aSyg 4:8
cMbo 24:1
dYo 8:12; 1Yo 1:7
eMbaŋ 13:22
fEp 1:20+; Kol 1:18; Syg 1:5
gLu 1:33; Hib 1:8
hMbo 39:5
iMbo 49:7+

Psalms 89

Yes Israela tigham ŋgar naol tighe saveeŋ to Maaron imbua tomania David na, puughu mindai ta Maaron itaghoni mako?

Mbouŋ tane to Etan, i Ezra paaghu tooni

O Yoova, yau aat nambou ve napait ghom irau saawe. Pasaa, yo lolom isaghav tamtamon tsio ariaaŋ ve uluul zi.
Ve ŋgar tsio to taghoniiŋ saveeŋ mbuaaŋ tsio tauvene paam. Avog pale ivovotia pa tamtamon ta aazne ve iseeŋga taghon gha ila.

Pale navoti ghom pa tamtamon naghe: Ŋgar tau lolom isaghav tamtamon tsio ve uluul zi, ene pale ighengheen tauvene le alok.
Ve ŋgar to taghoniiŋ saveeŋ mbuaaŋ tsio paam, ene igheen tuŋia irau saawe, imin sambam saamba.
Muuŋ, yo usaav ughe: “Yau nasiigh besooŋa tsiau David ve nambu saveeŋ tomania.
Saveeŋ tane, napariaaŋa le iyaryaaŋ kat naghe:
‘Yau pale napalot paaghu tsio, ve naghur zi timin kinik irau saawe. Yes pale tileep ila niam to ghamuuŋ pooz, ve tiŋgin yes Israela taghon taghon gha ila.’”
Yoova, yes aŋela patabuyaaŋa tiluplup zi izi sambam, ve tipapait ezam pa gabua ŋgeretazi tau ughamgham zi na.
Yes tipapakur ghom pasaa, yo utataghon saveeŋ mbuaaŋ tsio. a 

Yoova, sei ta irau ghom?
Yes tau tileep izi sambam na, yo uliiv zi tisov.
Aŋela eta irau ghom mako.

Saawe tau yes daaba to aŋela patabuyaaŋa tilup zi pa savsaveeŋ izi nugh sambam, yes tiyooz livutin ghom toman roiŋ tiina, ve tipakur ghom.
Pasaa, yo tapirim tiina ve uliiv zi kat.
Yoova, yo Maaron saksakim ve uŋgin gabua naol isov. Sei tapiri tiina kat imin yo? Eta mako.
Ve yo utortoor ŋgar tsio mako. Saawe isov, utataghon saveeŋ mbuaaŋ tsio.
Yo ta uŋgin te.
Isaav ighe yaghur tiina izaa ve ipei dibom tintiina, yo irau ugham dibom imaat, ve taun izi.

10 Muuŋ geeg, yo urav valaghin Rahab daaba gha imaat.
(89:10) Muuŋ, tighur ila tighe gabua saghati tiina ee ileep te loolo, eeza Rahab. Naagho imin moot ma poghai, ma vene. Saawe isov, i izuzuari ghi ighe ivaghamunia gabua. Ve tighe muuŋ geeg, Maaron yesuru Rahab tiparav, ve Maaron iliivo. Tauta aazne Rahab ivaghamunia gabua muul mako.

Nimam pataŋani.
Tauta urav matin koiamŋa, ve ureu mbirisai zi tighawaar.
11 Sambam ve taan, ene yo tsio.
Pasaa, yo ta ughur zi tomania gabua naol isov tau tileep ve tigheen ila. c 

12 Yo ughur taan tau igheen ila pa ragh, ve ila imuul yavaar puughu.
Loloz Tabor ve loloz Hermon timboumbou toman lolozi poia ve tipait ezam.
13 Yo saksakim ve tapirim tiina.
Nimam tapir, ene saghati. Tauta urav koiamŋa ve uliiv zi.

