aIgham 34:6; Yona 4:2
bIgham 8:10, 15:11
cSyg 7:9-10, 15:4
dIgham 33:13; Mbo 25:5; Yer 32:39; Ezek 11:19+
eIgham 34:6

Psalms 86

Ŋeer ee ighason Maaron to ipaghazoŋaini pa eez tooni

Mbouŋ to David

O Yoova, ughur taliŋam payau. Ulooŋ suŋuuŋ tsiau tane, ve uul ghau.
Pa yau naleep ila pataŋani loolo ve nailiil eez.

Yau besooŋa tsio, ve nanumeer ghom.
Lolog isaghav ghom, ve nataghon eez tsio.
Yo Maaron tsiau.
Tauvene uvool tsiau, ve ugham mulin ghau. Mako pale namaat.

Tiina tsiau, lolom isaghatin ghau ve uul ghau!
Pa saawe isov, ta mboŋoozo ila le ravrav izi, taŋiiz tsiau iŋaŋarui ghom.

Yoova, yau besooŋa tsio. Yau nasuŋ payo toman lolog.
Ugham lolog poia muul.

Tiina tsiau, yo poiam kat, ve upulpul sosor to tamtamon.
Tamtamon tisov tau tisuŋsuŋ payo na, lolom isaghav zi ariaaŋ, ve uluul zi. a 
Tiina tsiau, ughur taliŋam pa suŋuuŋ tsiau.
Ulooŋ taŋiiz tsiau tane ve uul ghau. Pa yau besooŋa tsio.

Saawe tau naleep ila pataŋani loolo, yau nataŋ rarai ghom.
Pasaa, yau nawatagh: Yo aat ulooŋ suŋuuŋ tsiau ve uul ghau.
Tiina tsiau, yo mon ta Maaron tauu. Maaron ite paam raraate imin yo mako.
Eta irau igham uraat tintiina imin yo ne mako. b 

Yoova, yo ughur tamtamon tisov tileep irau nugh toz toz.
Nughmariŋ pale tilam tiput aghezi payo,
ve tipait ezam pa tapirim ve poia tsio. c 

10 Pasaa, yo ezam tiina, ve ughamgham gabua ŋgeretazi tintiina.
Tauvene yo mon ta Maaron tauu.
11 O Yoova, utotoi eez tsio payau
Leso laghooŋ tsiau iduduuŋ mon itaghon saveeŋ tsio onoon.
Ve ugham ghau naghur lolog isov iŋarui ghom.
Leso naroi payo, ve nataghon aliŋam. d 

12 O Tiina, yo Maaron tsiau.
Yau lolog poia payo, ve napakur ghom toman lolog isov.
Yau aat napait ezam pa tapirim ve poia tsio irau saawe.

13 Pasaa, yo lolom isaghav ghau ariaaŋ ve uluul ghau.
Muuŋ, rigmon kanaŋ nazila mateegha niazi.
Eemon yo ugham mulin ghau, tauta namaat mako.
14 O Maaron, ughita. Aazne, zeran sasaghati tiburig tighe tivaghamun ghau.
Yes to taliiŋzizi tilup zi, ve tighe tirav ghau namaat.
Lolozi isaghatin tamtamon eta mako, ve matazi iŋgal ghom rigta mako.
15 Tiina, yo Maaron tau lolom isasaghatin ghei, ve ughamgham poghani ghei.
Atem yavyav rekrekia mako.
Poia tsio, ene tiina kat. Yo lolom isaghav ghei ariaaŋ ve uluul ghei, ve utaghon saveeŋ tsio irau saawe. e 
16 Tauvene matam imuul ilam payau, ve lolom isaghatin ghau.
Upalot ghau. Pa yau besooŋa tsio. Yau nabesbees payo imin tinaŋ ibesbees payo.
Tauvene ugham mulin ghau pa pataŋani tsiau tane.

17 O Yoova, ugham ŋgar eta leso itotoi ighe yo lolom poia payau.
Pasaa, ighe yo uul ghau, ve ugham ghau ateg izi, ene pale koiagŋa tighita tighe onoon yo lolom payau. Mako mayazi ve tineneeŋ.
Copyright information for `TUCT