aRo 9:3
bMbaŋ 21:20
cRo 9:31+; Pil 3:9
dMt 5:17; 2Kor 3:6; Ga 3:24+; Hib 8:13
eWkp 18:5; Lu 10:27+; Ga 3:12
fLo 30:11-14
gMt 10:32; Yo 3:15; Mbaŋ 16:31
hIs 28:16; Ro 9:33
iMbaŋ 10:34+; Ro 3:22, 29; Ga 3:28
jYoel 2:32; Mbaŋ 2:21
kMbaŋ 8:30+
lIs 52:7; Ep 6:15
mIs 53:1; Yo 12:38; Hib 4:2
nMbo 19:4
oLo 32:21; Ro 11:11,14
pIs 65:1; Ro 9:30
qIs 65:2

Romans 10

Yes Israela tighazooŋ pa Maaron eez tooni soone

Yam toŋvetaz, yau nagham ŋgar tiina kat pa yes Israela naghe le Maaron igham mulin zi, o poi. Tauta saawe isov, suŋuuŋ tsiau iŋaŋarui Maaron pazi. a 

Yau nawatagh katin zi, tauvene yau irau nasavia gabuazi. Onoon, ŋgar toozi iyaryaaŋ kat tighe le titaghon duduŋai eez to Maaron. Eemon tighazooŋ kat pa Maaron loolo ve ŋgar tooni mako. Tauta tisosor pa eez tooni. b 

Pasaa, eez tau Maaron igham ghiit taduduuŋ ila i maata, ene tighilaalo soone. Tauta tizor eez tooni tawe, ve tiyooz ila eez to taghoniiŋ tutuuŋ tighe ŋgar tawe pale igham zi tiduduuŋ ila Maaron maata. c 

Eemon Krisi igham tutuuŋ to Mose anooŋa ivot wa. Tauvene eez to taghoniiŋ tutuuŋ ilam imuul izi tooni. Pasaa, tamtamon tisov tau tighur ila tooni na, timin tamtamon duduŋazi ila Maaron maata. d 

Eez to taghur ila, leso taduduuŋ ila Maaron maata

Eez to taghoniiŋ tutuuŋ leso taduduuŋ ila Maaron maata, ene ipataŋan. Muuŋ, Mose ibood saveeŋa ighe: “Tamtamon tau ighe itaghon duduŋai tutuuŋ, ene aat ileep poia.” e 

Ve eez to taghur ila, leso taduduuŋ ila Maaron maata, ene raurauai. Pasaa, isaav pait tauvene: “Yo usaav ila lolom ughe: ‘Sei irau izala nugh sambam?’ Vene sov. Pa Maaron imbaaŋ Krisi izilam taan wa. Yo ughe ughamu imuul izilam pasaa? Ve usaav ughe: ‘Sei irau izila nugh to mateegha, ve ipaburigin Krisi?’ Vene paam sov. Pa Maaron ipaburigin Krisi pa mateegh wa. Yo ughe upaburigini muul pasaa?” Saveeŋ tane, ŋgara tauvene:

“Maaron saveeŋ tooni igheen malau pait mako. Pasaa, igheen ila avoon ve loloon wa.” f 
Laak, saa saveeŋ? Ene saveeŋ tau yei nivovotia pa eez to ghuruuŋ ila.
Saveeŋ tawe isaav pait tauvene: Isaav ighe taum avom uvotia ghuruuŋ ila tsio ila eval tiina matazi ve ughe: “Yesu, i Tiina tsiau,” ve ighe lolom ighur ila ughe Maaron ipaburigini pa mateegh wa, ene aat Maaron igham mulin ghom, ve uleep poia. g 

10 Pa ighe loloon ighur ila, ene aat Krisi igham ghiit taduduuŋ ila Maaron maata. Ve isaav ighe tauun avoon tavotia ghuruuŋ ila toit ila eval tiina matazi, ene aat Maaron igham mulin ghiit ve taleep poi.

11 Pasaa, Maaron aliiŋa tau tiboode na isaav ighe:

“Tamtamon tisov tau tighur ila tooni, ene pale tighita ghuruuŋ ila toozi anooŋa ve Maaron igham mulin zi. Eta irau ighur maata pani sorok ne mako.” h 
12 Saveeŋ tane iŋarui tamtamon tisov. Yes Yuda, ve yes tau Yuda mako na paam. Pasaa, Maaron eemon ilepleep. I Tiina to iit tasov. Ve i ighurghur poia tooni tiina izazaa to tamtamon tisov tau tighasoni pa uleeŋ. i 

13 Pasaa, Maaron aliiŋa isaav ighe:

“Tamtamon tisov tau tighason Maaron pa uleeŋ na, i aat igham mulin zi ve tileep poi.” j 

Yes Israela lezi puughu eta to tizor Krisi mako

14 Eemon isaav ighe tamtamon tighur ila to Maaron mako, ene pale tighasoni pa uleeŋ mindai? Ve isaav ighe tilooŋ vaaru mako, pale tighur ila tooni mindai? Ve isaav ighe lezi tamtamon eta to ivotia mos pazi mako, ene pale tilooŋ Maaron vaaru mindai? k 

15 Ve isaav ighe timbaaŋ yes uraata tila mako, pale tivotia mos pa tamtamon mindai? Pasaa, Maaron aliiŋa tau tiboode na, isaav ighe:

“Tamtamon tighita yes tau tilaghovai vaaru poia ilam na, le igham zi lolozi poia.” l 
16 Eemon yes Israela tisov titaghon saveeŋ to vaaru poia mako. Eŋaeŋa mon. Saveeŋa, Isaia isavia muuŋ wa. Ighe:

“Tiina, sei ighur ila saveeŋ tau yei nivotia pazi ne?” m 
17 Tauvene Maaron aliiŋa ta taloŋlooŋa, tauta ipaburigin ghiit to taghur ila. Ve saawe tau tivotia Krisi vaaru, tamtamon tilooŋ saveeŋ tooni.

18 Ighe tauvene, pale tasaav mindai pa yes Israela? Tilooŋ vaaru poia soone? Mako. Yes tilooŋa wa. Pasaa, Maaron aliiŋa isaav ighe:

“Aliŋazi ila irau taan isov,
ve saveeŋ toozi ilaan irau nughmariŋ.” n 
19 Ma mindai? Yes Israela tilooŋ saveeŋ tawe, ve tikankaan pa puughu? Mako. Yes irau tighazooŋ pani. Aghita. Muuŋ, Mose isaav ighe:

“Yes nugh nugh tau lezi ezazi mako ve lezi ŋgar mako na, yau aat nagham zi timin leg.
Ve poia tsiau tau izaa toozi, ene pale igham gham atemim yavyav, ve aŋooŋ pazi.” o 
20 Ve propet Isaia isaav ghazooŋa kat ighe:

“Tamtamon tau tizuari zi payau mako na, yes tana ta tindeeŋ ghau.
Ve yes tau tighason payau mako, tauta natotoi taug pazi.” p 
21 Eemon yes Israela, Isaia isavia saveeŋ iŋarui zi ighe:

“Yam tau taliŋamim puura mako ve azorzoor aliŋag na, saawe isov yau nararaav nimag ve nasasaŋan gham to amuul alam payau. Eemon mako.” q 
Copyright information for `TUCT