aYo 14:27; Ro 5:1; 2Tes 3:16
bMbo 89:14; Ro 3:26
cMbo 67:6; Yems 1:17

Psalms 85

Maaron tamtamon tooni tighasoni to iuul zi, leso tileep poia muul

Ene mbouŋ to ŋeer tau imuuŋ pa mbouŋ

Mbouŋ to yes Kora

O Yoova, muuŋ yo ughamgham poghania nugh tsio.
Yei tau Yakop paaghu tooni ne, saawe tau nileep ila pataŋani loolo, yo uul ghei ve ugham ghei nileep poia muul.

Ve saawe tau tamtamon tsio tigham sosor, yo upul sosor toozi.
Ŋgar toozi tau isosor ila yo matam na, yo ureua isov ilale.

Yo utatan aatyavyav tsio,
ve lolom iluum pazi muul.
Ve aazne, nitaŋ rarai ghom muul.
Maaron, yo Uleeŋa tsiei. Matam imuul payei ve uul ghei, leso nileep poia muul.
Atem yavyav payei muul sov.

Mindai, pale aatyavyav tsio izazaa tsiei irau saawe?
Pale ighengheen tauvene taghon taghon gha ila?

Yei tamtamon tsio. Tauvene matam imuul ilam payei, ve upaburigin ghei muul.
Leso lolomai poia payo, ve nipait ghom.

O Yoova, lolom isaghav tamtamon tsio ariaaŋ ve uluul zi. Utotoi ŋgar tana payei muul, ve ugham mulin ghei. Leso nileep poi.
Yau aat naghur taliŋag poi pa saveeŋ tau Maaron ighe ivotia pa tamtamon tooni.
Pasaa, yau nawatagh: Yoova pale isavia saveeŋ luuma pait.
Tamtamon tooni tau lolozi isaghavu ariaaŋ ve titaghon eez tooni na, i pale iuul zi, leso tileep poia muul.
Eemon yes aat tiyamaan zi. Ŋgar to borauŋa tau muuŋ tighamghamu na, tighamu muul sov. a 

Onoon kat. Yes tau tiroi pa Maaron ve titaghon ŋgar tooni na, i ilepleep igharau zi ve isasaŋan pa uleeŋ zi.
I aat ileep tomani ghiit, ve itotoi tapiri ve poia tooni ivot ighazooŋ izi taan tsiei tane
10 Maaron loolo isaghav tamtamon tooni ariaaŋ ve iuluul zi, ve yes titaghon tutuuŋ tooni. Tauta yesŋa tilup zi timin eemon.
Yes titaghon ŋgar duduuŋa, ve i igham zi tileep poia toman lolozi luuma. Tauta lupuuŋ toozi eemon. b 

11 Ŋgar to taghoniiŋ saveeŋ onoon, ene ivotvot izi taan.
Ve Maaron ileep izi sambam, ve maata pait itaghon ŋgar tooni duduuŋa.
12 Onoon kat, Yoova pale igham lemai gabua popoia.
I pale igham mariri poia ivot ila taan tsiei. c 

13 Ŋgar duduuŋa, ta imuŋmuuŋ pani,
ve ighagharaat eez pani to ilam.
Copyright information for `TUCT