ibees kat.
Ve poia tsio, tauta igham aniiŋ itum poi izaa. b 

11 Yo poiam kat. Pasaa, ndaman tane, ugham mariri tiina ivot payei.
Aniiŋ tau itum ila uum tsiei, ene ipaboode imin moghar ndamoonda to yes kinik.
Nugh sindei tau ighe yo ula pani, ene gabua popoia katini tivotvot. c 

12 Yo ugham kikiliiŋ popoia titum ila nugh ŋginaaŋa, leso ŋgai maata maata tighan.
Ve uum popoia tau tigheen izala loloz na, ene upabood zi le paghunazi kat. Tauta loloz ta naol ne lolozi poia ve tintinizi.

13 Nugh tau kikiliiŋ igheen ila na, makau ve sipsip tivon ila.
Ve aniiŋ katini titumtum ila nugh raapa.
Tauvene tamtamon lolozi poia, ve timbou ve tiyoor ezam toman aliŋazi tiina.
Copyright information for `TUCT