aMbo 78:4

Psalms 71

Suŋuuŋ to kooŋ ee tau ghuruuŋ ila tooni iyaryaaŋ kat

Yoova, yau nanumeer ghom ve nayooŋ ilat tsio.
Upul koiagŋa titatan ghau sov. Pa ighe tiliiv ghau, ene pale mayag.

Yo utataghon ŋgar duduuŋa. Tauvene uul ghau ve upas ghau navot pa pataŋani tsiau tane.
Ughur taliŋam payau ve uul ghau lak.

Yo Uleeŋa tsiau ariaaŋa. Uponpoon ghau pa koiagŋa imin maetaaz tau izala kat.
Ve umin ruum ariaaŋa to nayooŋ ila loolo.
Saawe isov, yau irau naŋarui ghom, leso gabua eta ivaghamun ghau sov, ve naleep poia.
Aliŋam ilam pataghaaŋ wa ughe yo pale ugham mulin ghau.

Maaron tsiau, ugham mulin ghau ila zeran sasaghati nimazi.
Pa yes zeran to sosor, ve lolozi isaghatin tamtamon eta mako.
Isaav ighe tikis ghau, ene pale tivaghamun ghau kat.
Yoova, yau naghurghur matag payo to uul ghau.
Tiina tsiau, saawe tau kukuag ve ilam, yau nanumeer ghom.

Saawe tau naleep ila tinaŋ aapo ve ilam, yau naleep ila yo nimam.
Tauvene saawe tau tinaŋ ipoop ghau, yo uŋgin ghau.
Tauta monmon napapait ghom pa poia tsio.

Eval tiina tigham ŋgar naol payau. Pasaa, tighita ŋgar tau ivotvot payau ne, le tighilaal katin ghom.
Yo umin niag ariaaŋa to yoŋgaaŋ.

Tauvene mboŋoozo ila le ravrav izi, lolog poia kat payo,
ve avog ipapait ezam pa tapirim ve poia tsio.
Aazne, namin kooŋ wa. Eemon ughit ghau namin gabua saghati tau tamtamon tisiki ilale na sov.
Tapirig imbool wa. Ughur murim payau sov.

10 Pa koiagŋa tilup zi, ve tiliil eez pa ravuuŋ ghau namaat.
Saawe tau tiyoŋyooŋ ve tisasaŋan pa ravuuŋ ghau, tisavsaav tighe:

11 “Aa, Maaron ighur muuri pani wa!
Tataghoni ve takisi. Pa i le tamtamon eta to iuule mako.”
12 O Maaron, uleep soghan payau sov!
Maaron tsiau, rekia ulam uul ghau!

13 Koiagŋa tau tiŋgalŋgal saveeŋ payau na, ugham zi mayazi, ve urav zi le tisov.
Yes tau tighe tivaghamun ghau na, utatan zi, ve ugham zi mayazi kat.
14 Eemon yau aat naghur matag payo irau saawe, ve nasaŋan ghom to uul ghau.
Yau naghe napait ghom le napait ghom kat.

15 Avog pale ivovotia ŋgar tsio duduuŋa pa tamtamon.
Mboŋoozo ila le ravrav izi, yau aat nasasavia uraat tintiina tau yo ughamgham zi pa uleeŋ tamtamon.
Uraat tawe, isaav ighe natoova to nanin zi, ene aat narao mako.

16 Yoova, yo utotoi tapirim ila uraat tintiina. Tauvene yau aat nala ve navotia uraat tsio tana pa tamtamon leso matazi iŋgali.
Naghe nasavia ŋgar duduuŋa tau yo ughamghamu na.
Lolog pa nasavia gabua ite paam mako. Naghe nasavia ŋgar tsio duduuŋa mon.
17 Saawe tau kukuag ve ilam aazne, yo upaghazoŋai ghau pa ŋgar tsio.
Tauta navovotia uraat tsio ŋgeretazi pa tamtamon. Uraat tawe, maata ite.

18 O Maaron, aazne namin kooŋ, ve moom igham dabag wa.
Eemon ughur murim payau sov!
Uleep tomani ghau le irau navotia tapirim ve uraat tsio tintiina pa natmaiŋa, timbumaiŋa, ve iseeŋga taghon gha ila. a 

19 Maaron, tapirim ve ŋgar tsio duduuŋa, ene tiina le tiina kat. Izala izala le ikis sambam.
Ve uraat naol tau yo ughamgham zi na, tauvene paam. Ene tintiina kat.
Sei irau ghom? Eta mako.
20 Onoon, yo upul pataŋani naol ivot ve ivaghamun ghau.
Eemon yo pale ugham ghau naleep poia muul.
Paita namaat gha nazila naal tane.
Eemon yo pale ugham mulin ghau. Irau namaat mako.

21 Ve yo pale upakur ghau, ve ugham ezag ivot imin tiina,
ve urav ateg, leso lolog poia muul.
22 Tauvene yau aat narav gita ve napait ezam.
Pasaa, yo utataghon saveeŋ mbuaaŋ tsio.
Maaron tsiau, yo Maaron patabuyaaŋ to yes Israela.
Yau aat narav gita tsiau, ve nambou mbouŋ to napait ghom.

23 Pale avog iyoor ezam toman lolog poia kat, ve nambou to napait ghom.
Pale napakur ghom toman lolog.
Pasaa, yo ta ugham mulin ghau pa pataŋani tsiau.

24 Tauvene saawe isov, mboŋoozo ila le ravrav izi, yau aat nasavia ŋgar tsio duduuŋa.
Pasaa, yes tau tighe tivaghamun ghau na,
yo utatan zi le tapirizi isov, ve upamuul zi tila toman mayazi.
Copyright information for `TUCT