aIgham 15:18; Mbo 93:1
bIgham 19:16+; Mbo 89:14
cMbo 46:2,6
dPil 3:1, 4:4

Psalms 97

Maaron, i kinik tiina tau iliiv zimaronŋa tisov

Yoova, i kinik tiina tau iŋgin gabua naol isov.
Tauvene yam tamtamon tau aleep irau taan na, lolomim poia.
Ve yam sisia tauvene paam, tintinmim. a 

I iŋgozŋgooz tauu ila taitai gabgabuai, ve ndoroom ikaui.
Ŋgar duduuŋa tomania ŋgar to uleeŋ, tauta imin puughu pa pooz tooni. b 

I igham yav ighan imuuŋ pani,
ve ighaniir koiŋa tisov.

I igham nugh ighani milmilia irau taan.
Tauvene taan ighita, le irur.

Yoova, i tiina tau iŋgin taan isov.
Saawe tau i ilam ve itotoi tapiri, loloz tisov tireer ve timbiriis ila i naagho. c 

Gabua naol tau tighenaar ila sambam saamba na, tipaghazoŋai Yoova tighe ŋgar tooni iduduuŋ mon.
Nughmariŋ tighita gabua tawe, ve tighilaal tighe Yoova, i eeza tiina.
Tamtamon tisov tau tibesbees pa maaron karomŋa anunuzi na, Yoova igham zi mayazi. Pasaa, maaron karomŋa toozi tirau gabua eta mako.
Maaron toozi tawe pale tisov tiput aghezi pa Yoova ve tipakuru.
Maaron, yes to Zion tilooŋ varum pa uraat tau yo ughamghamu na, le lolozi poia.
Ve nugh nugh to Yuda paam, tisov tintinizi.
Pasaa, yo uyozyooz pa tamtamon tsio, ve uluul zi pa pataŋani toozi.

Yoova, yo Maaron Tiina. Tamtamon tisov to taan tileep ila yo sambam.
Yo ezam tiina le tiina kat. Uliiv zimaronŋa tisov.
10 Yoova loolo pa yes tau tighurghur koi pa ŋgar saghati.
Tamtamon tooni tau lolozi isaghavu ariaaŋ, ve titaghon eez tooni na, i imin sigheu pazi, leso gabua eta ivaghamun zi sov.
Ve ighamgham mulin zi ila zeran sasaghati nimazi.

11 I ighurghur ghazooŋa pa zeran duduŋazi.
Yes tau ŋgar duduuŋa igheen ariaaŋ ila lolozi na, i igham zi lolozi poia kat.

12 Yam zeran duduŋamim, tintinmim pa Yoova!
Apaiti pa poia tooni, ve apakur eeza patabuyaaŋ! d 
Copyright information for `TUCT