aMbo 147:6; Lu 1:52; Syg 18:7+
bSyg 14:10, 16:19

Psalms 75

Maaron pale igabiiz tamtamon ve ighur atuya pazi

Mbouŋ to Asap

Paesiiŋ ila pa ŋeer tau imuŋmuuŋ pa mbouŋ na tauvene: Mbouŋ tane aliiŋa ‘Uvaghamunia sov’

Maaron, yei lolomai poia payo, ve nipakur ghom pa poia tsio.
Pasaa, monmon yo ulepleep ugharau ghei.
Tauvene yei nipapait ezam, ve nivovotia uraat ŋgeretazi tau ughamgham zi na.
Ve Maaron isaav ighe: “Yau taug naghur saawe to nagabiiz tamtamon ve naghur atuya pazi.
Ve gabizooŋ tsiau, ene pale iduduuŋ mon.

Isaav ighe yogyoog itok taan ve tamtamon tisov tisaŋeeŋ,
yau aat nakis taan puughu, leso igheen tuŋia.

Yes tau tipapait tauzi ezazi na, yau nasaav pazi naghe: ‘Apait taumim irao!’
Ve nasaav pa zeran sasaghati naghe: ‘Tapirimim igheen sindei? Apait tapirimim irao!

Tauvene apakur taumim sov, ve asik saveeŋ veleghiiŋ payau sov!’”
Pa tamtamon to aaz izaa, ma tamtamon to aaz izila, ma tamtamon to nugh siriv paam, ene irau tigham tamtamon eta eeza ivot imin tiina ne mako.

Maaron mon ta igham tamtamon ezazi ivot imin tiina.
Pasaa, i ta igagabiiz tamtamon ve ighurghur atuya pazi.
Tamtamon siriv, i itatan zi. Ve siriv, i ipakur zi le ezazi tintiina. a 

Yoova ikis rubruub ee ila niima.
Rubruub tawe ivon pa vaen ariaaŋa. Vaen tawe, ene aatyavyav tooni.
Zeran sasaghati tau tileep izi taan ne, i pale iliŋ vaen tawe, ve ipaghun zi pani, le tisov tighunu le isov.
Rabrab tau igheen ila rubruub mboole na, pale tighunu paam. b 
Eemon yau navovotia uraat tintiina to Yoova irau saawe.
Pale namboumbou mbouŋ, ve napapait Maaron to Yakop eeza.
10 Pasaa, i isaav ighe: “Zeran sasaghati, yau aat napasov tapirizi.
Ve zeran duduŋazi, yau aat napakur zi ve napalot zi, leso tapirizi ivot imin tiina.”
Copyright information for `TUCT