aMbo 98:1; Syg 5:9
bMt 28:19
cGnp 1:1; 1Kor 8:4+
dMbaŋ 17:31

Psalms 96

Yoova i kinik tiina

Ambou mbouŋ paaghu pa Yoova!
Yam tamtamon tau aleep irau taan na, ambou pa Yoova. a 

Ambou mbouŋ pani, ve apait eeza pa poia tooni.
Uraat tintiina tau i ighamgham zi to iuul ghiit na, saawe isov asasavi zi.

Avotia eeza tiina tomania tapiri ve poia tooni irau nugh naol isov.
Ve uraat tooni ŋgeretazi tau maata ite na, asavi zi ila irau nughmariŋ. b 
Pasaa, Yoova, i eeza tiina kat.
Tauvene iit aat tapait vaaru le tapaiti kat, ve taroi pani iliiv zimaronŋa tisov.

Pasaa, zimaronŋa tisov tau nugh nugh tibesbees pazi na, ene maaron karomŋa mon.
Ve Yoova, i Maaron tauu ta ighur sambam tomania gabua naol isov. c 

I eeza tiina kat ve mbonari ilivuti.
Tapiri ve poia tooni ipavon rumei tooni loolo, ve ipaboode le paghuuna kat.
Tauvene yam tamtamon to nughmariŋ, ŋgar tsiam ivot ve aghilaal Yoova!
Ŋgar tsiam pakia ve apakuru. Pa i le eeza, ve tapiri tiina kat.

I eeza tiina le tiina kat. Tauvene yam apaiti, o iduduuŋ.
Alam tomania paitooŋ tsiam, ve aloŋ ala sirsiir to rumei tooni loolo.

Yoova ipabood tauu pa ŋgar tooni patabuyaaŋ. Tauvene aput aghemim pani ve apaiti.
Yam tamtamon to taan, asov aroi pani, ve atatan taumim ila naagho.

10 Asaav pa nughmariŋ aghe: “Yoova, i kinik tiina tau iŋgin gabua naol isov!
Muuŋ, i ighur taan le puughu iyaryaaŋ kat. Tauta gabua eta irau izuure mako.
I pale igabiiz nughmariŋ, ve ighur atuya pazi.
Ve gabizooŋ tooni, ene iduduuŋ mon.”
11 Yam gabua to sambam ve taan, lolomim poia ve tintinmim.
Ve te tomania gabua naol isov tau tileep ila loolo na paam, aliŋamim izaa tiina ve apait Yoova.

12 Ve uum tomania gabua naol isov tau titum ila loolo na, lolomim poia ve tintinmim.
Ve ai tomania gabua naol isov to su loolo paam, aliŋamim izaa, ve ayoor Yoova eeza.

13 Pasaa, i ighe ilam. Leso igabiiz tamtamon tisov to taan ve ighur atuya pazi.
I pale iŋgin tamtamon tisov to taan, ve igabiiz zi.
Ve gabizooŋ tooni, ene iduduuŋ ve onoon mon. d 
Copyright information for `TUCT