aGnp 3:19
b2Pe 3:8
cYems 1:10; 1Pe 1:24
d1Kor 4:5; Hib 4:13
eMbo 39:4

Psalms 90

Iit tamtamon, saawe toit tuuku

Suŋuuŋ to Mose, i Maaron tamtamon tooni

O Tiina, muuŋ ve ilam,
yo umin niamai to lepoogh.

Yo Maaron tau uleep irau saawe.
Muuŋ geeg, saawe tau ugham taan ve loloz tivot soone, yo ulepleep.
Ve yo pale ulepleep tauvene taghon taghon gha ila.
Yo ugham yei tamtamon to nimaat nimin ŋgaupup.
Yo usaav payei ughe yei aat nimaat ve nizila nimin taan muul. a 

Yo ughita ughe ndaman ndiŋndiŋ ndiŋndiŋ ee (1000), ene saawe tuuku mon.
Ila ŋgar tsio, ene imin noor ve ilam aazne.
Ve imin saawe tuuku to mboŋ tau yes zaaba tiyooz, ve timamaat. b 
Yo upasov lepoghamai, imin tamtamon igheen ve iviv, ve isov.
Yei nimin manman tau ighe aaz izaa, ene ruuŋgu iravalagh ve ghitooŋa poia.
Ve ighe ravrav izi, ene imalai ve itap. c 

Aatyavyav tsio, ene ipapasov ghei.
Lolom basbasuuŋ pa sosor tsiei ve ughurghur atuya payei. Tauta roiŋ tiina igham ghei.

Pasaa, ŋgar tsiei isov tau isapir pa ŋgar tsio, ene yo matam kisin zi.
Sosor tsiei tau ŋgozaaŋ na, tisov tigheen ghazooŋa ila yo matam. Eta iyooŋ mako. d 
Tauvene saawe isov tau nileep izi taan ne, aatyavyav tsio izazaa tsiei.
Tauta nileep saawe tuuku mon, mako yaghuramai isov, ve nimaat.
10 Nileep irau ndaman tamoot tol saŋavul (70) mon, ve nimaat.
Ve ighe tapirimai irao, o nileep irau ndaman tamoot paaŋ (80) ma vene.
Ve ndaman tsiei ta naol ne, niravrav ghei pa uraat, ve nibadbaad pataŋani. Saawe saghati, ve saawe poia paam.
Nighamgham tauvene ila le rekia mon nizaa pa saawe tsiei, mako nisov.
11 Maaron, sei ighilaal katin aatyavyav tsio tapiri?
Aatyavyav tsio tau iŋaŋarui ghei ne, sei ighazooŋ pani, leso iroi payo ve itaghon aliŋam? Eta mako.

12 Tauvene ugham ghei nighilaal nighe lepoogh tsiei to taan, ene tuuku kat.
Leso ŋgar tsiei ivot, ve nighilaal eez to nileep poia. e 
13 O Yoova, ŋeez o utoor ŋgar tsio ve matam ilam payei muul?
Lolom isaghatin ghei ve uul ghei.
Pa yei besooŋa tsio.

14 Mboŋoozo ta naol ne, nighe upavon ghei pa poia tsio, ve utotoi ŋgar tsio tau lolom isaghav tamtamon tsio ve uluul zi.
Leso lolomai poia ve tintinmai, ve nimboumbou ila le saawe tsiei isov.

15 Ugham saawe poia ivot.
Leso lolomai poia, ve iyat ndaman katini tau ughurghur pataŋani payei ve nileep saghat na.
16 Yei besooŋa tsio nighe nighit ghom ugham uraat tintiina tivot muul.
Ve paaghu tsiei tau pale tivot murei na paam, nighe utotoi tapirim pazi tomania poia tsio tau ezam tiina pani na, ve tighita.

17 Yoova, yo Maaron tsiei. Lolom poia payei ve ughur poia tsio izaa tsiei.
Leso uraat tau nighamghamu pa nimamai ne ilaan poia.
Upalot uraat tsiei. Leso ighur anooŋa.
Copyright information for `TUCT