aMbo 43:2, 95:7
bIgham 15:16; 1Kor 6:20
dIgham 14:21; Mbo 89:9+
eIgham 17:6; Mbo 107:33+
fGnp 1:14
gGnp 8:22; Mbaŋ 17:26

Psalms 74

Taŋiiz to yes Israela iŋarui Maaron pa rumei toozi

Mbouŋ to Asap

O Maaron, mindai ta ughur murim payei kat?
Pale upul ghei nileep tauvene taghon taghon gha ila?
Yei sipsip tsio, ve yo ŋginiiŋ tsiei.
Puughu mindai ta atem yavyav kat payei tauvene? a 
Yei tamtamon tsio. Muuŋ, yo usiigh timbumaiŋa timin lem kat, ve uyozyooz pazi, ve ughamgham mulin zi pa pataŋani toozi.
Tauvene matam iŋgal ghei muul.
Ve matam iŋgal niam to lepoogh tau igheen izi loloz Zion na paam. b 
Taum ulam ve ulaagh ila nugh loolo ve ughita. Isaghat wa! Irau poia muul mako.
Koiamaiŋa tireu mbirisai rumei tsio patabuyaaŋ, ve tivaghamunia gabua naol isov tau tigheen ila loolo na.

Nugh tau muuŋ itiŋa taluplup ghiit iloŋ ila na, koiamŋa tiloŋ tila ve tighamu imin lezi, ve tisir toman aliŋazi tiina.
Ve tipayooz pilak toozi iloŋ ila, leso itotoi ighe tiliiv ghei wa.

Yes tivaghamunia Rumei Tiina imin yes tau tigham nakavasi toozi gha tila su to tiŋgor ai.
Ai popoiazi naol tau tisap gabua anunuzi ila to tipabood rumei tsio na, tigham nakavasi gha tipalpaal zi,
ve tiravrav berekai zi pa hama toozi tintiina.

Ve titun rumei tsio patabuyaaŋ, le yav ighan suvinia.
Tauvene taum niam to lepoogh tau ezam ighengheen ila na, tivaghamunia imin gabua sorok, le isaghat kat.

Yes tighe titatan ghei ve tivaghamun ghei kat.
Tauvene nugh tisov to taan tsiei tau tamtamon tiluplup zi ila ve tisuŋsuŋ payo na, titunuur zi le tisov.

Aazne, yei nighita gabua eta tau itotoi ighe yo ulepleep tomani ghei ne mako.
Ve propet eta ileep muul to ipaghazoŋai ghei pa ŋgar tsio ne mako.
Ve tsiei eta iwatagh mako: Pale ŋeez o, pataŋani tane isov?
10 Maaron, aazne koiamaiŋa tiŋiŋiŋ payo, ve tivevelegh ezam.
Mindai, pale upul zi tigham tauvene taghon taghon gha ila?

11 Puughu mindai ta ughur nimam ila murim, ve umamarar ghei mon?
Irau uul ghei mako?
12 Maaron, muuŋ ve ilam, yo kinik tsiei ve Uleeŋa tsiei.
Ve yo ughamgham uraat tintiina izi taan to uul ghei.

13 Muuŋ, taum tapirim ta uvalagh te gha sirivu ila pa ŋas, ve sirivu ila pa tapir.
Ve gabua sasaghati siriv tau tilepleep ila te loolo na, yo urav valaghin dabazi.

14 Leviatan paam, gabua saghati tiina tau ilepleep ila te loolo na, yo urav valaghin daaba ta naol ne,
ve ugham anooŋa, ve upan gabua sagsagŋa tau tileep nugh ŋginaaŋa na pani.
(74:14) Yes Kanaana tighur ila tighe gabua saghati tiina ee ileep ila te, eeza Leviatan. I daaba katini, ve naagho imin moot ma poghai, ma vene. Mos ziiri siriv, saveeŋ Leviatan izaa to kinik to Isip. Tauvene zeran ŋgara siriv tighe ziiri tane, ene saveeŋ palelaaŋ tau iŋarui saawe tau yes Israela timbut Te Siŋsiŋai, ve Maaron irav yes Isipa timatmaat.
,
d 

15 Nugh siriv, yo ugham yaa ivotvot pa taan ve irereer.
Ve yaa tintiina to nugh siriv tau tirereer irau saawe na, yo ugham zi timakmaak. e 

16 Yo ta ughur mboŋ ve mataaz, ve uŋginŋgin zi.
Ve yo ughur aaz ve kaiyo tigheen ila niazi. f 

17 Yo ughur taan seŋgaaŋa,
ve ughur saawe to nugh tuntunu, ve saawe to nugh yauŋa. g 

18 Yoova, matam iŋgal saveeŋ veleghiiŋ tau koiamŋa tisiksiki payo na.
Aazne, yes kankanooŋa tau tiwatagh ghom mako na, tivavaghamunia ezam, ve tighit ghom umin kaut sorok.

19 Koiamaiŋa ŋgar toozi imin gabua sagsagŋa. Lolozi isaghatin tamtamon eta mako.
Ve yei tamtamon tsio tapirimai irau gabua eta mako
Tauvene upul ghei nila nimazi sov.
Lolom iveegh payei sov. Pa yes titatan ghei le nileep saghat kat.

20 Muuŋ, yo umbu saveeŋ tomani ghei ughe yo pale umin Maaron tsiei, ve yei nimin tamtamon tsio. Matam iŋgal saveeŋ mbuaaŋ tsio tana, ve uul ghei.
Ughita. Aazne, taan tsiei ivon pa zeran sasaghati tau tiyoŋyooŋ ila ndoroom loolo, ve tisasaŋan pa liŋiiŋ siŋ pa tamtamon.

21 Upul zeran sasaghati titatan tamtamon ve tipamayaŋin zi sov.
Uul yes mbolaaŋa ve yes tau tileep saghat na. Leso tipait ezam.

22 Maaron, yei tamtamon tsio. Uburig ve uyooz payei lak!
Koiamŋa tipapakur tauzi toman aliŋazi tiina.
Mataaz ta naol ne, mboŋoozo ila le ravrav izi, yes kankanooŋa tau tiwatagh ghom mako na, tighamgham oroor tiina ve tivevelegh ghom.
Lolom iveegh sov. Matam iŋgal ŋgar tau tighamghamu na, ve ughur atuya pazi.
Copyright information for `TUCT