aIgham 14:22
bIgham 15:18
cYems 1:2+; 1Pe 1:7
dIs 43:2
eYo 9:31; Yems 4:3; 1Yo 3:22

Psalms 66

Tamtamon to Maaron tipaiti pa uraat tooni tintiina

Yam tau aleep irau taan isov na, lolomim poia pa Maaron, ve ayoor eeza toman aliŋamim tiina.

Ambou ve apait eeza pa tapiri ve poia tooni.
Apakuru kat, pa i eeza tiina.

Asaav pa Maaron aghe: “Uraat tintiina tau yo ughamgham zi na, tamtamon tighit zi le tiroi.
Pasaa, tapirim tiina le tiina kat.
Tauta koiamŋa tiroi payo kat, ve tiput aghezi ila naghom, ve titaŋ rarai ghom tighe lolom isaghatin zi.

Ve yes mon mako. Tamtamon tau tileep irau taan isov, pale tiput aghezi payo, ve timbou ve tipakur ghom.
Lolozi poia kat ve timbou to tipait ezam.”
Alam aghita uraat tau Maaron ighamu na.
I igham uraat tintiina to iuul tamtamon.
Uraat tawe itotoi katin tapiri. Tauta tamtamon tighita, le roiŋ tiina igham zi.

Muuŋ, i ivalagh te le sirivu ila pa ŋas, sirivu ila pa tapir, ve taan mamaasa ivot.
Tauta timbuunŋa tilaagh taghoni, ve tila tivool pa ziige ite.
Tauvene iit loloon poia ve tintiniin pa ŋgar tau i igham pazi ta sewe. a 

I tapiri tiina kat. Pale igham pooz taghon taghon gha ila.
Saawe isov, i maata pa tamtamon to nughmariŋ, ve igagabiiz zi.
Tauvene yam to zoraaŋ saveeŋ, azoor pooz tooni muul sov. Aleep ila i saamba. b 
Yam nugh nugh, apait Maaron tsiei pa poia tooni.
Apakuru toman aliŋamim tiina, leso tamtamon tilooŋ paitooŋ tsiam.

Pa i ta ikiskis ghiit taleep mataan yaryaare.
Ve i iŋginŋgin ghiit, tauta tatap mako, ve tayooz tuŋia.

10 Onoon kat, Maaron yo utoov ghei pa pataŋani siriv to ugham ghei niŋgalaaŋ ila yo matam,
imin silva tau tighuru ila yav, leso yav ighani gha muun ighau, ve iŋgalaaŋ kat. c 

11 Yo ugham ghei nighoon ila puugh tsio,
ve ughur pataŋani tiina kat izaa tsiei.

12 Yo upul koiamaiŋa tiliiv ghei, ve karis toozi to malmal tilaan izala pavomai.
Pataŋani tsiei, ene imin nilaagh ila yav tau ighanghan na loolo,
ve nilaagh ila yaa tau ivon le tapiri tiina.
Eemon yo upas ghei nivot pa pataŋani tsiei, ve ugham ghei nileep poia, ve nirau kat pa gabua naol. d 
13 Saawe tau naleep ila pataŋani loolo,
yau nasaav payo naghe: “Isaav ighe yo uul ghau, yau aat nagham watooŋrau payo.”
Tauta aazne, nataghon saveeŋ mbuaaŋ tsiau tana,
ve nalam rumei tsio naghe naghur watooŋrau tsiau izala artaal, leso yav ighan dodolini.

15 Yau aat nagham gabua tumbuŋazi, ve narav zi timin watooŋrau payo, ve yav ighan zi le tisov.
Yav pale ighan sipsip tsiau zitamoot, ve vazizi poia izalat payo.
Ve tane mon mako. Pale nagham watooŋrau pa makau ve mekmek paam.
16 Yam tau aroi pa Maaron ve ataghon ŋgar tooni na, asov alam ve alooŋ saveeŋ tsiau tane.
Yau naghe navotia uraat tiina tau i igham payau.

17 Yau nataŋ raraini pa uleeŋ,
ve avog ipaiti paam.

18 Saawe tana, imin ta nakis ŋgar saghati eta igheen ila lolog,
kanaŋ Ŋeer Tiina irau ilooŋ suŋuuŋ tsiau mako. e 

19 Eemon i ighur taliiŋa payau,
ve ilooŋ suŋuuŋ tsiau.

20 Tauta napait Maaron pa poia tooni.
Pasaa, i imbuzir pa suŋuuŋ tsiau mako, ve ipas poia tooni payau mako.
Ŋgar tooni tau loolo isaghav tamtamon tooni ve iuluul zi, tauta itotoia payau.
Copyright information for `TUCT