14 Ŋgar duduuŋa tomania ŋgar to gabizooŋ tamtamon itaghon ŋgar duduuŋa, tauta imin puughu pa pooz tsio.
Ve ŋgar isov tau ughamgham zi na, itotoi ighe: Yo lolom isaghav tamtamon tsio ariaaŋ ve uluul zi, ve utataghon saveeŋ mbuaaŋ tsio.
15 Yes tau tilup zi pa suŋuuŋ toman lolozi poia ve tiyoryoor ezam na,
tilaghlaagh ila ghazooŋa tsio, ve poia tsio izazaa toozi. d 

16 Yes tiwatagh ghom tomania ŋgar tsio.
Tauvene saawe isov, ta mboŋoozo ila le ravrav izi, lolozi poia kat, ve tipapait ezam pa ŋgar tsio duduuŋa.
17 Yei nigham tapirimai ilat tsio, tauta tinimai izaa ve ezamai imin tiina.
Poia tsio, tauta igham tapirimai ivot le niliiv koiamaiŋa.

18 Yoova, yo usiigh ŋeer tau imin sigheu payei. I ta iponpoon koiamaiŋa.
Maaron patabuyaaŋ to yei Israela, yo ughur lemai kinik to igham pooz payei.

Saveeŋ mbuaaŋ tau muuŋ Maaron igham pa David

19 Yes tau lolozi isaghav ghom ariaaŋ ve titaghon eez tsio na, muuŋ geeg, yo upaghazoŋai zi pa ŋgar tau ughe ughamu. Yo usaav pazi ila tandaghiiŋ ughe:
“Zaaba ariaaŋa ee ilepleep ila sosomim.
Yau taug nasiigho ve naghuru imin kinik.
Tauta nauule ve nagham eeza ivot imin tiina.

20 Yau naghita besooŋa tsiau David, i irao.
Tauta naliŋ ŋgoreeŋ tsiau patabuyaaŋ izala daaba, ve naghuru pa uraat. e 

21 I pale ileep ila yau nimag,
ve napaloti irau saawe.

22 Tauvene koiŋa irau tiliivo mako,
ve zeran sasaghati irau titatani mako.

23 Pasaa, yau taug pale namuuŋ pani, ve natatan koiŋa le tapirizi isov.
Yes tau tighur koi pani na, yau aat narav zi tisov timataar.

24 Yau aat nataghon saveeŋ mbuaaŋ tau nagham pani na, ve lolog isaghavu ariaaŋ, ve naghur poia tsiau izazaa tooni.
Pale naleep tomania ve napaloti, leso tapiri ivot imin tiina ve iliiv koiŋa. Tauvene eeza pale imin tiina kat.

25 Yau aat nagham eval tiina tileep ila i saamba.
Yes tau tileep izi nari to Te Mediterenian, ve ila imuul yaa Euprates ziige.
26 I pale isaav payau ighe: ‘Yau Tamaŋ yo.
Yo ta Maaron tsiau, ve Uleeŋa tsiau ariaaŋa. Yo uponpoon ghau pa koiagŋa imin maet tiina.’

27 Ve yau pale naghamu imin natug aidaaba.
Tauvene i pale eeza tiina kat le iliiv kinik tisov. f 

28 Pale lolog isaghavu ariaaŋ ve nauule irau saawe.
Ve saveeŋ tau nambua pani na, tauvene paam. Pale igheen ariaaŋ tauvene taghon taghon gha ila.

Saveeŋ tau Maaron imbua pa David paaghu tooni

29 Ziiri waaro tooni irau isov mako. Pale naŋgin paaghu tooni, ve tileep poi taghon taghon gha ila imin sambam saamba.
Pale tileep ila David niia to ghamuuŋ pooz, ve tiŋgin yes Israela irau saawe. g 
30 Eemon isaav ighe paaghu tooni tighur murizi pa saveeŋ tsiau,
ve laghooŋ toozi isapir pa tutuuŋ tau naghuru na,

31 ma tivelegh tutuuŋ tsiau tau igheen pataghaaŋ na imin kaut sorok,
ve timalaaŋ pa tutuuŋ tsiau ŋgara,

32 ene pale naŋgal matazi pa ŋgar toozi to zoraaŋ saveeŋ,
ve nalos matin zi pa sosor toozi.
33 Eemon ŋgar tau lolog isaghav David ve paaghu tooni ve nauluul zi, ene irau napuli mako. Pale ighengheen tauvene taghon taghon gha ila.
Ve saveeŋ tau nambua pani na, irau nareua mako.
Saveeŋ tau ivot ila taug avog, ene irau natoora mako.

35 Pasaa, yau Maaron patabuyaaŋ. Tauvene saveeŋ mbuaaŋ tsiau tau napariaaŋa le iyaryaaŋ kat, ene pale igheen tauvene taghon taghon gha ila.
Irau natombaan David mako.

36 Paaghu tooni irau tisov mako. Siŋ toozi pale iparseeŋ taghon taghon gha ila.
Pale matag pazi ve pooz toozi iyaryaaŋ imin aaz, ve ighengheen tauvene.

37 Pooz toozi pale tuŋia irau saawe imin kaiyo.
Kaiyo tau igheen ila sambam saamba, ene imin ilaal ighe saveeŋ mbuaaŋ tsiau tane, ene onoon.”

Taŋiiz to yes Israela iŋarui Maaron pa kinik toozi

38 Yoova, muuŋ yo umbu saveeŋ ariaaŋa tauvene pa David ve paaghu tooni.
Eemon aazne, atem yavyav kat pa kinik tsiei tau taum usiigho ve ughuru pa uraat na.
Yo lolom pani muul mako, ve ughur murim pani kat.

39 Saveeŋ mbuaaŋ tau muuŋ ugham pa besooŋa tsio na, aazne yo ureua wa.
Ve uzugh moghar ndamoonda tooni izi pa daaba, ve usiki ila ŋgaupup.

40 Didiiŋ ariaaŋa tau ilivutin nugh tooni na, yo ureu mbirisaini izi.
Ve uvaghamunia ruum tooni ariaŋazi paam, le tisov timbiriis.

41 Tauvene tamtamon tisov tau tilala tilamlam na, tiyumyum gabua tooni.
Ve yes nugh nugh tau tileep tigharauu na, tiveveleghi ve tighamgham ŋalalaŋ pani.

42 Yoova, yo taum upalot kinik tsiei koiŋa ve tiparav ariaaŋ le tiliivo.
Tauta tisov lolozi poia ve tipakur zi.

43 Saawe tau kinik tsiei igham malmal, yo upaloti mako,
ve upamuul mbuzaagh tooni maata imuul pa tauu.

44 Tauvene gabua tooni popoia tau i eeza tiina pani na, yo uwalaav zi pani,
ve ureu niia to ghamuuŋ pooz izi taan.

45 I ŋeer paaghu. Eemon yo ugham koiŋa tiliivo, tauta igharaat tauu mako ve ipul tauu. Taghita imin kooŋ.

Yes Israela tighason Maaron to igham mulin zi pa pataŋani toozi

46 O Yoova, pale ŋeez o matam ilam payei muul?
Mindai, pale uŋgooz naghom payei, ve aatyavyav tsio izazaa tsiei taghon taghon gha ila?

47 Yoova, matam iŋgal: Yei tamtamon to taan nileep malau mako.
Onoon, yo taum ughur ghei. Eemon, pale nisov nimataar nimin kaut sorok. h 

48 Sei irau imaat mako, ve ileep maata yaryaare taghon taghon gha ila?
Ma sei irau ipasalia tauu pa mateegh? Eta mako. i 
49 Yoova, muuŋ yo umbu saveeŋ pa David ve upariaaŋa le iyaryaaŋ kat ughe yo pale lolom isaghavu ve uule irau saawe.
Eemon aazne, poia tsio tana igheen sindei? Mindai ta utaghon saveeŋ mbuaaŋ tsio muul mako?
50 O Yoova, yau besooŋa tsio. Matam iŋgal ghau ve uul ghau lak!
Pa aazne, nugh nugh tipamayaŋin ghau,
ve tivevelegh ghau le lolog isaghat kat.

51 Yoova, yo taum usiigh ghau ve ughur ghau namin kinik.
Ughita. Nugh sindei tau nala pani, ene koiamŋa tipaŋiŋizai ghau,
ve tisiksik saveeŋ veleghiiŋ payau.
52 Tapait Yoova pa poia tooni irau saawe.
Onoon le onoon kat!
Copyright information for `TUCT